សៀមរាប ៖ ជនរងគ្រោះចំនួន២គ្រួសារ រស់នៅភូមិបណ្ដែតទឹកចុងឃ្នៀស សង្កាត់ចុងឃ្នៀសក្រុងសៀមរាប បានសម្រេចចិត្តដាក់ពាក្យប្តឹងពីឈ្មោះវេង ហ៊ាង ដែលបាននាំគ្នាមកយកទូកប៉ាឡាចំនួន៥គ្រឿងទាំងកំរោលដោយមិនមានលិខិតស្នាមត្រឹមត្រូវ។
ស្ត្រីជនរងគ្រោះឈ្មោះដូ ធីផឹង រស់នៅភូមិបណ្ដែតទឹកចុងឃ្នៀស សង្កាត់ចុងឃ្នៀសក្រុងសៀមរាបបានឲ្យដឹងថា នៅវេលាម៉ោង ១៥ និង០០នាទីថ្ងៃទី២៧ខែកញ្ញា នេះឈ្មោះវេងហ៊ាង បាននាំកម្មករ និង ប៉ូលិសមកយកទូករបស់គាត់អស់ចំនួន៤គ្រឿងដោយមិនមានលិខិតពីតុលាការនោះទេ។
នៅពេលនោះ គាត់កើតទុកមិនសុខចិត្ត ក៏បានប្រទាញប្រទង់គ្នាជាមួយកម្មករលោកវេង ហ៊ាង រហូតដល់កូនស្រីគាត់មានរបួសស្នាម។ ស្ត្រីដដែលបន្តថា កន្លងទៅ គាត់ធ្លាប់ជំពាក់លុយឈ្មោះ លោកវេង ហ៊ាង នោះដែរតែគាត់បានសងវិញរួចអស់ហើយ។ តែមិនដឹងហេតុអីបានជាគាត់មកយកទូកនិងប៉ាឡា របស់គាត់ចឹងសោះ។
ស្ត្រីដដែលបន្តថា ករណីនេះគាត់បានរកមេធាវីនិង បានដាក់ពាក្យប្ដឹងឈ្មោះវេង ហ៊ាង ចូលទៅ ព្រះរាជអាជ្ញាអមសាលាដំបូងខេត្តសៀមរាប និងសូមព្រះរាជអាជ្ញា ផ្ដន្ទាទោសពីរនាក់ប្ដីប្រពន្ធ តាមច្បាប់ និងទាមទារសំណងជំងឺចិត្ត ៥០០០ដុល្លារអាមេរិក និងសុំយកទូកមកវិញ។
ចំណែកជនរងគ្រោះម្នាក់ទៀត មានឈ្មោះ ដូ យាំង ប៊ិន ភេទប្រុស អាយុ២២ឆ្នាំ រស់នៅភូមិឃុំជាមួយគ្នាដែរ បានឲ្យដឹងថា គាត់មិនដែលជំពាក់លុយឈ្មោះវេង ហ៊ាង ហ្នឹងនោះទេ តែបើឪពុកគាត់ធ្លាប់ជំពាក់ខ្លះ ហើយលុយនោះគឺឪពុកគាត់រ៉ាប់សងវិញ។ ប៉ុន្តែឈ្មោះហ៊ាង ចង់ទាមទារយកច្រើនលើសកំណត់ ទើបមានការប្តឹងផ្តល់គ្នាដល់តុលាការបែបនេះ។ ហើយលោកហ៊ាង បានលើកគ្នាមកយកប៉ាឡាធំមួយរបស់គាត់ដែរ ដោយមិនមានលិខិតស្នាមត្រឹមត្រូវសោះឡើយ។ ករណីនេះគាត់បានរកមេធាវីនិង បានដាក់ពាក្យប្ដឹងឈ្មោះវេងហ៊ាង ចូលទៅ ព្រះរាជអាជ្ញាអមសាលាដំបូងខេត្តសៀមរាប និងសូមព្រះរាជអាជ្ញា ផ្ដន្ទាទោសពីរអ្នកប្ដីប្រពន្ធ តាមច្បាប់ និងទាមទារសំណងជំងឺចិត្ត ៥០០០ដុល្លារអាមេរិក និងសុំយកទូកមកវិញ។
យ៉ាងនេះក្តី លោកខៀវ សុផល មេធាវី ការពារក្តីឲ្យជនរងគ្រោះបានឲ្យដឹងនៅរសៀលថ្ងៃទី២៨ខែកញ្ញា នេះថាករណីនេះលោកបានរៀបចំពាក្យបណ្តឹងរួចហើយ ដោយបានប្តឹងពីឈ្មោះ វេង ហ៊ាង និងបក្ខពួកពីបទ កំហែងយក និងបំផ្លិចបំផ្លាញទ្រព្យសម្បត្តិអ្នកដទៃ។
ទាក់ទិននិងករណីនេះដែរ លោកវេង ហ៊ាង មិនអាចសុំការពន្យល់ពីគាត់បានទេនៅរសៀលថ្ងៃទី២៨ខែកញ្ញា នេះដោយហៅទូរស័ព្ទទៅលោកមិនចូល( ក្រៅតំបន់សេវា)។ ករណីនេះពលរដ្ឋបានសំណូមពរទៅតុលាការខេត្តសៀមរាប ជួយរកយុត្តិធម៌ ឲ្យពួកគាត់ផង ព្រោះពួកគាត់គឺជាជនរងគ្រោះ៕
Source: Kampuchea Thmey Daily
0 Comments