យោងតាមវិបសាយផ្លូវការរបស់ក្លិបបាល់ទាត់ព្រះខ័នរាជស្វាយរៀង បានបញ្ជាក់ទស្សនៈរបស់លោក Conor Nestor គ្រូបង្វឹកប្រចាំក្លិបលើកឡើងជុំវិញបញ្ហាដែលក្រុមជួបប្រទះជាមួយនឹងការកាត់សេចក្តីពីសំណាក់អាជ្ញាកណ្ដាលក្នុងប្រកួតកន្លងមកក្នុងពានរង្វាន់លីគកំពូលកម្ពុជា Metfone Cambodian League 2018។
នៅក្រោយជំនួបបរាជ័យ ភ្នំពេញក្រោន ២ទល់១ ក្នុងសប្តាហ៍ទី១៦ នៃពានរង្វាន់លីគកំពូលកម្ពុជា រដូវកាល២០១៨ លោក Conor Nestor បានពេលថា «ខ្ញុំបានសន្យានឹងខ្លួនឯងថា មិននិយាយអំពីអាជ្ញាកណ្តាលក្នុងនាមជាគ្រូបង្វឹក។ ប៉ុន្តែបើសិនជាមើលប៉ុន្មានប្រកួតចុងក្រោយនេះយើងបានឃើញការកាត់សេចក្តីដោយរបូតគ្រាប់បាល់ពេលប៉ះ វិសាខា (គួរតែពិន័យដោយសារប៉ះទង្គិចអ្នកចាំទី), គួរតែកាតលឿង២ដងពេលជួបអង្គរថាយហ្គឺរ និងសប្តាហ៍មុនពេលជួបក្រសួងការពារជាតិ គួរតែមិនអីទេ ខណៈគ្រាប់តាមស្មើរបស់ភ្នំពេញក្រោន គឺជាកាត់សេចក្តីខុសម្តងទៀត។ អាជ្ញាកណ្តាលក៏ជាមនុស្សដែលយើងគិតថាសុទ្ធតែធ្លាប់មានកំហុសនិងធ្វើខុស ប៉ុន្តែយើងពិបាកនឹងទទួលយកដោយសារតែដល់ទៅ៥ប្រកួតជាប់គ្នា។ កីឡាកររបស់ខ្ញុំបានលេងនៅលើទីលាន ខណៈអាជ្ញាកណ្តាលទាត់បញ្ចូលទី៥គ្រាប់ពេលជួបយើង»។
គ្រូបង្វឹកជនជាតិអៀកឡង់រូបនេះបានបន្តថា «សហព័ន្ធកីឡាបាល់ទាត់កម្ពុជា (ស.ប.ក) មានចំណាត់ការខ្លាំងណាស់លើការដាក់ពិន័យកីឡាករ។ ខ្ញុំក៏ចង់អោយ ស.ប.ក ធ្វើការច្បាស់លាស់ជាមួយអាជ្ញាកណ្តាលដើម្បីកាត់សេចក្តីបានល្អ ពីព្រោះខ្ញុំក៏មិនដឹងនិយាយយ៉ាងណាជាមួយកីឡាកររបស់ខ្ញុំដោយពួកគេខិតខំប្រឹងប្រែងស្របពេលរៀងរាល់សប្តាហ៍អាជ្ញាកណ្តាលតែងតែទាត់បញ្ចូលទីពួកយើងមួយគ្រាប់»។
គ្រូបង្វឹកកាន់វ័យ៣៣ឆ្នាំរូបនេះបញ្ជាក់ទៀតថា «ខ្ញុំគិតថាបើសិនរឿងនេះកើតឡើង ១ រឺ ២លើក នេះគឺជាបាល់ទាត់។ ប៉ុន្តែនេះ៥ប្រកួតជាប់គ្នាមកលើពួកយើង។ បើសិនទៅមើលក្រុមផ្សេងលេងធាក់គ្នាគ្មានវីដេអូភស្តុតាងដើម្បីមើលនោះទេ ប៉ុន្តែបើសិនក្រុមយើងធ្វើខុសគឺមានវីដេអូដើម្បីពិនិត្យមើលឡើងវិញ» ក្រុមព្រះខ័នរាជស្វាយរៀង ទើបតែផ្លាស់ប្តូរគ្រូបង្វឹកកាលពីពេលថ្មីៗដោយចុះកិច្ចសន្យា១រដូវកាលជាមួយលោក Conor Nestor កាន់អាជ្ញាប័ណ្ណគ្រូបង្វឹកកម្រិត UEFA A License ជំនួសលោក សំ វ៉ាន់ដេត ដែលជាគ្រូចាស់គ្រោងនឹងបន្តរៀនវគ្គគ្រូបង្វឹក AFC “A” License។ ក្រុមនេះបានបញ្ចប់រដូវកាលចាស់របស់ខ្លួនដោយឈរចំណាត់ថ្នាក់លេខ៣ ប្រចាំពានរង្វាន់លីគកំពូលកម្ពុជា Metfone Cambodian League 2017 ដែលមានសមាជិក១២ក្រុម ហើយនៅក្នុងពានរង្វាន់សម្តេចតេជោ ហ៊ុន សែន វិញបានបញ្ចប់រដូវកាលរបស់ខ្លួនដោយគ្រងតំណែងជើងឯកតែម្តង។
ចំណែកប្រកួតសប្ដាហ៍ទី១៧ក្នុងពានរង្វាន់លីគកំពូលកម្ពុជា ឆ្នាំ២០១៨ វិញក្រុមព្រះខ័នរាជស្វាយរៀង នឹងត្រូវបន្តប្រកួតនៅចុងសប្ដាហ៍នេះដោយត្រូវអាស៊ីអឺរ៉ុប នៅវេលាម៉ោង៦និង០០នាទីរសៀលថ្ងៃសៅរ៍ ទី១១ ខែសីហា ឆ្នាំ២០១៨ លើទីលានកីឡដ្ឋានខេត្តស្វាយរៀង៕
Source: Kampuchea Thmey Daily
0 Comments