NBC ​៖ ​ចារកម្ម​អាមេរិក​ជឿជាក់ថា កូរ៉េខាងជើង​កំពុង​បង្កើត​គ្រាប់បែកនុយក្លេអ៊ែរ​បន្ថែ​ម​ទៀត​ថ្វីបើ​មានការ​ចរចា​ក៏ដោយ

កាសែត NBC News បាន​រាយការណ៍​ថា ភ្នាក់ងារ​ស៊ើប​ការសម្ងាត់​របស់​អាមេរិក​ជឿជាក់ថា ប្រទេស​កូរ៉េខាងជើង​បាន​បង្កើន​ការផលិត​ប្រេងឥន្ធនៈ​សម្រាប់​អាវុធ​នុយក្លេអ៊ែរ​នៅ​តំបន់​សម្ងាត់​ជាច្រើន​ក្នុង​រយៈពេល​ប៉ុន្មាន​ខែ​ថ្មីៗ​នេះ ហើយ​ប្រហែលជា​ព្យាយាម​លាក់បាំង​វា ​ខណៈពេល​ខ្លួន​កំពុង​ស្វែងរក​សម្បទាន​នៅក្នុង​កិច្ចចរចា​នុយក្លេអ៊ែរ​ជាមួយ​សហរដ្ឋអាមេរិក​។​
​
នៅក្នុង​របាយការណ៍​មួយ​កាលពី​ថ្ងៃ​សុក្រ បណ្តាញ​នេះ​បាន​និយាយថា ការវាយតម្លៃ​ស៊ើបការណ៍​ចុងក្រោយ​បំផុត​របស់​សហរដ្ឋអាមេរិក​ហាក់ដូចជា​ផ្ទុយ​នឹង​ការបង្ហាញ​របស់លោក​ត្រាំ​ដែល​បាន​បង្ហោះ Twitter បន្ទាប់ពី​ជំនួប​កំពូល​ថ្ងៃទី​១២​ខែមិថុនា​ជាមួយ​មេដឹកនាំ​កូរ៉េខាងជើង​លោក​គីម​ជុង​អ៊ុន​ថា “​មិនមាន​ការគំរាមកំហែង​នុយក្លេអ៊ែរ​ទៀត​ទេពី​ប្រទេស​កូរ៉េខាងជើង​”​។​

NBC បាន​ដកស្រង់​សម្តី​មន្ត្រី​អាមេរិក​មិន​បញ្ចេញ​ឈ្មោះ​ចំនួន​៥​នាក់​ដែល​និយាយថា ក្នុង​រយៈពេល​ប៉ុន្មាន​ខែ​ថ្មីៗ​នេះ កូរ៉េខាងជើង​បាន​បង្កើន​ការផលិត​អ៊ុយ​រ៉ានី​ញ៉ូ​ម​ដែល​ចម្រាញ់​រួច​សម្រាប់​អាវុធ​នុយក្លេអ៊ែរ​ថ្វីបើ​ខ្លួន​បាន​ចូលរួម​ក្នុង​វិស័យ​ការទូត​ជាមួយ​សហរដ្ឋអាមេរិក​ក៏ដោយ​។​
​
បណ្តាញ​នេះ​បាន​លើកឡើងថា ក្រុមមន្ត្រី​អាមេរិក​បាន​សន្និដ្ឋានថា កូរ៉េខាងជើង​មាន​ទីតាំង​នុយក្លេអ៊ែរ​សម្ងាត់​ច្រើនជាង​មួយកន្លែង​ក្រៅពី​រោងចក្រ​ផលិត​ប្រេង​ឥន្ទ​នៈ​នុយក្លេអ៊ែរ​ដែល​គេ​ស្គាល់​នៅ Yongbyon ។​

NBC បាន​ដកស្រង់​សម្តី​មន្ត្រី​ម្នាក់​ដែល​បាន​និយាយថា “​មាន​ភស្តុតាង​យ៉ាងច្បាស់​លាស់​ថា​ពួកគេ​កំពុង​ព្យាយាម​បញ្ឆោត​អាមេរិក​”​។​
​
ទោះបីជា​យ៉ាងណាក៏ដោយ CIA បាន​បដិសេធ​ធ្វើ​អត្ថាធិប្បាយ​លើ​របាយការណ៍​របស់ NBC ។ ក្រសួងការបរទេស​បាន​និយាយថា ខ្លួន​មិនអាច​បញ្ជាក់​និង​មិន​ធ្វើ​អត្ថាធិប្បាយ​លើ​បញ្ហា​ស៊ើបការណ៍​សម្ងាត់​បានទេ​។ ចំណែក​សេត​វិមាន​មិនបាន​ឆ្លើយតប​នឹង​សំណើសុំ​យោបល់​ឡើយ​។​
​
កូរ៉េខាងជើង​បាន​យល់ព្រម​នៅក្នុង​កិច្ចប្រជុំ​កំពូល​ដើម្បី​ធ្វើការ​ឆ្ពោះទៅរក​ការរំសាយ​អាវុធ​នុយគ្លេអ៊ែរ​ចេញពី​ឧបទ្វីប​កូរ៉េ​ប៉ុន្តែ​សេចក្តីថ្លែងការណ៍​រួម​ដែល​បាន​ចុះហត្ថលេខា​ដោយ​លោក​គីម​និង​លោក​ត្រាំ​មិនបាន​ផ្តល់ព័ត៌មាន​លម្អិត​អំពី​របៀប​ឬ​ពេលវេលា​ដែល​រដ្ឋាភិបាល​ក្រុង​ព្យុងយ៉ាង​អាច​បោះបង់​អាវុធ​នុយក្លេអ៊ែរ​របស់​ខ្លួន​នោះទេ​៕ REUTERS

​

[caption id="attachment_939295" align="aligncenter" width="960"] SINGAPORE, SINGAPORE - JUNE 12: In this handout photograph provided by The Strait Times, North Korean leader Kim Jong-un (L) with U.S. President Donald Trump (R) during their historic U.S.-DPRK summit at the Capella Hotel on Sentosa island on June 12, 2018 in Singapore. U.S. President Trump and North Korean leader Kim Jong-un held the historic meeting between leaders of both countries on Tuesday morning in Singapore, carrying hopes to end decades of hostility and the threat of North Korea's nuclear programme. (Photo by Kevin Lim/The Strait Times/Handout/Getty Images)[/caption]

Source: Kampuchea Thmey Daily