សភាកាណាដាបានបោះឆ្នោតជាឯកច្ឆន្ទកាលពីថ្ងៃព្រហស្បតិ៍ដើម្បីដកហូតសញ្ជាតិកាណាដាកិត្តិយសពីមេដឹកនាំមីយ៉ាន់ម៉ាលោកស្រី អ៊ួង សានស៊ូជី ដោយសារវិបត្តិរ៉ូហ៊ីងយ៉ា។
រដ្ឋាភិបាលក្រុងអូតាវ៉ាបានផ្តល់កិត្តិយសដ៏កម្រមួយក្នុងឆ្នាំ២០០៧ដល់អ្នកគាំទ្រលទ្ធិប្រជាធិបតេយ្យដែលជាប់ឃុំឃាំងយូរអង្វែងនិងជាម្ចាស់ជ័យលាភីពានរង្វាន់ណូបែលរូបនេះ។
ប៉ុន្តែកេរ្តិ៍ឈ្មោះជាអន្ដរជាតិរបស់លោកស្រីបានវិនាសដោយសារតែការបដិសេធរបស់លោកស្រីក្នុងការបញ្ឈប់អំពើឃោរឃៅដោយកងទ័ពរបស់លោកស្រីប្រឆាំងនឹងជនជាតិភាគតិចមូស្លីមរ៉ូហ៊ីងយ៉ាដែលក្រុងអូតាវ៉ាកាលពីសប្តាហ៍មុនបានប្រកាសថាជាអំពើប្រល័យពូជសាសន៍។
លោក Adam Austen អ្នកនាំពាក្យរដ្ឋមន្ត្រីក្រសួងការបរទេស Chrystia Freeland បាននិយាយថា “ក្នុងឆ្នាំ២០០៧ សភាបានផ្តល់ឲ្យលោកស្រីអ៊ួងសានស៊ូជីនូវឋានៈជាពលរដ្ឋកាណាដាកិត្តិយសហើយថ្ងៃនេះ សភាបានអនុម័តជាឯកច្ឆន្ទនូវសំណើមួយដើម្បីលុបចោលឋានៈនេះ”។
យុទ្ធនាការយោធាដ៏សាហាវមួយដែលចាប់ផ្តើមកាលពីឆ្នាំមុនបានបណ្ដេញជនមូស្លីមរ៉ូហ៊ីងយ៉ាជាង៧០០,០០០នាក់ចេញពីប្រទេសមីយ៉ាន់ម៉ាចូលទៅក្នុងប្រទេសបង់ក្លាដែសដែលនៅទីនោះ ពួកគេកំពុងរស់នៅក្នុងជំរំជនភៀសខ្លួនដ៏អាក្រក់ហើយមានភាពភ័យខ្លាចក្នុងការវិលត្រឡប់ទៅកាន់ប្រទេសមីយ៉ាន់ម៉ាវិញថ្វីបើមានកិច្ចព្រមព្រៀងធ្វើមាតុភូមិនិវត្តន៍ក៏ដោយ។
មនុស្សជាច្រើនបាននិយាយអំពីការសម្លាប់ក្រៅប្រព័ន្ធតុលាការ អំពើហិង្សាផ្លូវភេទនិងការដុតបំផ្លាញផ្ទះ។
លោក Austen បានលើកឡើងពីការបដិសេធមិនឈប់ឈររបស់លោកស្រី ស៊ូជី ក្នុងការថ្កោលទោសការប្រល័យពូជសាសន៍លើជនជាតិរ៉ូហ៊ីងយ៉ាសម្រាប់ការដកហូតសញ្ជាតិកាណាដាកិត្តិយសនេះ។
លោកបានបន្ថែមថា “យើងនឹងបន្តគាំទ្រដល់ក្រុមរ៉ូហ៊ីងយ៉ាដោយផ្តល់នូវជំនួយមនុស្សធម៌ ដាក់ទណ្ឌកម្មប្រឆាំងឧត្តមសេនីយ៍មីយ៉ាន់ម៉ានិងទាមទារឲ្យអ្នកដែលប្រព្រឹត្តត្រូវទទួលខុសត្រូវចំពោះមុខស្ថាប័នអន្តរជាតិ”។
សញ្ជាតិកាណាដាកិត្តិយសត្រូវបានផ្តល់ឲ្យមនុស្សត្រឹមតែប្រាំនាក់ទៀតប៉ុណ្ណោះដោយរួមមានទាំងសម្តេចសង្ឃ Dalai Lama, អ្នកតស៊ូមតិការអប់រំកុមារីនាង Malala Yousafzai និងលោក Nelson Mandela ផងដែរ៕ AFP
Source: Kampuchea Thmey Daily
0 Comments