បាត់ដំបង ៖ ទីតាំងមួយកន្លែងដែលម្ចាស់ផ្ទះបានរៀបចំតាមបែបជាលក្ខណៈ ស្ថានីយប្រេងឥន្ធនៈ ត្រូវបានប្រជាពលរដ្ឋប្រឆាំងតវ៉ា មិនអោយបង្កើតជាដាច់ខាត ដោយពួកគាត់មានអារម្មណ៍ភ័យខ្លាចអំពីហានិភ័យ ដែលអាចកើតមានឡើងបានគ្រប់ពេលវេលា។
ទីតាំងដែលមានការប្រឆាំងរារាំងនេះ ស្ថិតនៅភូមិអូរតាំ២ សង្កាត់ទួលតាឯក ក្រុងបាត់ដំបង ខេត្តបាត់ដំបង ដោយម្ចាស់ទីតាំងមានឈ្មោះ ងិន ឆប ភេទប្រុស អាយុ៥៤ឆ្នាំ រស់នៅភូមិត្រពាំងព្រលឹត ឃុំសន្តិភាព ស្រុកសំពៅលូន ខេត្តបាត់ដំបង ដែលបុគ្គលរូបនេះ បានប្រឹងប្រែង និងព្យាយាមយ៉ាងស្ងាត់កំបាំងដើម្បីប្រឆាំងនឹងផ្លូវច្បាប់។
គួរបញ្ជាក់ដែរថា ស្ថានីយនេះ បានកសាងឡើងនាឆ្នាំ២០១៣ ដោយគេបានបញ្ចុះស៊ីទែនទាំងពាក់កណ្ដាលអធ្រាត្រ ដើម្បីបំបាំងភ្នែកពីប្រជាពលរដ្ឋ និងអាជ្ញាធរ ដោយសារតែទីតាំងនេះមិនសមជាកន្លែងសម្រាប់បង្កើតជាស្ថានីយប្រេងឥន្ធនៈឡើយ ព្រោះវាស្ថិតនៅជាន់នឹងកាប៊ីនភ្លើងផង និងមានផ្ទះប្រជាពលរដ្ឋនៅក្បែរខាងជាប់ៗគ្នាផង ព្រោះតាមផ្លូវច្បាប់ ស្ថានីយនីមួយៗត្រូវមានទំហំជាង៣០០ ម៉ែត្រការេ និងមានគម្លាតពីផ្ទះប្រជាពលរដ្ឋយ៉ាងតិច ៣៥ ម៉ែត្រ។
កាលនោះក៏មានការតវ៉ាមិនអោយសាងសង់ដែរ ដោយមានប្រជាពលរដ្ឋចូលរួមផ្តិតមេដៃសរុបចំនួន ១៦៨ នាក់ ដោយក្រោយមកក៏មានការកោះហៅអោយចូលរួមប្រជុំនៅសាលាក្រុង ដែលកាលនោះ មានលោក សៀងឯម វូនស្ហ៊ី ជាអភិបាលក្រុង ដោយលោកមិនអនុញ្ញាតអោយសាងសង់ឡើង ប៉ុន្តែបើទោះបីជាបុគ្គលដែលជាម្ចាស់ធ្លាប់បានផ្តិតមេដៃបញ្ឈប់ការសាងសង់ក៏ដោយ ក៏គេនៅតែលប់បន្តសកម្មភាព ដឹកសម្ភារៈ និងបរិក្ខារដែលពាក់ព័ន្ធចូលយ៉ាងស្ងៀមស្ងាត់នៅពេលយប់។
ដោយសារតែបញ្ហានេះទើបនៅរសៀលថ្ងៃទី៦ ខែកញ្ញា ឆ្នាំ២០១៨ នេះ ក៏មានប្រជាពលរដ្ឋជាច្រើនបានប្រមូលផ្តុំគ្នានៅមុខទីតាំង ដើម្បីរារាំងការបង្កើតស្ថានីយនេះ ហើយក៏មានការចុះមកសម្របសម្រួលពីសំណាក់ លោកអភិបាលរងក្រុង លាង វាសនាផងដែរ ដោយលោកបានលើកឡើងថា សុំអោយប្រជាពលរដ្ឋមានការស្ងប់ចិត្ត ព្រោះតុលាការបានលុបចោល នូវច្បាប់សុំសិទ្ធិរក្សាការពារហើយ និងស្អែកនេះ ទាំងអាជ្ញាធរក៏ដូចជាខាងតុលាការ នឹងធ្វើការកោះអញ្ជើញម្ចាស់ទីតាំងអោយចូលរួមស្តាប់អំពីចំណាត់ការ ហើយគ្មានសិទ្ធិសាងសង់ និងបង្កើតជាស្ថានីយប្រេងឥន្ធនៈតទៅទៀតជាដាច់ខាត ៕
Source: Kampuchea Thmey Daily
0 Comments