រតនៈ ពិសី ចំអកឲ្យលោក ថៃ នរៈសន្យា និងទាមទាររកយុត្តិធម៌ក្រោយរងការព្រមាន

ភ្នំពេញ ៖ បែរជាមិនញញើតឬខ្លាចរអាចំពោះការចេញលិខិតព្រមានពីក្រសួងវប្បធម៌ និងវិចិត្រសិល្បៈ ដែលចុះហត្ថលេខាដោយលោក ថៃ នរៈសន្យា រដ្ឋលេខាធិការក្រសួងក្រសួងវប្បធម៌និងវិចិត្រសិល្បៈ តារាចម្រៀងស្រីសម្បូរសាច់ដើមទ្រូងកញ្ញា រតនៈ ពិសី ថ្មីៗនេះ ស្រាប់តែបញ្ចេញប្រតិកម្មហាក់មានចេតនាសើចចំអក និងស្រែកទាមទាររកយុត្តិធម៌ឡើងវិញ។

ចំពោះការចេញមុខប្រតិកម្មបញ្ចេញសារហាក់មានបំណងផ្លែផ្កា និងចំអកឲ្យលោក ថៃ នរៈសន្យា រដ្ឋលេខាធិការក្រសួងក្រសួងវប្បធម៌និងវិចិត្រសិល្បៈរបស់កញ្ញា រតនៈ ពិសី ខាងលើនេះ បន្ទាប់ពីមានការចុះផ្សាយនិងបែកធ្លាយនូវរូបភាពសិចស៊ីរបស់នារីរូបស្រស់ម្នាក់មានឈ្មោះថៃនារីសុជាតា ដែលត្រូវបានគេស្គាល់ថាត្រូវជាកូនស្រីបង្កើតលោក ថៃ រនៈសន្យា ខណៈនាងចាត់ទុកថាចេញលិខិតព្រមានគេ តែកូនវិញសិចស៊ីមិនចាញ់ខ្លួនប៉ុន្មានឡើយ។

តារាចម្រៀងកញ្ញា រតនៈ ពិសី បានលើកឡើងរិះគន់សំដៅលោក ថៃ នរៈសន្យា បែបនេះ ថា ស្ដោះលើទ្រូងឯងកំហុសអ្នកណា ... មិនតូចចិត្តទេ ...។ តែសូមបងប្អូនពិចារណាតាមការគួរ... ព័ត៌មានផ្ដេសផ្ដាស ចុះបានបន្តិចលុបចោល។ ចុះ ចុះ រឿងពិតផង កុំកាត់ត អញ្ចឹងសុំម្នាក់មួយម៉ាត់ ម៉ោរកយុត្តិធម៌ឲ្យកូនស្រីគាត់ផង។

ផ្អែកតាមការបញ្ចេញសាររបស់តារាស្រីកញ្ញា រតនៈ ពិសី ដោយមានភ្ជាប់មកជាមួយរូបភាពផងនោះត្រូវបានទស្សនិកជនជាច្រើនយល់ឃើញថា នាងធ្វើនេះគឺក្នុងន័យចង់រិះគន់វាយបកទៅកាន់លោក ថៃ នរៈសន្យា ដែលកន្លងមកធ្លាប់ បានចេញលិខិតព្រមានតារាប្រុស-ស្រីចំនួន៤រូប ដោយក្នុងនោះក៏មាននាងម្នាក់ផងដែរ ស្ថិតលើបញ្ជីខ្មៅរបស់ក្រសួងវប្បធម៌និងវិចិត្រសិល្បៈ។

លោក ថៃ នរៈសន្យា រដ្ឋលេខាធិការក្រសួងក្រសួងវប្បធម៌ និងវិចិត្រសិល្បៈនៅរសៀលថ្ងៃទី២៨ ខែកញ្ញា ឆ្នាំ២០១៨ មិនទាន់មានប្រតិកម្មណាមួយចំពោះសារចំអកពីសំណាក់កញ្ញា រតនៈ ពិសី នៅឡើយទេ។ ដូច្នេះមានមហាជនជាច្រើនកំពុងរង់ចាំការបញ្ជាក់លើករណីនេះថា តើរូបភាពបែកធ្លាយបង្ហាញពីនារីស្រស់ស្អាតស្លៀកពាក់សិចស៊ីនោះជាកូនស្រីរបស់លោក ឬជាចេតនាកាត់តរូបភាពពីសំណាក់ជនអនាមិកក្នុងន័យវាយប្រហារ៕