ភ្នំពេញ ៖ សាកលវិទ្យាល័យពហុបច្ចេកទេស Ningbo នៃសាធារណរដ្ឋប្រជាមានិតចិន នឹងផ្ដល់អាហារូបករណ៍ លើជំនាញបច្ចេកទេសសំណង់ អគ្គិសនី និងអេឡិចត្រូនិកដល់និស្សិតកម្ពុជាដើម្បីឆ្លើយតបទៅនឹងតម្រូវទីផ្សារការងារនាពេលបច្ចុប្បន្ន។
ការផ្តល់អាហារូបករណ៍ដល់និស្សិតកម្ពុជានេះ បានធ្វើឡើងនៅក្នុងជំនួបពិភាក្សាការងាររវាងលោកបណ្ឌិត អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ ជាមួយលោក Zhang Huibo សាកលវិទ្យាធិការនៃសាកលវិទ្យាល័យពហុបច្ចេកទេស Ningbo នៅទីស្តីការក្រសួងការងារកាលពីរសៀលថ្ងៃទី២៩ ខែមិថុនាឆ្នាំ២០១៨។
លោក ឡៅ ហ៊ីម ប្រតិភូរាជរដ្ឋាភិបាល ទទួលបន្ទុកអគ្គនាយកដ្ឋានអប់រំបណ្ដុះបណ្ដាលបច្ចេកទេស និងវិជ្ជាជីវៈ បានថ្លែងក្រោយជំនួបនោះ ឲ្យដឹងថា នៅក្នុងជំនួបនោះ លោក អ៊ិត សំហេង បានសម្ដែងការស្វាគមន៍ និងជំរុញក្នុងការផ្ដល់អាហារូបករណ៍នេះ ឱ្យបានឆាប់នាពេលខាងមុខនេះផងដែរ។
លោកបានបន្តថា ទស្សនកិច្ចសិក្សារបស់ប្រតិភូសាកលវិទ្យាល័យពហុបច្ចេកទេស Ningbo នៅកម្ពុជានាពេលនេះ គឺដើម្បី៖១៖ ស្វែងរកកិច្ចសហការជាមួយក្រសួងការងារ និងបណ្តុះបណ្តាលវិជ្ជាជីវៈ។២៖ បង្កើតកម្មវិធីផ្លាស់ប្ដូរនិស្សិត និងគ្រូបច្ចេកទេស។ ៣៖ ស្វែងរកកិច្ចគាំទ្រក្នុងការបង្កើតមជ្ឈមណ្ឌលបណ្តុះបណ្តាលវិជ្ជាជីវៈមួយ នៅក្នុងវិទ្យាស្ថានណាមួយរបស់ក្រសួងការងារ និងបណ្តុះបណ្តាលវិជ្ជាជីវៈនិង៤ ធ្វើទស្សនកិច្ចសិក្សានៅវិទ្យាស្ថានជាតិបណ្តុះបណ្តាលបច្ចេកទេស, វិទ្យាស្ថានពហុបច្ចេកទេសព្រះកុសុមៈ, វិទ្យាស្ថានជាតិពហុបច្ចេកទេសកម្ពុជា និងវិទ្យាស្ថានពហុបច្ចេកទេសព្រះសីហនុ។
លោក ឡៅ ហ៊ីម បន្តថា រាជរដ្ឋាភិបាលកម្ពុជានីតិកាលទី៥នេះ បានចាត់ទុកការអភិវឌ្ឍធនធានមនុស្ស ជាវិស័យអាទិភាពក្នុងចំណោមវិស័យអាទិភាពទាំងបួន នៃយុទ្ធសាស្ត្រចតុកោណដំណាក់កាលទី៣ ដើម្បីលើកកម្ពស់ជំនាញដែលត្រូវការជាចាំបាច់ ក្នុងការធានាបាននូវការប្រកួតប្រជែងក្នុងទីផ្សារពលកម្មក្នុងតំបន់ ដែលកាន់តែបើកចំហ និងជំរុញសេដ្ឋកិច្ចឱ្យឈានឡើងកម្រិតខ្ពស់មួយទៀត ហើយជាពិសេសផ្តល់ជូនប្រជាពលរដ្ឋនូវអំណាច ក្នុងការកំណត់វាសនាជីវិតរបស់ខ្លួន និងសម្រេចក្តីប្រាថ្នានៅកន្លែងការងារ។
លោកបានបន្តថា រាជរដ្ឋាភិបាលកម្ពុជា បានកំណត់គោលដៅសេដ្ឋកិច្ចជាប្រទេសដែលមានចំណូលមធ្យមកម្រិតខ្ពស់ នៅឆ្នាំ២០៣០ និងចំណូលខ្ពស់ក្នុងឆ្នាំ២០៥០ ដើម្បីសម្រេចគោលដៅសេដ្ឋកិច្ចនេះ។
សូមបញ្ជាក់ថា រាជរដ្ឋាភិបាលកម្ពុជាបានដាក់ចេញនូវគោលនយោបាយមួយចំនួន ដែលមានភាពប្រទាក់ក្រឡា និងបំពេញឱ្យគ្នាទៅវិញទៅមក រួមមាន៖ គោលនយោបាយជាតិស្តីពីមុខរបរ និងការងារ ឆ្នាំ២០១៥-២០២៥ គោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥ គោលនយោបាយជាតិស្តីពី ការអប់រំបណ្តុះបណ្តាលបច្ចេកទេស និងវិជ្ជាជីវៈ ឆ្នាំ២០១៧-២០២៥។
បច្ចុប្បន្នក្រសួងការងារមានគ្រឹះស្ថានក្រោមឱវាទចំនួន ១០២ ក្នុងនោះមានគ្រឹះស្ថានសាធារណៈក្រោមឱវាទចំនួន៣៩ ទូទាំងរាជធានី-ខេត្ត។ ក្រសួងបាននិងកំពុងកែទម្រង់ស៊ីជម្រៅលើផ្នែកអប់រំបណ្តុះបណ្តាលបច្ចេកទេស និងវិជ្ជាជីវៈ ៖ ១. ពង្រឹងគុណភាពការអប់រំបណ្តុះបណ្តាលបច្ចេកទេស និងវិជ្ជាជីវៈ, ២. បង្កើនលទ្ធភាពទទួលបានការបណ្តុះបណ្តាលប្រកបដោយសមធម៌, ៣. លើកទឹកចិត្តភាពជាដៃគូរវាងរដ្ឋ និងឯកជន និង៤. លើកកម្ពស់អភិបាលកិច្ចក្នុងប្រព័ន្ធអប់រំបណ្តុះបណ្តាលបច្ចេកទេស និងវិជ្ជាជីវៈ៕
Source: Kampuchea Thmey Daily
0 Comments