ភ្នំពេញ ៖ នៅក្របខណ្ឌ ទូទាំង ប្រទេស ចាប់ពីថ្ងៃទី២៩ខែកញ្ញាដល់ថ្ងៃទី៧ តុលា២០១៨កម្ពុជាអាចនឹងមានភ្លៀងធ្លាក់ពីតិចទៅច្រើន។ ជាមួយគ្នានេះក្រសួង ក៏បាន ធ្វើការ អំពាវនាវ ដល់ ប្រជាពលរដ្ឋ តំបន់ទំនាបកណ្តាលនិងតំបន់ខ្ពង់រាបប្រុងប្រយ័ត្នខ្ពស់ អាចមានជំនន់ទឹក ភ្លៀង។
យោងតាមសេចក្តី ប្រកាសព័ត៌មានរបស់ក្រសួងធនធានទឹក កាលពីថ្ងៃទី ២៨កញ្ញា ឆ្នាំ២០១៨ បានឲ្យដឹងថា ចាប់ពីថ្ងៃទី២៩ដល់ថ្ងៃទី៣០ ខែកញ្ញា អាចនឹងមានភ្លៀងធ្លាក់ពីតិចទៅបង្គួរក្នុងក្របខណ្ឌទូទាំងប្រទេស ហើយចាប់ពីថ្ងៃទី១ដល់ថ្ងៃទី៧តុលាឆ្នាំ២០១៨ អាចនឹងមានភ្លៀងធ្លាក់ពីបង្គួរទៅច្រើន។
ក្រសួងធនធានទឹកនិងឧតុនិយមបានបញ្ជាក់នៅក្នុងសេចក្តីប្រកាសព័ត៌មានរបស់ខ្លួនថា ការព្យាករណ៍ខាងលើនេះ គឺផ្អែកទៅលើមូលដ្ឋាននៃការតាមដានយ៉ាងយកចិត្តទុកដាក់ទៅលើស្ថានភាពអាកាសធាតុឃើញថា ប្រព័ន្ធសម្ពាធទាបបន្តអូសកាត់លើព្រះរាជាណាចក្រកម្ពុជា។
ផ្តើមចេញពីការព្យាករណ៍នេះ ក្រសួងបានអំពាវនាវទៅដល់ប្រជាពលរដ្ឋជាពិសេសអ្នកដែលរស់នៅតាមតំបន់ទំនាបកណ្តាលនិងតំបន់ខ្ពង់រាបទាំងអស់សូមមានការប្រុងប្រយ័ត្នខ្ពស់ព្រោះវាអាចនឹងមានភ្លៀងធ្លាក់ច្រើន ដែលអាចបង្កទៅជាជំនន់ទឹកភ្លៀង៕
Source: Kampuchea Thmey Daily
0 Comments