កីឡាករ២នាក់ក្នុងចំណោម៤នាក់របស់ក្រុមភ្នំពេញក្រោន គឺ ស៊ិន កក្កដា និងអ៊ុក សុវណ្ណ បានលើកឡើងពីការបង្វឹករបស់អ្នកចាត់ការទូទៅថ្មីក្នុងក្រុមជម្រើសជាតិកម្ពុជា Keisuke Honda ក្រោយកោះហៅចូលហ្វឹកហាត់ក្នុងក្រុមជម្រើសជាតិកម្ពុជា អស់មួយរយៈមកនេះដើម្បីត្រៀមប្រកួតជាមួយក្រុមជម្រើសជាតិម៉ាឡេស៊ី។
កីឡាករវ័យក្មេងជាងគេក្នុងក្រុមជម្រើសជាតិ គឺកីឡាករ ស៊ិន កក្កដា បានយល់ឃើញថា « នេះជាលើកទី៥ ហើយសម្រាប់ការជាប់ជម្រើសជាតិរបស់ខ្ញុំ ហើយខ្ញុំពិតជារៀនសូត្របានច្រើនណាស់ពីក្រុមជម្រើសជាតិ ។ គ្រូបង្វឹកថ្មីបានមើលលើទម្រង់លេងរបស់យើង ហើយគាត់បកស្រាយប្រាប់ពីចំនុចខ្វះខាតរបស់យើង ជារួមខ្ញុំយល់ឃើញថា វត្តមានរបស់គាត់គឺល្អសម្រាប់ក្រុមជម្រើសជាតិកម្ពុជា»។
ដោយឡែកខ្សែការពារស្តាំគឺកីឡាករ អ៊ុក សុវណ្ណ បាននិយាយថា «នេះជាលើកទីពីរហើយសម្រាប់ខ្ញុំដែលជាប់ឈ្មោះជាមួយក្រុមជម្រើសជាតិ ចំពោះការដឹកនាំរបស់គ្រូថ្មីគឺល្អទាំងការរៀបចំ និងការជ្រើសរើសកីឡាករ ដោយពួកគាត់សុទ្ធតែជាកីឡាករដែលមានគុណភាព និងជាកីឡាករល្អៗប្រចាំក្លឹបរបស់ខ្លួន។ ចំពោះគ្រូថ្មីរបស់យើង ខ្ញុំយល់ថាពួកគាត់ទាំងពីរគឺល្អមានបទពិសោធន៍ច្រើនទាក់ទងនឹងការលេងរបស់គាត់ទាំងនៅតំបន់អាស៊ី និងនៅតំបន់អឺរ៉ុប ដែលធ្វើឲ្យគាត់មានភាពងាយស្រួលក្នុងការមើលឃើញពីចំនុចខ្វះខាតរបស់យើង ដើម្បីឲ្យយើងធ្វើការកែលម្អរ»។
ក្រុមជម្រើសជាតិកម្ពុជា បានប្រមូលផ្តុំគ្នាបាន៤ថ្ងៃមកហើយ ដើម្បីប្រមូលផ្តុំហ្វឹកហាត់ត្រៀមប្រកួតមិត្តភាពអន្តរជាតិជាមួយក្រុមភ្ញៀវជម្រើសជាតិម៉ាឡេស៊ី ដែលនឹងធ្វើឡើងនៅ ថ្ងៃទី១០ ខែកញ្ញា ខាងមុខ។ កីឡាករបាល់ទាត់ឆ្នើមរបស់ប្រទេសជប៉ុនគឺ Keisuke Honda បានចូលរួមដឹកនាំក្រុមជម្រើសជាតិកម្ពុជា ដោយខ្លួនឯងផ្ទាល់ចាប់ពីថ្ងៃប្រមូលផ្តុំថ្ងៃអង្គារ សប្ដាហ៍នេះរហូតដល់ថ្ងៃប្រកួតតែម្តង៕
Source: Kampuchea Thmey Daily
0 Comments