បុរស​បរទេស​ម្នាក់​ដេក​ស្លាប់ ក្នុង​វីឡា វឌ្ឍនៈ តារា​អង្គរ​បង្ក​ការ​ភ្ញាក់ផ្អើល​នៅ​ក្រុង​សៀមរាប

សៀមរាប​ ៖​ មានការ​ភ្ញាក់ផ្អើល​មួយ​ដោយ​បុរស​ជនជាតិ​កូរ៉េ​ម្នាក់​បាន​ដេក​ស្លាប់​នៅក្នុង​វីឡា វឌ្ឍនៈ​តារា​អង្គរ ហើយ​សមត្ថកិច្ច​បាន​ឲ្យ​ដឹងថា​ ជនរងគ្រោះ​ស្លាប់​ដោយសារ​ដាច់​សរសៃឈាម​ហូរ​ចូលក្នុង​ក្រពះ​។



សមត្ថកិច្ច​បាន​ឲ្យ​ដឹង​ថា ហេតុការណ៍​នេះ​បាន​កើត​ឡើង វេលា​ម៉ោង​ប្រមាណ​ជា ៤​ទៀបភ្លឺ​ថ្ងៃទី ២៨ ខែ កញ្ញា ឆ្នាំ ២០១៨ នៅ​ចំណុច​បន្ទប់​Penthouse១ វីឡា វឌ្ឍនៈ​តារា​អង្គរ ស្ថិតនៅ​ភូមិ សាលា​កន្សែង សង្កាត់​ស្វាយដង្គំ ក្រុង​សៀមរាប​។​សមត្ថកិច្ច​បន្ត​ថា​ ជន​រងគ្រោះ​ឈ្មោះ LEE DONGKEUN ភេទ ប្រុស អាយុ​៣៧​ឆ្នាំ ជនជាតិ​កូរ៉េខាងត្បូង កាន់​លិខិតឆ្លងដែន​លេខ​M០១៣៤១៩៩៩ មុខរបរ បុគ្គលិក​ក្រុមហ៊ុន​ទេសចរណ៍ SK ស្នាក់នៅ​ទីតាំង​ខាងលើ​។



ប្រភព​បន្ត​ថា ផ្អែក​តាម​ការ ស្រាវជ្រាវ របស់​សមត្ថកិច្ច​ជំនាញ​និង​លោក​វេជ្ជបណ្ឌិត អ៊ិត ឆប​រ័ត្ន គ្រូពេទ្យ​អម​តុលាការ​បាន​សន្និដ្ឋាន​ថា ជនរងគ្រោះ​ស្លាប់​ដោយ​ដាច់​សរសៃឈាម​ហូរ​ចូលក្នុង​ក្រពះ​។ សាកសព​ត្រូវ​បានប្រគល់​ឲ្យ​ឈ្មោះ YU YOONJONG ភេទ ស្រី អាយុ ៣៧​ឆ្នាំ ជនជាតិ កូរ៉េ កាន់​លិខិតឆ្លងដែន​លេខ​M២៦១៥៥៦៩៤ ត្រូវជា​ប្រពន្ធ​ជនរងគ្រោះ​យកទៅ​រៀបចំ​ធ្វើបុណ្យ​នៅ​មន្ទីរពេទ្យបង្អែក​ខេត្តសៀមរាប​តាម​សំណូមពរ​របស់​ស្ថានទូត​៕

Source: Kampuchea Thmey Daily