តារាបាល់ទាត់អន្តរជាតិរបស់ជប៉ុន និង ជាម្ចាស់ភាគហ៊ុនពាក់កណ្តាលរបស់ក្លិបបាល់ទាត់សូលទីឡូអង្គរ (Soltilo Angkor FC) របស់កម្ពុជា គឺ Keisuke Honda បានចុះកិច្ចសន្យាចូលរួមក្នុងក្រុមម្ចាស់ជើងឯកលីកកំពូលអូស្ដ្រាលី Melbourne Victory ក្រោយផុតកិច្ចសន្យាជាមួយក្លិប Pachuca សមាជិកលីគកំពូលប្រទេសម៉ិចស៊ីកូ។
បុរសវ័យ៣២ឆ្នាំរូបនេះ បានចុះកិច្ចសន្យារយៈពេល១ឆ្នាំជាមួយក្លិបថ្មីនៅប្រទេសអូស្ត្រាលី នៅព្រឹកថ្ងៃច័ន្ទ ដើមសប្ដាហ៍នេះ ខណៈរូបគេធ្លាប់បានរក៣៧គ្រាប់ និងលេងបាន៩៨ប្រកួតឲ្យជម្រើសជាតិជប៉ុន។ រូបគេបានចូលនិវត្តន៍ពីបាល់ទាត់ជម្រើសជាតិក្រោយ 2018 FIFA World Cup នៅប្រទេសរុស្ស៊ី ចប់នៅពេលក្រុមជម្រើសជាតិជប៉ុនធ្លាក់នៅវគ្គ១៦ក្រុមចុងក្រោយ។
ថ្លែងនៅក្នុងពិធីប្រកាសចុះកុងត្រាថ្មីរបស់ខ្លួន Honda បានលើកឡើងពីការប្តូរទ្រនំថា «ខ្ញុំរីករាយណាស់ ដែលបានចូលរួមជាមួយ Melbourne Victoty។ ពេលដែលខ្ញុំបានដឹងថា ពួកគេចាប់អារម្មណ៍ ខ្ញុំបន្ទាប់ពីចប់ World Cup មួយអាទិត្យ ខ្ញុំពិតជាចង់ប្រកួតប្រជែងអ្វីដែលថ្មី។ នោះហើយគឺជាខ្ញុំ។ ដូច្នេះខ្ញុំទទួលស្គាល់គ្រប់យ៉ាងហើយ ខ្ញុំពិតជាមិនអាចនឹងរង់ចាំការចូលលេងនៅពេលឆាប់ៗនេះទេ»។
កីឡាកររូបនេះមានជំនួញផ្សេងៗជាច្រើនក្រៅពីអាជីពបាល់ទាត់របស់ខ្លួន បូកទាំងងារជាប្រធានក្លិបបាល់ទាត់ទាំង៣ បូកទាំងក្លិបសូលទីឡូអង្គរ សមាជិកពានរង្វាន់លីគកំពូលនៅកម្ពុជា ផងដែរ។ គេក៏មានសាលាបាល់ទាត់បង្ហាត់គិតថ្លៃផងដែរ។ យ៉ាងណាក្តីទោះបីជាមានអាជីវកម្មផ្សេងក៏ដោយតែគេនៅមិនទាន់នឿយណាយពីអាជីពបាល់ទាត់នោះទេ ស្របពេលអាយុរបស់ខ្លួនក៏កាន់តែជ្រេណាស់ទៅហើយ។
កីឡាករ Keisuke Honda បានចាប់អាជីពបាល់ទាត់ដំបូងនៅក្នុងក្លិប Nagoya Grampus ក្នុងប្រទេសកំណើតរបស់ខ្លួនចាប់ពីឆ្នាំ ២០០៤ ដល់២០០៧ ស្របពេលនៅឆ្នាំ២០០៧ ដល់២០០៩ ផ្លាស់ទៅលេងក្នុងក្លិប VVV-Venlo ក្នុងប្រទេសហុល្លង់ ហើយ នៅឆ្នាំ ២០០៩ ដល់ ២០១៣ បានផ្លាស់ទៅកាន់ក្លិប CSKA Moscow របស់ប្រទេសរុស្សី មុនផ្លាស់ទៅកាន់ AC Milan របស់អ៊ីតាលី នៅចាប់ពីឆ្នាំ ២០១៤ ដល់ឆ្នាំ២០១៦ ខណៈរដូវកាល២០១៧នេះប្តូរទៅលេងនៅក្លិប Pachuca លីគកំពូលប្រទេសម៉ិចស៊ីកូ។
បើនិយាយពីក្នុងឈុតជម្រើសជាតិវិញ Honda បានជាប់ក្នុងឈុតអាយុក្រោម២០ ឆ្នាំ (U-20) កាលពីឆ្នាំ២០០៥ ហើយចាប់ពីឆ្នាំ២០០៦ ដល់២០០៨ បានចូលរួមជាមួយក្រុម U-23 ជប៉ុន និងចាប់ពីឆ្នាំ ២០០៨ ដល់បច្ចុប្បន្នជាប់ក្នុងជម្រើសជាតិជប៉ុនឈុតធំ។ ក្នុងនោះគេធ្លាប់ទទួលបានពានរង្វាន់ឯកត្តជនជាច្រើនទាំងក្នុងប្រទេស ប្រចាំតំបន់ទ្វីបអាស៊ី និងកម្រិតពិភពលោកផងដែរ៕
Source: Kampuchea Thmey Daily
0 Comments