ភ្នំពេញ ៖ លោកទេសរដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានដឹកនាំគណៈប្រតិភូចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥១ និងកិច្ចប្រជុំពាក់ព័ន្ធ ពីថ្ងៃទី០១ ដល់០៤ ខែសីហា ឆ្នាំ២០១៨ នៅប្រទេសសឹង្ហបុរី នេះបើតាមការបញ្ជាក់ពីនាយកដ្ឋានព័ត៌មាន នៃក្រសួងការបរទេស។
កិច្ចប្រជុំរដ្ឋមន្ត្រីការបរទេសអាស៊ានឆ្នាំនេះ ប្រព្រឹត្តទៅក្រោមមូលបទ “ភាពរឹងមាំ និងនវានុវត្តន៍” គឺជាជំនួបដ៏សំខាន់របស់រដ្ឋមន្ត្រីការបរទេសអាស៊ាន ដើម្បីពិភាក្សា និងតាមដានកិច្ចប្រឹងប្រែងរបស់អាស៊ានក្នុងការកសាងសហគមន៍ និងសមាហរណកម្មសេដ្ឋកិច្ច។ កិច្ចប្រជុំនេះក៏ផ្តល់ឱកាសដល់រដ្ឋមន្ត្រីការបរទេសអាស៊ាន ក្នុងទំនាក់ទំនងប្រកបដោយន័យស្ថាបនា ជាមួយសមភាគីក្នុងយន្តការដែលដឹកនាំដោយអាស៊ានផ្សេងទៀត ដើម្បីធ្វើឲ្យស៊ីជម្រៅ និងពង្រឹងទំនាក់ទំនងខាងក្រៅរបស់អាស៊ាន។
ក្រោយពីចូលជួបសម្តែងការគួរសមជាមួយឯកឧត្តម លី សៀន ឡុង នាយករដ្ឋមន្ត្រីនៃសាធារណរដ្ឋសឹង្ហបុរី រដ្ឋមន្ត្រីការបរទេសអាស៊ាន បានពិភាក្សាប្រកបដោយអត្ថន័យ និងផ្លាស់ប្តូរទស្សនៈទាក់ទងនឹងបញ្ហាតំបន់ និងអន្តរជាតិ ដែលមានផលប្រយោជន៍រួម ដូចជាការវិវត្តន៍នៅសមុទ្រចិនខាងត្បូង ស្ថានការណ៍នៅឧបទ្វីបកូរ៉េ ការប្រយុទ្ធប្រឆាំងភេរវកម្ម និងហិង្សាជ្រុលនិយម សន្តិសុខលំហសមុទ្រ ក៏ដូចជាសន្តិសុខប្រពៃណី និងមិនប្រពៃណីផ្សេងទៀត។
ដោយឡែក នៅក្នុងរយៈពេលកិច្ចប្រជុំ៤ថ្ងៃនេះ លោកទេសរដ្ឋមន្ត្រី ប្រាក់ សុខុន បានធ្វើបទអន្តរាគមន៍ លើបញ្ហាជាច្រើន ដែលរួមមាន ទី១, អំពីស្ថានភាពនៅឧបទ្វីបកូរ៉េ៖ ដោយលោកទេសរដ្ឋមន្ត្រីបានស្វាគមន៍លទ្ធផលកិច្ចប្រជុំកំពូលអន្តរកូរ៉េ នៅក្នុងខែមេសា និងឧសភា ឆ្នាំ២០១៨ កិច្ចប្រជុំកំពូលបីលើក រវាងសាធារណរដ្ឋប្រជាមានិតប្រជាធិបតេយ្យកូរ៉េ និងចិន និងកិច្ចប្រជុំកំពូលជាប្រវត្តិសាស្ត្ររវាងសហរដ្ឋអាមេរិក និងសាធារណរដ្ឋប្រជាមានិតប្រជាធិបតេយ្យកូរ៉េ នៅខែមិថុនា ឆ្នាំ២០១៨។
លោកទេសរដ្ឋមន្ត្រីក៏បានស្វាគមន៍ “សេចក្តីប្រកាស បានមុនចម (Panmunjeom) ដើម្បីសន្តិភាព វិបុលភាព និងឯកភាពឧបទ្វីបកូរ៉េ” និង “ សេចក្តីថ្លែងការណ៍រួមរវាងសហរដ្ឋអាមេរិក និងសាធារណរដ្ឋប្រជាមានិតប្រជាធិបតេយ្យកូរ៉េ” ដែលជាជំហានដ៏សំខាន់ឆ្ពោះទៅការរំសាយអាវុធនុយក្លេអ៊ែរទាំងស្រុងនៅឧបទ្វីបកូរ៉េ។ ស្របជាមួយនឹងទស្សនៈរបស់រដ្ឋមន្ត្រីផ្សេងទៀតដែរ ឯកឧត្តមទេសរដ្ឋមន្ត្រី បានលើកទឹកចិត្តភាគីពាក់ព័ន្ធទាំងអស់ អនុវត្តឲ្យបានពេញលេញនូវការប្តេជ្ញាចិត្តនានា ដើម្បីធ្វើជាមូលដ្ឋានសម្រេចឲ្យបានសន្តិភាព និងការរំសាយអាវុធនុយក្លេអ៊ែរទាំងស្រុងនៅឧបទ្វីបកូរ៉េ។
ទី២, ចំពោះបញ្ហាសមុទ្រចិនខាងត្បូង៖ លោកទេសរដ្ឋមន្ត្រីបានទទួលស្គាល់ថា ការវិវឌ្ឍន៍ជាវិជ្ជមាន ដោយបានឯកភាពនូវ “សេចក្តីព្រាងអត្ថបទចរចារួមមួយស្តីពីក្រមប្រតិបត្តិនៅសមុទ្រចិនខាងត្បូង”។ ឯកឧត្តមទេសរដ្ឋមន្ត្រីបានបញ្ជាក់ឡើងវិញថា អាស៊ាន និងចិន បានបង្ហាញថា ទំនុកចិត្តរួមជាមួយកិច្ចសហប្រតិបត្តិការលំហសមុទ្រជាក់ស្តែង វិធានការទទួលផលឆាប់រហ័ស និងការកសាងទំនុកចិត្តអាចនាំមកនូវលទ្ធផលជាវិជ្ជមាន។ ក្នុងដំណើរទៅមុខក្នុងកិច្ចចរចាស្តីពីក្រមប្រតិបត្តិ ឯកឧត្តមទេសរដ្ឋមន្ត្រី បានជំរុញភាគីទាំងអស់បន្តគោរពតាម “ស្មារតីបាលី-សៀមរាប” ។
ទី៣, ក្នុងពេលដែលធ្វើការកត់សំគាល់ពីការព្រួយបារម្ភនានា ជុំវិញភាពតានតឹងផ្នែកពាណិជ្ជកម្ម រវាងមហាអំណាចសេដ្ឋកិច្ចសំខាន់ៗ លោកទេសរដ្ឋមន្ត្រីបានយល់ស្របជាមួយរដ្ឋមន្ត្រីការបរទេសផ្សេងទៀត ពីភាពចាំបាច់ក្នុងការបញ្ចប់ការចរចាស្តីពីភាពជាដៃគូសេដ្ឋកិច្ចគ្រប់ជ្រុងជ្រោយ (Regional Comprehensive Economic Partnership-RCEP) នៅក្នុងដំណាច់ឆ្នាំនេះ។ ឯកឧត្តមទេសរដ្ឋមន្ត្រីបានបញ្ជាក់ថា RCEP ដែលមានគោលបំណងបង្កើតកិច្ចព្រមព្រៀងទំនើប គ្រប់ជ្រុងជ្រោយ មានគុណភាពខ្ពស់ និងមានផលប្រយោជន៍ទៅវិញទៅមក នឹងជួយទប់ស្កាត់និន្នាការគាំពារនិយមដែលចេះតែកើនឡើង នៅក្នុងប្រព័ន្ធពាណិជ្ជកម្មពហុភាគី។
ទី៤, ចំពោះទស្សនទានឥណ្ឌូ-ប៉ាស៊ីហ្វីក ដែលស្នើឡើងជាច្រើន លោកទេសរដ្ឋមន្ត្រីបានគូសបញ្ជាក់យ៉ាងច្បាស់ ពីភាពចាំបាច់ក្នុងការតម្កល់មជ្ឈភាពអាស៊ាន ជាបេះដូងនៃគំនិតផ្តួចផ្តើមនិម្មាបនកម្មតំបន់។ ដោយទទួលស្គាល់ថា សំណើទស្សនទានឥណ្ឌូ-ប៉ាស៊ីហ្វីក នឹងត្រូវយកមកពិភាក្សាថែមទៀតនាពេលអនាគត ឯកឧត្តមទេសរដ្ឋមន្ត្រីបានប្រកាន់ខ្ជាប់នូវជំហរថា គំនិតផ្តួចផ្តើមនេះ ត្រូវមានលក្ខណៈបើកចំហរ បរិយាប័ន្ន និងបំពេញឲ្យគ្នាទៅវិញទៅមកជាមួយនឹងគំនិតផ្តួចផ្តើមផ្សេងៗទៀត និងត្រូវជំរុញការតភ្ជាប់ និងកិច្ចសហប្រតិបត្តិការ ជៀសជាងការបង្កើតការប្រកួតប្រជែង។
ទី៥, កិច្ចប្រជុំរដ្ឋមន្ត្រីការបរទេស បានកត់សម្គាល់ពីវឌ្ឍនភាពនៃការកសាងសហគមន៍អាស៊ាន ការអនុវត្តផែនការមេស្តីពីការតភ្ជាប់អាស៊ាន និងផែនការការងារនៃគំនិតផ្តួចផ្តើមសមាហរណកម្មអាស៊ានដំណាក់កាលទី៣។ រដ្ឋមន្ត្រីបានបញ្ជាក់ពីសារៈសំខាន់ក្នុងការលើកកំពស់ថែមទៀត អំពីទំនាក់ទំនងរវាងប្រជាជន និងប្រជាជន ជំរុញការតភ្ជាប់ឌីជីថល និងនវានុវត្តន៍។
ចំពោះទំនាក់ទំនងរវាងប្រជាជន និងប្រជាជន មានការលើកឡើងនូវទស្សនៈជាច្រើនក្នុងការគាំទ្រគំនិតផ្តួចផ្តើមការលើកកម្ពស់អត្តសញ្ញាណអាស៊ានក្នុងចំណោមប្រជាជនអាស៊ាន ទាក់ទងយុវជនអាស៊ាន ដើម្បីពង្រឹងកិច្ចសន្ទនា និងការយោគយល់គ្នាទៅវិញទៅមករវាងយុវជនដែលមានជំនឿផ្សេងគ្នា។ រដ្ឋមន្ត្រីបានគូសបញ្ជាក់ពីកំណើននៃការប្រើប្រាស់នវានុវត្តន៍ និងបច្ចេកវិទ្យា ដើម្បីកែលំអជីវភាពរបស់ប្រជាជន។ រដ្ឋមន្ត្រីបានកត់សម្គាល់ថា បណ្តាញទីក្រុងឆ្លាតរបស់អាស៊ាន គឺជាគំនិតផ្តួចផ្តើមដ៏សំខាន់មួយ ដែលអាចជាវេទិកាដើម្បីជួយគ្នាទៅវិញទៅមកដល់កិច្ចប្រឹងប្រែងអភិវឌ្ឍ ការចែករំលែកការអនុវត្តល្អៗ និងបង្កើតឱកាសថែមទៀតសម្រាប់កំណើននវានុវត្តន៍ ការកសាងសមត្ថភាព និងការអភិវឌ្ឍន៍ប្រកបដោយស្ថិរភាព និងបរិយាប័ន្ន។
ក្រៅពីការចូលរួមក្នុងកិច្ចប្រជុំរដ្ឋមន្ត្រីការបរទេសអាស៊ាន ក៏មានកិច្ចប្រជុំ៤ដោយឡែកផ្សេងទៀតស្តីពីយន្តការកិច្ចសហប្រតិបត្តិការមេគង្គ រួមមាន កិច្ចប្រជុំរដ្ឋមន្ត្រីការបរទេសមេគង្គ-គង្គា កិច្ចប្រជុំរដ្ឋមន្ត្រីការបរទេសមេគង្គ-សាធារណរដ្ឋកូរ៉េ លើកទី៨ កិច្ចប្រជុំរដ្ឋមន្ត្រីការបរទេសគំនិតផ្តួចផ្តើមមេគង្គក្រោមលើកទី១១ និងកិច្ចប្រជុំរដ្ឋមន្ត្រីការបរទេសមេគង្គ-ជប៉ុនលើកទី១១។
នៅឯប្រទេសសឹង្ហបុរី ក្រៅពីកិច្ចប្រជុំ លោកទេសរដ្ឋមន្ត្រី ក៏មានជំនួបទ្វេភាគីជាមួយរដ្ឋមន្ត្រី និងប្រធានគណប្រតិភូពីប្រទេសជាច្រើន រួមមាន រដ្ឋមន្ត្រីការបរទេសអូស្ត្រាលី រដ្ឋមន្ត្រីការបរទេសចិន រដ្ឋមន្ត្រីការបរទេសសាធារណរដ្ឋប្រជាមានិតប្រជាធិបតេយ្យកូរ៉េ អនុរដ្ឋមន្ត្រីការបរទេសឥណ្ឌា រដ្ឋមន្ត្រីការបរទេសឥណ្ឌូនេស៊ី រដ្ឋមន្ត្រីការបរទេសជប៉ុន រដ្ឋមន្ត្រីការបរទេសម៉ាឡេស៊ី រដ្ឋមន្ត្រីការបរទេសណូវែលហ្សេឡង់ រដ្ឋមន្ត្រីការបរទេសណ័រវែស្ស រដ្ឋមន្ត្រីការបរទេសសាធារណរដ្ឋកូរ៉េ រដ្ឋមន្ត្រីការបរទេសរុស្សី រដ្ឋមន្ត្រីការបរទេសស្រីលង្កា រដ្ឋមន្ត្រីការបរទេសទីម័រខាងកើត រដ្ឋមន្ត្រីការបរទេសថៃ និងរដ្ឋមន្ត្រីការបរទេសវៀតណាម។ កិច្ចប្រជុំទ្វេភាគីទាំងនេះ ផ្តោតសំខាន់លើការពង្រឹងចំណងទ្វេភាគី និងពិភាក្សាពីផលប្រយោជន៍ និងការព្រួយបារម្ភរួម៕
Source: Kampuchea Thmey Daily
0 Comments