ភ្នំពេញ ៖ លោក ចេង មុនីរ៉ា អភិបាលខណ្ឌច្បារអំពៅ ប្តេជ្ញារៀបចំសណ្តាប់ធ្នាប់សាធារណៈឲ្យល្អប្រសើរ ព្រោះជាប្រយោជន៍រួមរបស់សង្គមជាតិទាំងមូល ទោះបីមានការប្រឈមខ្លាំងប៉ុណ្ណាក៏ដោយ។
ប្រជាពលរដ្ឋខ្លះរិះគន់ ឬ ជេរប្រមាថ អាជ្ញាធរ ពេលចុះរៀបចំសណ្តាប់ធ្នាប់ម្ដងៗ ។ ប៉ុន្តែជាក់ស្តែងប្រជាពលរដ្ឋទាំងនេះទៅវិញទេ ដែលជាអ្នកទទួលផលល្អពីការរៀបចំសណ្តាប់ធ្នាប់នេះដដែល។
ការប្តេជ្ញាចិត្តជាថ្មីរបស់អភិបាលខណ្ឌច្បារអំពៅ នាពេលនេះ ធ្វើឡើងចំពោះមុខមន្ត្រីពាក់ព័ន្ធជាច្រើននាក់ ក្នុងកិច្ចប្រជុំសាមញ្ញលើកទី៥២ របស់ក្រុមប្រឹក្សាខណ្ឌច្បារអំពៅ អាណត្តិទី២ នាព្រឹកថ្ងៃទី២៨ ខែកញ្ញា នាសាលប្រជុំសាលាខណ្ឌច្បារអំពៅ។
លោកចេង មុនីរ៉ា ថ្លែងថា ការរៀបចំសណ្តាប់ធ្នាប់នេះ គឺ មិនបានចំណេញអ្វីទាល់តែសោះ ដល់គណៈអភិបាលខណ្ឌច្បារអំពៅ តែវាជាផលប្រយោជន៍រួមរបស់ប្រជាពលរដ្ឋ ទាំងអ្នកជិះរថយន្ដ ជិះម៉ូតូ និង អ្នកថ្មើរជើង ជាដើម ។ ពេលរៀបចំសណ្តាប់ធ្នាប់សាធារណៈ បានល្អ ការធ្វើដំណើររបស់បងប្អូនប្រជាពលរដ្ឋ ក៏រលូនទៅតាមនោះដែរ គឺចំណេញពេលវេលា ដែលគ្មានអ្វីដែលអាចទិញពេលវេលាបានទេ។
ក្នុងនាមជាប្រធានគណៈបញ្ជាការឯកភាពខណ្ឌច្បារអំពៅ លោកចេង មុនីរ៉ា បន្តថា ការចុះរៀបចំសណ្តាប់ធ្នាប់ នេះ គឺ មានទាំងអ្នកសរសើរ និង អ្នកជេរស្តី។ ប៉ុន្តែអ្នកទាំងអស់នោះ គឺ សុទ្ធតែទទួលបានផលប្រយោជន៍ពីការរៀបចំសណ្តាប់ធ្នាប់នេះទាំងអស់។
លោកចេង មុនីរ៉ា សង្កត់ធ្ងន់ ថា ទោះបីជាប្រឈមខ្លាំងប៉ុណ្ណាក៏ដោយ ក៏គណៈអភិបាលសម្រេចចិត្តរួមគ្នា ប្តេជ្ញាចិត្តរួមគ្នា មិនរាថយដាច់ខាត ចំពោះការរៀបចំសណ្តាប់ធ្នាប់ឲ្យល្អប្រសើរ ព្រោះជាប្រយោជន៍សម្រាប់សង្គមជាតិទាំងមូល។
ផ្លូវ៣៦៩ចាប់គល់ស្ពានព្រះមុនីវង្សដល់ច្រាំងបាក់ និង មុខផ្សារព្រែកឯងជាដើម គឺ ជាមុខសញ្ញានៃការរៀបចំសណ្តាប់ធ្នាប់ឲ្យខានតែបាន។ លោក ចេង មុនីរ៉ា បញ្ជាក់ថា អាជ្ញាធរត្រូវជូនដំណឹង ជាមុន បើកកិច្ចប្រជុំដោយមានកំណត់ហេតុនៃកិច្ចប្រជុំត្រឹមត្រូវ។
ប្រជាពលរដ្ឋទូទៅក្នុងខណ្ឌច្បារអំពៅ សម្តែងការសាទរចំពោះចំណាត់ការដ៏ម៉ឺងម៉ាត់ និង មានប្រសិទ្ធភាពរបស់គណៈអភិបាលខណ្ឌច្បារអំពៅ ក្នុងការរៀបចំសណ្តាប់ធ្នាប់សាធារណៈនេះ៕
Source: Kampuchea Thmey Daily
0 Comments