ការរញ្ជួយដីដ៏ខ្លាំងក្លាមួយកម្រិត៦.៦រ៉ិចទ័រ បានរញ្ជួយនៅកោះហុកកៃដូ របស់ប្រទេសជប៉ុនកាលពីថ្ងៃព្រហស្បតិ៍ដោយបានសម្លាប់មនុស្សយ៉ាងតិច៨នាក់ និងធ្វើឲ្យផ្ទះដួលរលំហើយបង្កឲ្យមានការបាក់ដីដែលបានបន្សល់ទុកមនុស្សរាប់សិបនាក់ទៀតបាត់ខ្លួន។
ការបាក់ដីទ្រង់ទ្រាយធំជាច្រើនបានវាយប្រហារតំបន់ជនបទដែលមានប្រជាជនជនច្រើន។ ទីនោះក៏ជាកន្លែងដែលរងគ្រោះដោយព្យុះទីហ្វុងដ៏មានឥទ្ធិពលមួយដែលបានបោកបក់កាត់ប្រទេសជប៉ុនកាលពីដើមសប្ដាហ៍នេះផងដែរ។
លំនៅដ្ឋានប្រហែល៣លានខ្នងបានបាត់បង់អគ្គិសនីបន្ទាប់ពីការរញ្ជួយដីបានធ្វើឲ្យខូចខាតរោងចក្រថាមពលដ៏ធំមួយដែលផ្គត់ផ្គង់ដល់តំបន់នេះ។
បន្ទាប់ពីការរញ្ជួយដីលើកដំបូង ការរញ្ជួយដីមួយដែលមានរង្វាស់៥.៣រ៉ិចទ័របានធ្វើឲ្យរញ្ជួយតំបន់នេះហើយមានការរញ្ជួយដីជាច្រើនទៀតបានកើតឡើងពេញមួយយប់និងឆ្លងដល់ព្រឹក។
ទោះបីជាយ៉ាងណាក៏ដោយ គ្មានការប្រកាសអាសន្នពីរលកយក្សស៊ូណាមិទេបន្ទាប់ពីការរញ្ជួយដីជម្រៅរាក់ដែលបានវាយប្រហារចម្ងាយ៦២គីឡូម៉ែត្រភាគអាគ្នេយ៍នៃទីក្រុង Sapporo ។
អ្នកនាំពាក្យរដ្ឋាភិបាលលោក Yoshihide Suga បាននិយាយថា កម្មករសង្គ្រោះប្រហែល២០,០០០នាក់រួមទាំងប៉ូលិសនិងសមាជិកនៃកងកម្លាំងស្វ័យការពារ (SDF) ផងដែរគឺកំពុងឆ្លើយតបទៅនឹងគ្រោះមហន្តរាយនេះ។ កងទ័ព SDF ប្រមាណ២០,០០០នាក់ផ្សេងទៀតត្រូវបានគេរំពឹងថានឹងចូលរួមក្នុងកិច្ចខិតខំប្រឹងប្រែងនេះ។
លោកនាយករដ្ឋមន្ត្រី Shinzo Abe បាននិយាយបន្ទាប់ពីកិច្ចប្រជុំគណៈរដ្ឋមន្ត្រីគ្រាជាបន្ទាប់មួយថា “យើងនឹងប្រឹងប្រែងឲ្យអស់ពីសមត្ថភាពដើម្បីសង្គ្រោះជីវិត”។
ទូរទស្សន៍ NHK បានរាយការណ៍ថា មនុស្សចំនួន៨នាក់បានស្លាប់ដោយ៦នាក់ក្នុងចំណោមនេះគឺបានស្លាប់នៅក្នុងភូមិ Atsuma ដែលជាកន្លែងបំណាក់ដីបានលេបត្របាក់លំនៅដ្ឋាន។ NHK បានបន្ថែមថា មនុស្សជិត៤០នាក់នៅតែបាត់ខ្លួន។
ប្រព័ន្ធផ្សព្វផ្សាយក្នុងស្រុកបានរាយការណ៍ថា អ្នកស្លាប់ក៏រួមមានទាំងលោកតាអាយុ៨២ឆ្នាំម្នាក់ផងដែរដែលបានធ្លាក់ចុះពីជណ្តើរនៅផ្ទះរបស់គាត់ក្នុងអំឡុងពេលនៃការរញ្ជួយដីហើយមនុស្សប្រហែល១៣០នាក់បានរងរបួសស្រាល៕ AFP
Source: Kampuchea Thmey Daily
0 Comments