អគ្គលេខាធិការអង្គការសហប្រជាជាតិលោក Antonio Guterres នឹងធ្វើទស្សនកិច្ចប្រទេសបង់ក្លាដែសនៅថ្ងៃអាទិត្យជាមួយប្រធានធនាគារពិភពលោកលោក Jim Yong Kim ដើម្បីវាយតម្លៃអំពីតម្រូវការសម្រាប់ដោះស្រាយជាមួយជនភៀសខ្លួនរ៉ូហ៊ីងយ៉ារាប់សែននាក់ដែលរត់គេចចេញពីប្រទេសមីយ៉ាន់ម៉ា។
សេចក្តីថ្លែងការណ៍របស់អង្គការសហប្រជាជាតិបាននិយាយថា ដំណើរទស្សនកិច្ចរយៈពេលពីរថ្ងៃនេះនឹងបង្ហាញពីភាពសប្បុរសធម៌របស់ប្រទេសបង់ក្លាដែសក្នុងការទទួលលំហូរនៃជនភៀសខ្លួនធំបំផុតក្នុងឆ្នាំ២០១៧និងតម្រូវការរបស់សហគមន៍អន្តរជាតិដើម្បីធ្វើបន្ថែមទៀត។
ចាប់ពីខែសីហាដល់ខែធ្នូឆ្នាំ២០១៧ ជនជាតិភាគតិចមូស្លីមរ៉ូហ៊ីងយ៉ាជាង៧០០,០០០នាក់បានរត់គេចពីការវាយលុកមួយដោយកងទ័ពមីយ៉ាន់ម៉ាដែលការសងសឹកចំពោះការវាយប្រហារលើប៉ុស្តិ៍ព្រំដែនដោយពួកឧទ្ទាមរ៉ូហ៊ីងយ៉ា។
អង្គការសហប្រជាជាតិបាននិយាយថា មេដឹកនាំទាំងពីរនឹងដាក់មូលដ្ឋានគ្រឹះសម្រាប់ការពិភាក្សាបន្ថែមទៀតជាមួយប្រទេសបង់ក្លាដែសនិងមីយ៉ាន់ម៉ា។
នៅក្នុងទីក្រុងដាកា មេដឹកនាំទាំងពីរនឹងជួបជាមួយលោកនាយករដ្ឋមន្ត្រី Sheikh Hasina និងមន្ត្រីជាន់ខ្ពស់ដទៃទៀត។
នៅថ្ងៃចន្ទ លោក Guterres និងលោក Kim នឹងធ្វើដំណើរទៅសួរសុខទុក្ខជនភៀសខ្លួននិងបុគ្គលិកជំនួយនៅជំរំ Cox's Bazar នៅឆ្នេរភាគអាគ្នេយ៍។
គណៈប្រតិភូនេះក៏រួមមានឧត្តមស្នងការអង្គការសហប្រជាជាតិទទួលបន្ទុកជនភៀសខ្លួនលោក Filippo Grandi និងនាយកប្រតិបតិ្តនៃអង្គការមូលនិធិ UN លោកស្រី Natalia Kanem ផងដែរ។
UN និយាយថា ពួកគេនឹងសិក្សាអំពីសក្តានុពលសម្រាប់ការត្រឡប់ដោយសុវត្ថិភាព ស្ម័គ្រចិត្តនិងភាពថ្លៃថ្នូររបស់ជនភៀសខ្លួនទៅកាន់ប្រទេសមីយ៉ាន់ម៉ាវិញ៕ AFP
Source: Kampuchea Thmey Daily
0 Comments