ខ្សែបម្រើ ជ័យ ចិត្រា មកពីក្រុមអគ្គស្នងការដ្ឋាននគរបាលជាតិ សមាជិកក្នុងលីគកំពូលកម្ពុជា Metfone Cambodian League 2018 បានអះអាងថាខ្លួនរីករាយចំពោះការកោះហៅចូលក្រុមបាល់ទាត់ជម្រើសជាតិកម្ពុជា ត្រៀមជំនួបមិត្តភាពអន្តរជាតិជាមួយម៉ាឡេស៊ី នៅថ្ងៃទី១០ ខែកញ្ញា ខាងមុខ ហើយថានេះជាក្ដីស្រមៃរបស់ខ្លួនតាំងពីតូចមកផងដែរ។
អតីតកីឡាករវេស្ទើនភ្នំពេញនិងក្រសួងការពារជាតិ រូបនេះបានលើកឡើងថា «ខ្ញុំសប្បាយចិត្តណាស់ពេលឮដំណឹងដ៏ភ្ញាក់ផ្អើលនេះ។ កាលពីមុនគិតដែរតើ គិតថា អាចមានឱកាសជាប់ជម្រើសជាតិ។ ការលេងរបស់យើងអាចអភិវឌ្ឍជាងមុន ហើយលេងបានត្រឹមត្រូវ អ៊ីចឹងប្រហែលគេមើលឃើញបែបហ្នឹង ទើបមានឱកាសជាប់ជម្រើសជាតិ។ ខ្ញុំប្ដេជ្ញានឹងខិតខំអស់ពីចិត្តពីកាយ១០០ភាគរយអភិវឌ្ឍខ្លួនឲ្យកាន់តែល្អ»។
គេចាំបានថា កីឡាករ ចិត្រា មានកំណើតនៅខេត្តតាកែវ តែធំធាត់នៅស្រុកម៉ាឡៃ ខេត្តបន្ទាយមានជ័យ ហើយទទួលបានអាហារូបករណ៍រៀនសូត្រនិងហាត់បាល់ទាត់នៅប្រទេសថៃ នៅថ្នាលយុវជនក្លិប Suphanburi (សមាជិកលីគកំពូលប្រទេសថៃ)។ រូបគេបានមកប្រឡូកអាជីពបាល់ទាត់នៅកម្ពុជា ក្នុងឆ្នាំ២០១៤ ដោយចូលរួមវេស្ទើនភ្នំពេញ មុនទៅភ្នំពេញក្រោនក្នុងឆ្នាំ២០១៥ រួចត្រលប់ទៅថៃក្នុងឆ្នាំ២០១៦ និងលេងឲ្យការពារជាតិនៅឆ្នាំ២០១៧។
កីឡាករ Keisuke Honda ជាអ្នកចាត់ការទូទៅក្រុមជម្រើសជាតិកម្ពុជា បានកោះហៅកីឡាករ២៣នាក់កាលពីពេលថ្មីៗបូកទាំងកីឡាករ ជ័យ ចិត្រា ផងដែរ។ ការកោះហៅកីឡាករជម្រើសជាតិលើកនេះដើម្បីប្រកួតមិត្តភាពអន្តរជាតិរវាងកម្ពុជា ជាមួយម៉ាឡេស៊ី នៅវេលាម៉ោង៦និង៣០ល្ងាច ក្នុងថ្ងៃទី១០ ខែកញ្ញា ឆ្នាំ២០១៨ លើទីលានពហុកីឡដ្ឋានជាតិ ក្នុងរាជធានីភ្នំពេញ។ ប្រកួតនេះមានផ្សាយផ្ទាល់តាមប៉ុស្តិ៍ទូរទស្សន៍ BTV News ផងដែរ៕
Source: Kampuchea Thmey Daily
0 Comments