លី​គ​កំពូល​កម្ពុជា​ ៖​ អគ្គីសនី​កម្ពុជា ជួប​ទ័ព ហើយ​វេ​ស្ទើ​ន​ភ្នំពេញ ប៉ះ​អាស៊ី​អឺរ៉ុប​និង​ណាហ្គា​វើ​ល ជួប​ប៉ូលីស

​ក្រុមបាល់ទាត់​អគ្គីសនី​កម្ពុជា ត្រូវ​ជួប​ក្រុម​ក្រសួងការពារជាតិ (​ទ័ព​) ហើយ​ក្រុម​វេ​ស្ទើ​ន​ភ្នំពេញ ប៉ះ​ក្រុម​អាស៊ី​អឺរ៉ុប និង​ក្រុម​ណាហ្គា​វើ​ល ជួប​អគ្គស្នងការដ្ឋាន​នគរ​បាល​ជាតិ (​ប៉ូលីស​) នៅ​ល្ងាច​ថ្ងៃ​សៅរ៍ ទី​២៩ ខែកញ្ញា ឆ្នាំ​២០១៨ ក្នុង​សប្តាហ៍​ចុងក្រោយ​ពោលគឺ​សប្ដាហ៍​ទី​២២​នៃ​ពានរង្វាន់​លី​គ​កំពូល​កម្ពុជា (Metfone Cambodian League 2018)​។

*​អគ្គីសនី​កម្ពុជា ប៉ះ​ក្រសួងការពារជាតិ
ក្រុមបាល់ទាត់​អគ្គីសនី​កម្ពុជា ត្រូវ​ប៉ះ​ក្រុម​ក្រសួងការពារជាតិ នៅវេលា​ម៉ោង​៣​រសៀល​លើ​ទីលាន​កីឡដ្ឋាន​អគ្គីសនី​កម្ពុជា ព្រមទាំង​មាន​ផ្សាយ​ផ្ទាល់​តាម​ទំព័រ​ហ្វេ​ស​ប៊ុ​ក​របស់​កម្ពុជា ផងដែរ​។ សម្រាប់​ក្រុម​អគ្គីសនី​កម្ពុជា បាន​ត្រឹម​កៅអី​លេខ​២​នៅ​តំបន់​បាត​តារាង ក្រោយ​ប្រកួត​ឈ្នះ​បាន​១​លើក ស្មើគ្នា​៣​លើក និង​ចាញ់​១៦​លើក​ក្នុង​ប្រកួត​កន្លងមក​។ លោក ប្រាក់ វុទ្ធី គ្រូបង្វឹក​របស់​ក្រុម​នេះ​បានដាក់​គោលដៅ​រក្សាខ្លួន​ឲ្យ​ល្អ និង ប្រឹង​ដើម្បី​បាន​ចំណាត់​ល្អ​ជាង​រដូវ​កាល​ចាស់ នៅក្នុង​ពានរង្វាន់​លី​គ​កំពូល​កម្ពុជា ខណៈ​ក្រុម​នេះ​ទើបតែ​ខកចិត្ត​ក្រោយ​ធ្លាក់​ចេញពី​ពានរង្វាន់​សម្តេច​តេ​ជោ ហ៊ុន សែន ត្រឹម​វគ្គ​១៦​ក្រុម​ចុងក្រោយ​។

ក្រោយ​កក់​កៅអី​ចំណាត់ថ្នាក់​លេខ​៤​រួចរាល់​ក្រុម​ក្រសួងការពារជាតិ ត្រៀម​ដាក់​កីឡាករ​ខ្មែរ​សុទ្ធ​សម្រាប់​ប្រកួត​នេះ ខណៈ​លោក ភា សុ​ភ័​ត្រា ដែល​ជា​គ្រូបង្វឹក​បាន​ត្រឹម​អង្គុយ​មើល​កូនក្រុម​នៅក្រៅ​ទីលាន​ដោយហេតុថា​លោក​នៅ​ជាប់​បម្រាម​របស់​សហព័ន្ធ​កីឡាបាល់ទាត់​កម្ពុជា​នៅឡើយ។ ក្នុង​ជើង​ទី​២​នេះ​ក្លិប​បាន​បន្ថែម​កីឡាករ​សំខាន់ៗ​មួយចំនួន​ដើម្បី​ទប់ស្កាត់​ការ​របូត​ពិន្ទុ​ពី​ដៃ​។ ងាក​ទៅ​មើល​២១​ប្រកួត​មកនេះ​ក្រុម​ក្រសួងការពារជាតិ ឈ្នះ​បាន​១២​លើក ស្មើ​៣​លើក​និង​ចាញ់​៦​លើក​។​



*​វេ​ស្ទើ​ន​ភ្នំពេញ ប៉ះ​អាស៊ី​អឺរ៉ុប
ក្រុមបាល់ទាត់​វេ​ស្ទើ​ន​ភ្នំពេញ​ត្រូវ​បើកទ្វា​កីឡដ្ឋាន​វេ​ស្ទើ​ន របស់ខ្លួន​ស្វាគមន៍​ក្រុម​អាស៊ី​អឺរ៉ុប នៅវេលា​ម៉ោង​៣​រសៀល ហើយ​ប្រកួត​នេះ​ក៏មាន​ផ្សាយ​តាម​ហ្វេ​ស​ប៊ុ​ករ​បស់​CNCC ផងដែរ​។ ក្រុម​វេ​ស្ទើ​ន​ភ្នំពេញ ទើបតែ​រកបាន​១​ពិន្ទុ​ប៉ុណ្ណោះ ក្រោយ​ឆ្លងកាត់​២១​ប្រកួត​មកនេះ​។ ក្រុម​នេះ​កំពុង​ដឹកនាំ​ដោយ​គ្រូបង្វឹក​ជនជាតិ​ម៉ាឡេស៊ី លោក FIZOL BIN A.RAZAK​។ ឆ្លងកាត់​ការប្រកួត​មួយរយៈ​ពេលនេះ​មក​លោក​បាន​មើលឃើញ​ពី​កម្រិត​ប្រកួតប្រជែង​និង​តម្រូវការ​ទាមទារ​នៅក្នុង​លី​គ​កម្ពុជា ដែលជា​បទពិសោធ​ល្អ​សម្រាប់​កីឡាករ​ក្មេងៗ​របស់លោក​ក៏ដូចជា​សម្រាប់​លោក​ផ្ទាល់​ផងដែរ​។

ចំពោះ​ក្រុម​អាស៊ី​អឺរ៉ុប វិញ​កំពុងតែ​ស្រោចស្រង់​កីឡដ្ឋាន AEU Sport Park របស់ខ្លួន​ដោយសារតែ​ទឹកជំនន់​បណ្តាល​ឲ្យ​បាក់​ទំនប់​ហើយ​ទឹក​ហូរ​ចូល​ពេញ​បរិវេណ​កីឡដ្ឋាន​។ ក្រុម​អាស៊ី​អឺរ៉ុប កំពុង​ដឹកនាំ​ដោយ​លោក សុក វាសនា ពេលនេះ​កំពុង​ឈរ​ចំណាត់ថ្នាក់​លេខ​៨ បណ្តោះ​អាសន្ន​ក្នុង​តារាង​រួម​ដែល​មាន​ក្រុម​ចំនួន​១២ ក្រោយ​ប្រកួត​បាន​២១​លើក ឈ្នះ​បាន​៧​លើក ស្មើគ្នា​៦​លើក និង​ចាញ់​៨​លើក មាន​២៧​ពិន្ទុ​ក្នុង​ដៃ​។ ខ្សែប្រយុទ្ធ​កា​ម៉េ​រូ​ន Befolo Mbarga Privat ជា​កីឡាករ​ឆ្នើម​ម្នាក់​ក្នុង​ក្រុម​ក្រោយ​រក​គ្រាប់​បាន​២២​គ្រាប់​ម្នាក់ឯង​កន្លងមក​នេះ​។



*​ណាហ្គា​វើ​ល ជួប​អគ្គស្នងការដ្ឋាន​នគរ​បាល​ជាតិ
ក្រុម​ណាហ្គា​វើ​ល ត្រូវ​ប៉ះ​ក្រុម​អគ្គស្នងការដ្ឋាន​នគរ​បាល​ជាតិ នៅវេលា​ម៉ោង​៦​ល្ងាច​លើ​ទីលាន​ពហុ​កីឡដ្ឋាន​ជាតិ ព្រមទាំង​ផ្សាយ​ផ្ទាល់​តាម​ប៉ុស្តិ៍ BTV News ផងដែរ​។ ប្រកួត​នេះ​បានសម្រេច​បើក​ឲ្យ​មហាជន​ចូលរួម​ទស្សនា​ដោយ​សេរី​ផងដែរ ដើម្បី​អបអរ​ដល់​ក្រុម​ណាហ្គា​វើ​ល ដែល​ឈ្នះ​ជើងឯក​ប្រចាំ​រដូវ​កាល​។ ក្រុម​ណាហ្គា​វើ​ល កំពុង​ឈរ​លេខ​១ ក្នុង​តារាង​រួម ក្រោយ​ប្រកួត​ឈ្នះ​បាន​១៦​លើក ស្មើគ្នា​២​លើក និង​ចាញ់​២​លើក​។ លោក មាស ចាន់ណា គ្រូបង្វឹក​កាន់​អាជ្ញាប័ណ្ណ AFC A License បាន​អរគុណ​ដល់​កូនក្រុម​ដែល​ជា​ផ្នែក​ជួយ​ឲ្យ​លោក​សម្រេច​គោលបំណង​លើក​ពាន​ឡើងវិញ​ក្រោយ​ខកខាន​អស់​រយៈពេល​៩​ឆ្នាំ​។



ចំពោះ​ក្រុម​ប៉ូលីស វិញ​កំពុង​ឈរ​លេខ​៩​ក្នុងចំណោម​ក្លិប​ទាំង​១២ បន្ទាប់ពី​ឈ្នះ​បាន​៧​លើក ស្មើគ្នា​៤​លើក​និង​ចាញ់​១០​លើក​។ លោក សារ៉េត ស៊ីដន គ្រូបង្វឹក​ថ្មី​ក្នុង​ក្រុម​នេះ​រំពឹងថា​ កូនក្រុម​នឹង​ធ្វើ​បាន​ល្អ​បន្ថែម​ទៀត​ដើម្បី​ប្រជែង​យក​ចំណាត់ថ្នាក់​ល្អ​នៅក្នុង​តារាង​រួម ស្រប​ពេល​មាន​កីឡាករ​ស្ទើរតែ​ពាក់កណ្ដាល​ក្រុម ទើបតែ​បញ្ចប់​បំពេញ​កាតព្វកិច្ច​នៅ​សាលា​បណ្ឌិតសភា​នគរបាល​ជាតិ​។

ចំណែក​ប្រកួត​ផ្សេងទៀត​ប្រចាំ​សប្ដាហ៍​ចុងក្រោយ​នេះ​ត្រូវ​ធ្វើឡើង​នៅ​ថ្ងៃអាទិត្យ ទី​៣០​ខែកញ្ញា ឆ្នាំ​២០១៨ ដោយ​ក្រុម​ព្រះខ័ន​រាជ​ស្វាយរៀង ប៉ះ​ក្រុម​វិសាខា នៅ​ម៉ោង​៦​ល្ងាច​លើ​ទីលាន​កីឡដ្ឋាន​ខេត្តស្វាយរៀង មាន​ផ្សាយ​ផ្ទាល់​តាម​ប៉ុស្តិ៍ BTV News ខណៈ​ក្រុម​បឹងកេត​ជួប​ភ្នំពេញ​ក្រោ​ន នៅវេលា​ម៉ោង​៦​ល្ងាច​ដូចគ្នា​លើ​ទីលាន​ពហុ​កីឡដ្ឋាន​ជាតិ មាន​ផ្សាយ​ផ្ទាល់​តាម CNCC និង​ក្រុម​សូល​ទី​ឡូ​អង្គរ ប៉ះ​ក្រុម​អង្គ​រថា​យ​ហ្គឺ​រ នៅ​វេលា​ម៉ោង​៣និង៣០​នាទី​លើ​ទីលាន​កីឡដ្ឋាន​ខេត្តសៀមរាប មាន​ផ្សាយ​ផ្ទាល់​តាម​ហ្វេ​ស​ប៊ុ​ក​កម្ពុ​ជាថ្មី​៕

Source: Kampuchea Thmey Daily