ភ្នំពេញ ៖ ជាការពិតណាស់អំឡុងមួយរយៈពេលចុងក្រោយនេះ ត្រូវបានគេកត់សម្គាល់ឃើញថាមានតារាសិល្បៈប្រុស-ស្រីរួមនឹងប្រជាពលរដ្ឋខ្មែរជាច្រើន បាននាំគ្នាងាកមកចាប់អារម្មណ៍អំពីបញ្ហាល្ខោនខោលរបស់ខ្មែរ ដែលត្រូវបានភាគីប្រទេសថៃមានចេតនាចង់យកធ្វើជាសម្បត្តិវប្បធម៌របស់ខ្លួន ដោយគ្មានភាពអៀនខ្មាស។ ទន្ទឹមគ្នានេះ ក៏មានការប្រកាសដោយទទូចស្នើឲ្យប្រជាជនខ្មែរទូទាំងប្រទេសចូលរួមគាំទ្រ និងអភិរក្សសិល្បៈល្ខោនខោលរបស់ខ្មែរទៀតផង។
មិនខុសគ្នាពីអ្នកសិល្បៈនិងប្រជាជនខ្មែរឯទៀតនោះទេងាកមកមើលតារាចម្រៀងរ៉េបឌីជេអាចារ្យ ធំ ឯណោះវិញជារឿយៗលោកតែងតែចេញមុខឈឺឆ្អាល និងប្រតិកម្មភ្លាមៗលើករណីដែលប្រទេសថៃបង្ហាញពីចេតនាចង់ក្រសោបយកសិល្បៈល្ខោនខោលរបស់ខ្មែរធ្វើជារបស់ខ្លួន។ មិនតែប៉ុណ្ណោះកន្លងមកអាចារ្យ ធំ តែងតែចេញមុខបំផុសនិងអំពាវនាវឲ្យកូនខ្មែរគ្រប់ត្រូវតែចូលរួមគាំទ្រអភិរក្សល្ខោនខោលព្រោះជាសម្បត្តិវប្បធម៌ជាតិខ្មែរ។
ជាក់ស្តែងភ្លាមៗនេះដែរ តារាចម្រៀងរ៉េបអាចារ្យ ធំ បានបញ្ចេញសំណេរសរសេរបង្កើតជាកំណាព្យលើកនិយាយពីល្ខោនខោលខ្មែរ ដែលមានអត្ថន័យបែបនេះថា ស្ដេចស្វាអួតអង្គ ប្រែបង់អំណាច ទោះមុខធ្លាប់កាច ខ្លាចត្រូវមរណា ផ្អាកឈប់ជម្លោះ ព្រោះថ្ងៃអន្សា ពួតដៃសិនណា រួមការពារថែ។ជង្គង់លង់លុត ធ្លាក់ស្រុតតេជះ លើកហត្ថសំពះ យំដាស់កូនខ្មែរ កុំចោលខោលជាតិ ត្រូវឃ្មាតកុំល្ហែ កុំប្រែត្រូវព្រួយ ជួយខោលឲ្យបាន។
មិនថោកនឹងសុំ ឲ្យតែខ្ញុំរស់ ព្រោះខ្លាចព្រាត់កាយ ឃ្លាតឆ្ងាយចោលឋាន ស៊ូយំក្នុងខ្មុក អួលចុកក្នុងប្រាណ ខ្លាចខានបានឃើញ! ចោលអង្គរ ដី។ បើខ្ញុំនាំគ្រោះ ព្រោះគិតថាថោក សូមពេលខ្ញុំក្រោក គ្រប់ខ្មែរប្រុសស្រី តាំងចិត្តកុំខឹង ប្រឹងមកពួតដៃ ទប់ថៃឲ្យក្លា! ណាខ្មែរទាំងឡាយ។ កុំចាំខោលបាត់ បានមកឈឺចាប់ កុំចាំខោលស្លាប់ បានទួញយំស្ដាយ កុំចាំគេយក បានមកខ្វល់ខ្វាយ កុំចាំអន្តរាយ ពោលស្ដាយតែមាត់។
បន្ថែមពីលើកំណាព្យខាងលើនេះតារាចម្រៀងដែលក្នុងខ្លួនពោរពេញដោយសាក់និងរូបយ័ន្តអាចារ្យ ធំ បានលើកឡើងថា សូមថែរក្សាពួកយើងផង ពួកយើងមិនចង់ឃ្លាតឆ្ងាយពីអ្នកទេ។ល្ខោនខោលគឺជារបស់កម្ពុជា។តាមរយៈការបញ្ចេញសំណេរសរសេរកំណាព្យរបស់ឌីជេអាចារ្យធំរៀបរាប់បំផុសស្មារតីកូនខ្មែរឲ្យនាំគ្នាចូលរួមគាំទ្រនិងថែរក្សាល្ខោនខោលនេះដែរគឺមានទស្សនិកជនជាច្រើនបានសម្តែងការគាំទ្រនិងចែករំលែកបន្តយ៉ាងព្រោងព្រាតនៅលើបណ្តាញសង្គម៕
Source: Kampuchea Thmey Daily
0 Comments