ក្រុមអគ្គីសនីកម្ពុជា បានបង្ហាញក្នុងការបន្ដប្រើប្រាស់ធនធានកីឡាករក្នុងស្រុក សម្រាប់ផែនការយុទ្ធសាស្ដ្ររយៈពេលវែងរបស់ខ្លួន បើទោះបីជារដូវកាលនេះ ក្រុមដែលមានស្ថាប័នរដ្ឋនៅពីក្រោយខ្នងនេះបានអស់ឱកាសដណ្ដើមចំណាត់ថ្នាក់ល្អទាំងពានរង្វាន់សម្ដេចតេជោ ហ៊ុន សែន និងលីគកំពូលកម្ពុជាក៏ដោយ។
ដោយឃើញស្ថានភាពបែបនេះក្លិបបានដាក់គម្រោងបង្កើនការអភិវឌ្ឍន៍ផ្នែកយុវជនឲ្យកាន់តែខ្លាំងក្នុងយុទ្ធសាស្ដ្ររយៈពេល៥ឆ្នាំ ដើម្បីស៊ីហ្គេម នាឆ្នាំ២០២៣ ទៀតផង។ លោក ប្រាក់ វុទ្ធី ធ្លាប់គ្រូបង្វឹកក្រុមអគ្គីសនីកម្ពុជា បានលើកឡើងថា សម្រាប់រដូវកាលនេះ គឺហួសពេលហើយ មិនថាពានសម្ដេចតេជោ ឬលីគទេ តែសំខាន់ក្រុមលោកត្រូវការខំប្រឹងបន្ដ ដើម្បីរក្សាបានឲ្យកៅអីលីគកំពូលកម្ពុជា នាឆ្នាំ២០១៩ ។
លោកបានបន្តថា ថ្នាក់ដឹកនាំអគ្គិសនីកម្ពុជា នឹងមានផែនការបន្ថែមទៀត តែលោកជឿជាក់ថា នឹងមានការនាំយកកីឡាករបរទេសមកពង្រឹងក្រុមឡើយ ពោលគឺរក្សាជំហរប្រើប្រាស់កីឡាករក្នុងស្រុកដដែល ពិសេសគឺការពង្រឹងផ្នែកយុវជនតែម្ដង។ លោកគ្រូបង្វឹករូបនេះបានបន្ថែមថា «ឥលូវនេះយើងងាកមកចាប់អារម្មណ៍យុទ្ធសាស្ដ្រ ៥ឆ្នាំទៅមុខរបស់យើង ដោយផ្ដោតលើការអភិវឌ្ឍន៍យុវជន បានន័យថា យើងអភិវឌ្ឍន៍ពី U17 ទៅ ដែលជាការអភិវឌ្ឍន៍មួយ ឆ្ពោះទៅសម្រេចគោលដៅឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះស៊ីហ្គេម លើកទី៣២។
យ៉ាងហោចណាស់មើលសិនក្រុមយើងបានតែម្នាក់ សម្រាប់ក្រុមជម្រើសជាតិ នាកីឡាស៊ីហ្គេម ឆ្នាំ២០២៣ វាគឺជាជោគជ័យរបស់យើងដែរ»។
បច្ចុប្បន្នក្លិបមួយនេះបានត្រៀមរៀបចំកីឡដ្ឋានផ្ទាល់ខ្លួននៅម្ដុំទួលសង្កែ ក្នុងរាជធានីភ្នំពេញ។ ឆ្លងកាត់ការប្រកួត១៩លើកក្នុងចំណោម២២លើកក្នុងពានរង្វាន់លីគកំពូលកម្ពុជា ក្រុមអគ្គីសនីកម្ពុជា បានប្រកួតឈ្នះតែ២លើកហើយស្មើគ្នា៣លើកនិងចាញ់១៤លើកមាន៥ពិន្ទុប៉ុណ្ណោះដោយឈរលេខរៀងទី១១ ពោលគឺនៅពីលើក្រុមបាតតារាងវេស្ទើនភ្នំពេញ ដែលមានតែ៨ពិន្ទុក្នុងដៃ។ កន្លងមកក្លិបមួយនេះ ធ្លាប់បានដាក់គោលដៅ និងប្រជែងយកពាននៅឆ្នាំ២០២០ ខាងមុខ៕
Source: Kampuchea Thmey Daily
0 Comments