ចាន់ សាន់ និង ប៊ុន សុធា ឈ្នះ ថៃដូចគ្នាក្នុងជម្រុះគូបូតាជុំទី៣

ការប្រកួតជម្រុះដណ្តើមខ្សែក្រវាត់ជើងឯកលេខ១គូបូតាទម្ងន់៥៤គីឡូក្រាម នៅសង្វៀនបាយ័នស្ទឹងមានជ័យ កាលពីយប់ថ្ងៃទី២៨ កញ្ញា ២០១៨ ដែលមានអ្នកប្រដាល់៤រូប ខ្មែរ២ និង ថៃ២រូបនោះ ចាន់ សាន់ និង ប៊ុន សុធា វាយឈ្នះទាំងពីរនាក់។

សម្រាប់ជំនួបជុំទី៣ ចាន់ សាន់ អ្នកប្រដាល់ក្លិបនិរោធមានជ័យ បានវាយឈ្នះអ្នកប្រដាល់ថៃ Plangthip Por.Yuthphumi ដោយពិន្ទុ បន្ទាប់ពីប្រកួតគ្នា៥ទឹកពេញនោះ ។ចាន់ សាន់ នៅក្នុងទឹកទី១ត្រូវ Plangthip ដាល់ចំគុម្ពថ្គាមស្តាំ បណ្តាលអោយទ្រេតរកដួល ហើយត្រូវអាជ្ញាកណ្តាលរាប់៨ ។ តែយ៉ាងណាចាន់សាន់ក្រោយពីរាប់ម្តងនោះ គេបានប្រឹងវាយយកប្រៀបឈ្នះលើPlangthipវិញ ពិសេសក្នុងទឹកទី៥ គឺគេឈ្នះថៃដាច់តែម្តង ដែលធ្វើឲ្យចប់ការប្រកួតចាន់សាន់ឈ្នះ Plangthip ដោយពិន្ទុ ។

ជាមួយនឹងលទ្ធផលនេះ បានធ្វើអោយចាន់ សាន់ ក្នុង៣ប្រកួតឈ្នះ១ប្រកួតនិងចាញ់ពីរប្រកួតបាន៥ពិន្ទុប៉ុណ្ណោះ ឯ Plangthip Por.Yuthphumi គេបាន៣ពិន្ទុ ដោយក្នុងបីប្រកួតដូចគ្នាចាញ់ទាំង៣ ប្រកួត ។

ចំពោះ ប៊ុន សុធា អ្នកប្រដាល់សមាគមកីឡាប្រដាល់ក្រសួងការពារជាតិ ដែលជួបអ្នកប្រដាល់ថៃ Kaoreanghom Pctchchinda សម្រាប់ជំនួបជុំទី៣នេះដែរនោះ សុធា វាយឈ្នះ Kaoreanghom ដោយពិន្ទុដែរ ក្រោយពីវាយគ្នា៥ទឹកពេញនោះ ។

ស្ថានភាពនៃការប្រកួត ប៊ុន សុធា គឺគេមានប្រៀបឈ្នះលើអ្នកប្រដាល់ថៃ Kaoreanghom សឹងតែគ្រប់ទឹក ពោលគឺ Kaoreanghom ចាញ់ទាំងកណ្តាប់ដៃ ជើងទាត់ និងជង្គង់កែង របស់សុធាទាំងអស់តែម្តង ។ ទោះជាយ៉ាងណា Kaoreanghom ស៊ូបាន៥ទឹក និងចាញ់ត្រឹមពិន្ទុប៉ុណ្ណោះ ។

លទ្ធផលនេះ បានធ្វើអោយKaoreanghom Pctchchinda ទទួលបាន៥ពិន្ទុ ក្នុងបីប្រកួត ដោយឈ្នះ១ប្រកួតនិងចាញ់២ប្រកួត ហើយប៊ុន សុធា បាន៩ពិន្ទុ សម្រាប់ការប្រកួតជម្រុះសន្សំពិន្ទុ៣ជុំនេះ ពោលគឺគេវាយឈ្នះទាំង៣ប្រកួត ។

សូមបញ្ជាក់ថា ការប្រកួតដណ្តើមខ្សែក្រវាត់គូបូតារដូវកាលថ្មីទម្ងន់៥៤គីឡូក្រាមនេះ មានកីឡាករខ្លាំងចំនួន១០រូប ដែលចូលរួមក្នុងការប្រកួតនេះ ក្នុងនោះអ្នកប្រដាល់កម្ពុជាមានចំនួន៥រូប

គឺចាន់ សាន់ ក្លិបនិរោធមានជ័យ-ខេម ចាន់ ក្លិបកងពលតូចទ័ពឆ័ត្រយោង៩១១ - ផាន ផាត់យុទ្ធ ក្លិបសាលវ័ន្តកីឡា - ប៊ុន សុធា សមាគមកីឡាក្រសួងការពារជាតិ និង រិទ្ធ អាទិត្យ ក្លិបអាណាចក្រគុនខ្មែរ ។

ចំពោះអ្នកប្រដាល់ថៃដែលមាន៣នាក់វិញ មាន Anuntasak Site Phukhorngyus , Kaoreanghom Pctchchinda និង Plangthip Por.Yuthphumi ហើយអ្នកប្រដាល់ឡាវ មាន២នាក់នោះ គឺ Wangngeun Rungreankilanakom Phattom និង Seang Suriyak Site Torkahkart ។

អ្នកប្រដាល់មួយរូបៗ ទាំងខ្មែរ ទាំងថៃ និងឡាវ គឺត្រូវឆ្លងកាត់ការប្រកួតក្នុងម្នាក់ៗ ចំនួន ៤ ប្រកួតម្នាក់ ហើយអ្នកដែលមានពិន្ទុច្រើន២រូបក្នុងមួយពូល ទាំងពូលខ្មែរ និង ពូលថៃ-ឡាវ នឹងត្រូវបានឡើងទៅប្រកួតវគ្គពាក់កណ្តាលផ្តាច់ព្រ័ត្រ និង ផ្តាច់ព្រ័ត្រ៕