ភ្នំពេញ ៖ បុរសម្នាក់ត្រូវបានប្រជាជនរស់នៅបន្ទប់ជួលជាប់គ្នាចាប់ខ្លួនប្រគល់ជូននគរបាលមូលដ្ឋានចាត់ការតាមច្បាប់ដោយសារតែគាត់បានលួចយកកាបូបលុយគេជាក់ស្តែងកាលពីម៉ោង៥កន្លះនៅព្រឹកថ្ងៃទី៦ ខែកញ្ញា ឆ្នាំ២០១៨ នៅភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។
ឈ្មោះ ពេជ្រ ធី ភេទប្រុស អាយុ២៥ឆ្នាំគ្មានមុខរបរច្បាស់លាស់ស្នាក់នៅបន្ទប់ជួលចំណុចផ្ទះកើតហេតុខាងលើជាជនជាប់ចោទពីបទលួចទ្រព្យសម្បត្តិគេដែលត្រូវបានឃាត់ខ្លួននៅពេលនេះ. ឈ្មោះ សាត សំរស់ ភេទស្រី អាយុ៣៤ឆ្នាំ មុខរបរលក់ដូរស្នាក់នៅបន្ទប់ជួលនៅជាប់បន្ទប់ជនជាប់ចោទដែរ ជាជនដើមចោទនិងជាជនរងគ្រោះក្នុងករណីនេះ។
ប៉ូលិសបាននិយាយថា តាមរយៈចម្លើយពីជនភាគីទាំងពីរនាក់(ដើមចោទនិងចុងចោទ) បានបញ្ជាក់ថា នៅមុនពេលកើតហេតុជនជាប់ចោទឈ្មោះពេជ្រ ធី បានធ្វើសកម្មភាពចូលក្នុងបន្ទប់ជនរងគ្រោះឈ្មោះសាត សំរស់ លួចយកកាបូបលុយរួចត្រឡប់ចូលក្នុងបន្ទប់របស់ខ្លួនវិញដែលនៅជាប់គ្នា។មួយស្របក់ក្រោយមកជនរងគ្រោះបានដឹងថា បាត់កាបូបលុយ ដោយសង្ស័យឈ្មោះ ពេជ្រ ធី ជាអ្នកលួចក្រុមគ្រួសារជនរងគ្រោះ ក៏បានមកប្តឹងឈ្មោះ ឈុន ម៉ុង ជាម្ចាស់ផ្ទះជួលឲ្យជួយដោះស្រាយឆែកឆេរបន្ទប់ជនសង្ស័យខាងលើ។
នៅខណៈដែលម្ចាស់ផ្ទះជួលដើរសំដៅមកបន្ទប់ស្នាក់នៅរបស់ពេជ្រ ធី ពេលនោះពេជ្រ ធី បានរត់គេចខ្លួនតែជនរងគ្រោះក៏ចាប់បានសួរនាំ គាត់ក៏បានសារភាពថា គាត់ពិតជាបានលួចយកកាបូបលុយនោះមែនដោយយកមកប្រគល់ឲ្យវិញ ប៉ុន្តែម្ចាស់កាបូបលុយមិនព្រមបញ្ចប់រឿងទេ បាននាំយកមកប្រគល់ឲ្យប៉ូលិសមូលដ្ឋានចាត់ការតាមផ្លូវច្បាប់ដោយជនរងគ្រោះជាអ្នកដាក់ពាក្យបណ្តឹងចោទ។
ប៉ូលិសបានបញ្ជាក់ថា នៅក្នុងកាបូបនោះមានលុយអាមេរិកចំនួន១៧០ដុល្លារនិងលុយខ្មែរចំនួន៥០ម៉ឺនរៀល ទូរស័ព្ទម៉ាកសាំសុង១គ្រឿង និងខ្សែក១ទៀត។
តាមប្រភពព័ត៌មានពីប៉ូលិសបានឲ្យដឹងថា ជនសង្ស័យមានផ្ទុកនូវសារធាតុថ្នាំញៀននៅក្នុងខ្លួនដោយសារតែសេពថ្នាំញៀនមានទោស១ករណីទៀត៕
Source: Kampuchea Thmey Daily
0 Comments