ភ្នំពេញ ៖ សាស្ត្រាចារ្យនិងនិស្សិតកូរ៉ចំនួន៣១នាក់សហការជាមួយអង្គការសេវាកម្មដើម្បីសន្តិភាពកម្ពុជា បានចុះផ្តល់ចំណេះដឹង ចំណេះធ្វើ ឥរិយាបថ និងការចេះរួមរស់ជាមួយគ្នាដល់កុមារកម្ពុជាដើម្បីឲ្យកុមារទាំងអស់បានចូលរៀនប្រកបដោយសុវត្ថិភាព និងសន្តិភាពក៏ដូចជាជំរុញឲ្យកុមារបានចូលរួមសកម្មភាពជាមួយសហគមន៍ និងសង្គមកាន់តែច្រើន។
សាស្ត្រាចារ្យនិងនិស្សិតកូរ៉េជាង៣០នាក់នេះ ដឹកនាំដោយលោកសាស្ត្រាចារ្យ ចាង ហូស៊ុង( CHANG HOSUNG)សាកលវិទ្យាធិការនៃសាកលវិទ្យាល័យដាងគុកមកទស្សនកិច្ចសិក្សានៅក្នុងប្រទេសកម្ពុជាចាប់ពីថ្ងៃទី23 ខែ មិថុនា ឆ្នាំ201៨ ដល់ថ្ងៃទី០២ ខែ កក្កដាឆ្នាំ២០១៨ ដើម្បីមកយកបទពិសោធន៍ និងស្វែងយល់ពីគ្នាទៅវិញទៅមក ព្រមទាំងជួយបង្រៀនដល់សិស្សានុសិស្សនៅក្នុងសាលាបឋមសិក្សា តាទក ដែលមានទីតាំងនៅភូមិ តាទក ឃុំ ពួក ស្រុក ពូក ខេត្តសៀមរាប។
ក្រៅពីនេះសាស្ត្រាចារ្យនិងនិស្សិតកូរ៉េមិនត្រឹមតែជួយផ្តល់នូវការអប់រំប៉ុណ្ណោះទេក៏បានជួយគាំទ្រទ្រង់ដល់បរិស្ថានសាលារៀន ដោយជួយជួសជុលដំបូលសាលា លាបថ្នាំ គូគំនូរ និងជួយឧបត្ថម្ភនូវសម្ភារៈសិក្សាមួយចំនួន ដូចជា សម្ភារៈសំរាប់សិស្សសិក្សា សម្ភារកីឡា និងសម្ភាររស់នៅមួយចំនួនទៀតដល់សាលា និង សិស្សានុសិស្សផងដែរ។
រាល់សកម្មភាពទាំងអស់នេះ គឺដើម្បីចូលរួមចំណែកក្នុងការអភិវឌ្ឈ និងស្វែងយល់អំពីវប្បធម៌រវាងប្រទេសកម្ពុជា និងប្រទេសកូរ៉េខាងត្បូង ក្នុងនាមជាគ្រួសារមនុស្សជាតិតែមួយ ទោះបីជាមានសញ្ជាតិ និងជំនឿផ្សេងៗគ្នាក៏ដោយប្រយោជន៍គឺបង្កើតនូវសនិ្តភាពជាសាកលនៅលើពិភពលោក។តាំងតែពីឆ្នាំ2009 ដល់បច្ចុប្បន្នសាកលវិទ្យាល័យ ដាងកុគ ( Dankook University) នៃប្រទេសកូរ៉េខាងត្បូង បានចុះមកទស្សនកិច្ចសិក្សាសាលាបឋមសិក្សានៅក្នុងប្រទេសកម្ពុជាជាង១០ដងរួចមកហើយ។
ដោយឡែកក្នុងឆ្នាំ២០១៨នេះ សាកលវិទ្យាល័យ បានចុះមកជួយអប់រំផ្នែកអនាម័យ សិក្សាសង្គម កីឡាកាយសម្ព័ន្ធ គណិតវិទ្យា វិទ្យាសាស្ត្រសង្គម គំនូរ និងបានសហការជាមួយសហគមន៍ និងស្ថាប័នពាក់ព័ន្ធឲ្យមានបរិស្ថានស្អាត និងធ្វើជាឧទាហរណ៍ល្អដល់ប្រជាជននៅក្នុងខេត្តផងដែរ។
គួរបញ្ជាក់ថា កាលពីមុនសាកលវិទ្យាល័យជួយដល់សាលាបឋមសិក្សា ដោយផ្តោតទៅលើការសាងសង់បង្គន់អនាម័យ និងប្រព័ន្ធទឹកស្អាតសម្រាប់សិស្សានុសិស្សប្រើប្រាស់ជាប្រចាំថ្ងៃ ដែលអាចពិសាបាននៅក្នុងសាលា ហើយក៏បានចុះជួយសហគមន៍ក្រីក្រដូចជាមជ្ឈមណ្ឌលកុមារកំព្រា មជ្ឈមណ្ឌលជនពិការ មជ្ឈមណ្ឌលពេទ្យកុមាររស់នៅដោយមានផ្ទុកមេរោគអេដស៍ជាដើម៕
Source: Kampuchea Thmey Daily
0 Comments