ភ្នំពេញ ៖ កាលពីល្ងាចថ្ងៃទី៥ ខែកញ្ញា ឆ្នាំ២០១៨នេះ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចចេញដីកាឃុំខ្លួនជនសង្ស័យដៃដល់ម្នាក់ ដាក់ពន្ធនាគារជាបណ្ដោះអាសន្នក្រោមការចោទប្រកាន់ពីបទ.លួចមានស្ថានទម្ងន់ទោស ( ប្លន់ប្រដាប់អាវុធជាង៣៥០លើកទូទាំងប្រទេស)។
ជនឆ្នើមបទល្មើសនេះ ឈ្មោះកែវ សារិន ភេទប្រុស អាយុ២៨ឆ្នាំ ត្រូវបានសមត្ថកិច្ចនគរបាលនាយកដ្ឋានចាប់ខ្លួន កាលពីយប់ថ្ងៃទី៣១ ខែសីហា នៅក្នុងទឹកដីខណ្ឌ៧មករា រាជធានីភ្នំពេញ។ ក្រោយពេលចាប់ខ្លួនជនសង្ស័យរូបនេះ បានសារភាពប្រាប់សមត្ថកិច្ចថា បក្សពួកគេមានជាង១០នាក់ លួច និង ប្លន់ប្រដាប់អាវុធជាង៣៥០លើក តែគ្មាននរណាម្នាក់ គ្រោះថ្នាក់ក្នុងហេតុការណ៍លួច និង ប្លន់ប្រដាប់អាវុធនោះទេ ហើយក៏មិនដែលមានជាប់គុកដែរ។ មានតែពេលនេះគឺជនម្នាក់ឈ្មោះ កែវ សារិន បានត្រូវសមត្ថកិច្ចនគរបាលព្រហ្មទណ្ឌក្រសួងមហាផ្ទៃ នាំទៅដល់ពន្ធនាគារទាំងយប់ ដែលមេឃកំពុងភ្លៀងរលឹម៕
Source: Kampuchea Thmey Daily
0 Comments