កាលពីថ្ងៃសុក្រ ប្រទេសចិននិងរុស្ស៊ីបានថ្កោលទោសចំពោះការប្រើ “ការគំរាមកំហែង” នៅក្នុងការព្រមានដល់លោកប្រធានាធិបតី ដូណាល់ ត្រាំ ដែលនេះបានគូសបញ្ជាក់អំពីជម្លោះរវាងសហរដ្ឋអាមេរិកនិងគូប្រជែងរបស់ខ្លួនលើបញ្ហានានារាប់ចាប់ពីវិស័យពាណិជ្ជកម្មរហូតដល់សង្គ្រាមនៅក្នុងប្រទេសស៊ីរី។
ប៉ុន្មានថ្ងៃបន្ទាប់ពីលោក ត្រាំ បានដាក់ពន្ធចំនួន២០០ពាន់លានដុល្លារនិងបានប្តេជ្ញាថានឹងបន្តរហូតដល់ប្រទេសចិនបន្ទន់ឥរិយាបថ, រដ្ឋមន្ត្រីក្រសួងការបរទេសចិន លោក វ៉ាង យី បានប្រាប់មហាសន្និបាតអង្គការសហប្រជាជាតិថា ក្រុងប៉េកាំងនឹងមិនឱនក្បាលទេ។
លោក វ៉ាង បានប្រាប់អង្គប្រជុំស្របពេលសង្គ្រាមពាណិជ្ជកម្មរវាងក្រុងវ៉ាស៊ីនតោននិងក្រុងប៉េកាំងកើនឡើងខ្លាំងថា “ប្រទេសចិននឹងមិនត្រូវបានគំរាមកំហែងឬទទួលរងសម្ពាធនោះទេ”។
ចំណែករដ្ឋមន្ត្រីក្រសួងការបរទេសរបស់រុស្ស៊ីបានថ្កោលទោសប្រទេសនានាដែលប្រើការគំរាមកំហែងនយោបាយ ការគាបសង្កាប់សេដ្ឋកិច្ចនិងកម្លាំងទុច្ចរិតក្នុងគោលបំណងដើម្បីទប់ស្កាត់ការលេចឡើងនៃមហាអំណាចសកល។
លោក ត្រាំ បានបង្កើតទំនាក់ទំនងតឹងរ៉ឹងជាមួយប្រធានាធិបតីចិនលោក ស៊ី ជីនពីង បន្ទាប់ពីជ័យជំនះនៃការបោះឆ្នោតទាំងមិនបានរំពឹងទុកប៉ុន្តែជារឿយៗគាត់ត្រូវតែប្រយុទ្ធប្រឆាំងនឹងការចោទប្រកាន់ដែលថា គាត់ទន់ខ្សោយពេកចំពោះសមភាគីរុស្ស៊ីគឺលោក វ្ល៉ាឌីមៀរ ពូទីន។
យ៉ាងណាក៏ដោយ ទំនាក់ទំនងរវាងក្រុងវ៉ាស៊ីនតោនទាំងជាមួយទីក្រុងប៉េកាំងនិងមូស្គូបានធ្លាក់ចុះយ៉ាងខ្លាំងក្នុងរយៈពេលប៉ុន្មានខែថ្មីៗនេះហើយមហាសន្និបាតប្រចាំឆ្នាំធំជាងគេបំផុតរបស់ពិភពលោកនេះបានធ្វើឲ្យមានការបែកបាក់ស៊ីជម្រៅចាប់តាំងពីវាបើកកាលពីថ្ងៃអង្គារមក។
លោកវ៉ាងបានព្យាយាមច្រានចោលការលេងល្បែងដែលមានភាពតានតឹងរវាងប្រទេសធំទាំង ពីរនិងបានទទូចថា ប្រទេសចិនមិនមានមហិច្ឆតាដើម្បីជំនួសសហរដ្ឋអាមេរិកធ្វើជាមហាអំណាចឈានមុខគេរបស់ពិភពលោកឡើយ។
លោកវ៉ាងបាននិយាយនៅក្នុងសុន្ទរកថាដាច់ដោយឡែកមួយទៅកាន់ក្រុមអ្នកយកព័ត៌មាននៅទីក្រុងញូវយ៉កថា “ភាពចលាចលផ្សេងៗអាចកើតមានឡើងហើយនេះមិនមែនជារឿងគួរឲ្យភ្ញាក់ផ្អើលនោះទេហើយវាក៏មិនបង្កឲ្យមានការភ័យស្លន់ស្លោផងដែរ”។
លោក ត្រាំ នៅសប្តាហ៍នេះបាននិយាយថា មិត្តភាពរបស់គាត់ជាមួយលោក ស៊ី អាចនឹងត្រូវបញ្ចប់ហើយបានចោទប្រកាន់ប្រទេសចិនពីការជ្រៀតជ្រែកក្នុងការបោះឆ្នោតពាក់កណ្តាលអាណត្តិរបស់អាមេរិកដើម្បីដាក់ទណ្ឌកម្មគាត់ចំពោះជំហរពាណិជ្ជកម្មដ៏តឹងតែងរបស់គាត់៕ AFP
Source: Kampuchea Thmey Daily
0 Comments