រដ្ឋាភិបាលថ្មីរបស់ប្រទេសម៉ាឡេស៊ីបាននិយាយកាលពីនៅថ្ងៃសៅរ៍ថា ខ្លួនកំពុងតែពិចារណាលើការកែប្រែច្បាប់ស្តីពីការជួញដូរមនុស្ស និងការរត់ពន្ធជនអន្តោប្រវេសន៍ត្រឹមតែប៉ុន្មានថ្ងៃប៉ុណ្ណោះបន្ទាប់ពីក្រសួងការបរទេសសហរដ្ឋអាមេរិកបានរាយការណ៍ពីភាពមិនរីកចម្រើននៃកិច្ចខិតខំប្រឹងប្រែងរបស់ប្រទេសនេះ ក្នុងការប្រឆាំងនឹងការជួញដូរកាលពីឆ្នាំមុន។
ក្រសួងមហាផ្ទៃបាននិយាយថា សំណើដែលស្ថិតនៅក្រោមការពិភាក្សានេះគឺផ្តោតលើការការពារជនរងគ្រោះដោយផ្តល់ឲ្យពួកគេនូវសេរីភាពបន្ថែមទៀតក្នុងការធ្វើចលនានិងការងារហើយណែនាំអំពីការដាក់ពិន័យកាន់តែខ្លាំងសម្រាប់អ្នកជួញដូរ។
កាលពីថ្ងៃព្រហស្បតិ៍ ក្រសួងការបរទេសអាមេរិកបានចេញផ្សាយរបាយការណ៍ប្រចាំឆ្នាំស្តីពីការជួញដូរមនុស្សដោយបានទម្លាក់ចំណាត់ថ្នាក់ម៉ាឡេស៊ីទៅក្នុងបញ្ជីឃ្លាំមើលថ្នាក់ទី២ដែលជាប្រភេទមួយតំណាងឲ្យមានការពិនិត្យពិច័យជាពិសេស។ របាយការណ៍នេះបានកត់សម្គាល់ថា ប្រទេសអាស៊ីអាគ្នេយ៍មួយនេះមិនបង្ហាញនូវការខិតខំប្រឹងប្រែងខ្លាំងក្លាជាងឆ្នាំមុនទេ។
របាយការណ៍នេះបានឲ្យដឹងថា កិច្ចខិតខំប្រឹងប្រែងការពារជនរងគ្រោះដោយរដ្ឋាភិបាលនេះនៅតែមិនទាន់គ្រប់គ្រាន់ហើយថា ការសមគំនិតគ្នារវាងមន្ត្រីអនុវត្តច្បាប់បានរារាំងដល់កិច្ចខិតខំប្រឹងប្រែងប្រឆាំងនឹងការជួញដូរមនុស្ស។
ក្រសួងមហាផ្ទៃបាននិយាយនៅក្នុងសេចក្តីថ្លែងការណ៍មួយថា “រដ្ឋាភិបាលម៉ាឡេស៊ីបានកត់សម្គាល់ពីរបាយការណ៍ស្តីពីការជួញដូរមនុស្សនិងបានប្តេជ្ញាចិត្តយ៉ាងពេញលេញក្នុងការលុបបំបាត់បទល្មើសជួញដូរមនុស្ស”។
ប្រទេសម៉ាឡេស៊ីត្រូវបានគេស្គាល់ជាយូរមកហើយថាជាទិសដៅមួយសម្រាប់ជនរងគ្រោះដោយការជួញដូរមនុស្សដោយរួមមានទាំងកម្មករមានឯកសារនិងគ្មានឯកសារផងដែរ៕ REUTERS
Source: Kampuchea Thmey Daily
0 Comments