ចិន​ចាប់​ចិន ​បង្ខាំង​ជំរិត​ទារប្រាក់​ ត្រូវ​ចាប់ខ្លួន​៥​នាក់ ​រត់​រួច​៣​នាក់

ភ្នំពេញ ​៖ ​កាលពី​វេលា​ម៉ោង​១២​ថ្ងៃត្រង់​ថ្ងៃទី​០២ ​ខែ​កក្កដា ​ឆ្នាំ​២០១៨ នគរបាល​ក្រុងព្រះសីហនុ​ បាន​បង្ក្រាប​បទល្មើស​ជន​ជាតិចិន​ចាប់​បង្ខាំង​ជន​ជាតិចិន​ដូចគ្នា​ដើម្បី​ជំរិត​ទា​ប្រាក់ ដោយបាន​ធ្វើការ​ឃាត់ខ្លួន​ជនសង្ស័យ​ចំនួន​៥​នាក់។ ចំណែក​៣​នាក់​ទៀត​រត់គេចខ្លួន​បាត់។

​ជនសង្ស័យ​ទាំង​៥​នាក់​នោះ​មាន​១.​ឈ្មោះ Yang Jun ភេទ​ប្រុស អាយុ​៣៤​ឆ្នាំ មុខរបរ​អ្នក​ទេសចរណ៍​
២.​ឈ្មោះ Hou Jian ភេទ​ប្រុស អាយុ​២៩​ឆ្នាំ មុខរបរ​បុគ្គលិក​កាស៊ីណូ Golden City៣.​ឈ្មោះ Jiu Fei Bin ភេទ​ប្រុស អាយុ​៣៣​ឆ្នាំ មុខរបរ​បុគ្គលិក​កាស៊ីណូ New Macau៤.​ឈ្មោះ Wo Luo Yang ភេទ​ប្រុស អាយុ​២៤​ឆ្នាំ មុខរបរ​បុគ្គលិក​កាស៊ីណូ ជីន​ប៉ី​ ៥.​ឈ្មោះ Huang Wan Ying ភេទ​ប្រុស អាយុ​២៥​ឆ្នាំ មុខរបរ​អ្នក​ទេសចរណ៍ (​ជនសង្ស័យ​៨​នាក់ ​តែ​រត់​គេ​ខ្លួន​៣​នាក់)។

សម្ភារៈ​ដកហូត​បាន​រួម​មាន​ ៖
. ខ្នោះដៃ​ចំនួន ០៥​គូរ​
. ពិល​ឆក់​ចំនួន ០២
. ទូរស័ព្ទ​ចំនួន៧គ្រឿង។

ទាក់ទិន​នឹង​ករណី​បង្ក្រាប​ក្រុម​ជន​បង្ខាំង​មនុស្ស​ជំរិត​ទារ​ប្រាក់​នោះ ត្រូវបាន​លោក​ឧ​ត្ត​ម​សេនីយ៍​ទោ ជួន ណា​រិន្ទ ស្នងការ​នគរបាល​ខេត្ត​ព្រះសីហនុ​ថ្លែង​ឲ្យ​ដឹងថា នៅវេលា​ម៉ោង​ខាង​លើ​ ​សមត្ថកិច្ច​មូលដ្ឋាន​ទទួលបាន​ព័ត៌មាន​ថា មាន​ជនជាតិ​ចិន​១​ក្រុម​ពពាក់ពពូន​គ្នា​ចេញចូល​ផ្ទះ​ជួល​មួយ​កន្លែង​ស្ថិតនៅ​ក្រុម​៣៣ ភូមិ​៥ សង្កាត់​លេខ​៤ ក្រុងព្រះសីហនុ អាច​កំណត់​បានជា​ក្រុម​មាន​សមាសភាព​មិនល្អ។ ក្រោយពេល​ទទួល​បាន​ព័ត៌មាន​នោះ ក្នុង​នាមរូប​លោក​ជា​ស្នងការ និង​មាន​ជំនាញ​ព្រហ្មទណ្ឌ​ច្រើន​ឆ្នាំ​ផង បាន​ប្រើប្រាស់​កម្លាំង​ការិយាល័យ​ជំនាញ ចុះទៅ​សហការ​ជាមួយ​អធិការដ្ឋាន​នគរបាល​ក្រុងព្រះសីហនុ និង​កម្លាំង​ប៉ុស្តិ៍​រដ្ឋបាល​សង្កាត់​លេខ​៤ ​ក្រោម​ការ​សម្របសម្រួល​ពី​លោកស្រី​ព្រះរាជអាជ្ញា នៃ អយ្យការ​អម​សាលាដំបូង​ខេត្ត បាន​ចូល​ទៅ​ធ្វើការ​ឆែកឆេរ​ផ្ទះជួល​១​កន្លែង​នោះ និង បាន​ឃាត់ខ្លួន​ជនសង្ស័យ​ចំនួន​៥​នាក់ ដូច​មានឈ្មោះ​ខាងលើ ព្រមទាំង​បាន​ធ្វើ​ការ​រំដោះ​ជនរងគ្រោះ​ជា​ជនជាតិ​ចិន ៥​នាក់​ដែល​ជនសង្ស័យ​បាន​ចាប់​យក​ទៅ​បង្ខាំង​ទុក​ដើម្បី​ជម្រិត​ទារប្រាក់​ផងដែរ។

លោកស្នងការ​នគរបាល​ខេត្ត​បន្តថា បន្ទាប់ពី​សមត្ថកិច្ច​ បានធ្វើការ​ឃាត់ខ្លួន​សង្ស័យ​ទាំង​៥​នាក់​នោះមក ពួកគេ​បាន​សារភាព​ប្រហាក់ប្រហែល​គ្នា​ថា កាលពី​ថ្ងៃទី​៣០ ​ខែ​មិថុនា ​ឆ្នាំ​២០១៨ ​​ជនសង្ស័យ និង ជនរងគ្រោះ​បាន​ស្រុះស្រួល​គ្នា​ចូល​លេងល្បែងស៊ីសង​នៅ​កាស៊ី​ណូ​មួយ ហើយ​ជនរងគ្រោះ​៥​នាក់ មាន​១.​ឈ្មោះ Chen Dong Qin ភេទ​ប្រុស អាយុ​២៣​ឆ្នាំ មុខរបរ​អ្នក​ទេសចរណ៍ ២.​ឈ្មោះ Jian Liang ភេទ​ប្រុស អាយុ​២៩​ឆ្នាំ មុខរបរ​អ្នក​ទេសចរណ៍ ៣.​ឈ្មោះ Zeng Zhi Quo ភេទ​ប្រុស អាយុ​២៧​ឆ្នាំ មុខរបរ​បុគ្គលិក​កាស៊ីណូ New Macau ៤.​ឈ្មោះ Ling Yong Yong ភេទ​ប្រុស អាយុ​២៩​ឆ្នាំ មុខរបរ​អ្នក​ទេសចរណ៍ និង ៥.​ឈ្មោះ Shi Hao Bo ភេទ​ប្រុស អាយុ​៤៦​ឆ្នាំ មុខរបរ​អ្នក​ទេសចរណ៍ បាន​ចាញ់ល្បែង​អស់ប្រាក់​ពី​ខ្លួន ហើយក៏​បាន​នាំគ្នា​ខ្ចីបុល​ពី​ជនសង្ស័យ ដើម្បី​បាន​លេង​បន្តទៀត។ ខណៈ​​នោះ ក្រុម​ជនសង្ស័យ​ក៏បាន​ចាញ់​អស់ប្រាក់​ពី​ខ្លួន​ដែរ ពួកគេ​បានទាមទារ​ប្រាក់​ពី​ជនរងគ្រោះ​វិញ។ ប៉ុន្តែ​ពេលនោះ​ជនរងគ្រោះ គ្មាន​ប្រាក់​សង​ទៅ​ជនសង្ស័យ​ទេ ព្រោះ​ចាញ់​អស់​ដូចគ្នា ទើបបាន​ក្រុម​ជនសង្ស័យ​បង្កើត​គំនិត​ចាប់​បង្ខាំង​ជនរងគ្រោះ ទុក​ជំរិត​ទា​ប្រាក់​ពី​ឪពុកម្តាយ​នៅឯ​ប្រទេស​ចិន ដើម្បី​ឲ្យ​ផ្ញើ​លុយ​មក​សង​ពួកគេ​វិញ និង ដែលជា​ថ្នូរ​ក្នុងការ​ដោះលែង​ជនរងគ្រោះ​ទាំង​៥​នាក់​នោះ៕



Source: Kampuchea Thmey Daily