ក្នុងពានរង្វាន់ Malaysia Cup របស់ប្រទេសម៉ាឡេស៊ី កំពុងតែមមាញឹកមុនពេលសម្រាកឲ្យក្រុមជម្រើសជាតិត្រៀមប្រកួតមិត្តភាពអន្តរជាតិ ខណៈកីឡាករ ធារី ចន្ថាប៊ីន របស់កម្ពុជា កំពុងប្រកបអាជីពនៅក្លិបTerengganu FA បានបង្ហាញពីសមត្ថភាពដ៏ល្អម្នាក់ក្នុងចំណោមកីឡាកររបស់ប្រជាជាតិអាស៊ាននៅក្នុងព្រឹត្តិការណ៍នេះ។
សារព័ត៌មានក្នុងស្រុករបស់ម៉ាឡេស៊ី បានបញ្ជាក់ថា កីឡាករទាំងបីនាក់នោះគឺមានកីឡាករ Shahdan Sulaiman របស់ក្លិបMelaka United FA កីឡាករ ធារី ចន្ថាប៊ីន នៅក្លិបTerengganu Faនិងកីឡាករ Safuwan Baharudin របស់ក្លិបPahang FA។ សម្រាប់ក្លិបTerengganu កំពុងតែបង្ហាញទម្រង់លេងបានល្អក្នុង Malaysia Cup ហើយក៏ក្លាយជាក្រុមដំបូងគេបំផុតដែលឡើងទៅវគ្គ១៦ក្រុមទោះបីជាការប្រកួតចុងក្រោយចាញ់ Perak ២ទល់១ក្ដី។
សម្រាប់លទ្ធផលល្អកន្លងមកនេះ គឺកើតឡើងមកពីកីឡាករលេងក្រុម ប៉ុន្តែ ចន្ថាប៊ីន បានបង្ហាញពីឥទ្ធិពលមិនអាចខ្វះបានរបស់ខ្លួនក្នុងតំបន់បម្រើរបស់ក្រុម បើធៀបនឹងកីឡាករផ្សេងៗនៅក្នុងក្រុម។ អវត្តមានរបស់កីឡាកររូបនេះ បានធ្វើឲ្យក្រុមមួយនេះបានចាញ់គូប្រកួតព្រោះតែគ្មានកម្លាំងសំខាន់នៅតំបន់បម្រើ។ ប៉ុន្តែការប្រកួតទាំងអស់ក្នុង Malaysia Cup ធារី ចន្ថាប៊ីន មានវត្តមានរហូតហើយតួរនាទីរបស់គេមានតួនាទីយ៉ាងសំខាន់។
សូមបញ្ជាក់ថា ដំណើរដំបូងរបស់កីឡាករ ធារី ចន្ថាប៊ីន បានមកកាន់កម្ពុជា ដោយចុះកិច្ចសន្យាជាក្លិបភ្នំពេញក្រោន លើកដំបូងកាលពីខែតុលា ឆ្នាំ២០១២ កន្លងទៅ ដំណាលគ្នានឹងមិត្តភក្ដិមកពីបារាំងជាមួយគ្នា កុក បូរីស និង គួច ដានី បន្ទាប់ពីពួកគេបានធ្វើដំណើរជាមួយក្រុមបាល់ទាត់កូនខ្មែរ-អឺរ៉ុប ដែលដឹកនាំដោយអតីតវីរបុរសបាល់ទាត់ខ្មែរ ប៉ែន ផាត មកប្រកួតនៅកម្ពុជា អំឡុងពាក់កណ្ដាលឆ្នាំ២០១២។ រូបគេជាប់ឈ្មោះក្នុងក្រុមជម្រើសជាតិកម្ពុជា តាំងពីឆ្នាំ២០១៤ រហូតដល់ខែតុលា ឆ្នាំ២០១៧ ថ្មីៗនេះ។
នៅដើមរដូវកាលឆ្នាំ២០១៧ រូបគេបានចេញទៅចូលរួមជាមួយក្លិប Krabi FC សមាជិកពានរង្វាន់លីគលំដាប់ទី២នៅប្រទេសថៃ ខណៈនៅពាក់រដូវកាលរូបគេបានផ្លាស់មកលេងនៅកម្ពុជា វិញជាមួយក្លិបអគ្គីសនីកម្ពុជា។ បើនិយាយពីការប្រកបអាជីពក្នុងក្លិប អំឡុងពេលរួមរស់ជាមួយភ្នំពេញក្រោន កីឡាករ ធារី ធ្លាប់លើកពានរង្វាន់មិត្តហ្វូនខេមបូឌានលីគចំនួន២ឆ្នាំជាប់គ្នាមកហើយ គឺនៅឆ្នាំ២០១២ និង ២០១៦ ក្រោយប្រកបអាជីពនៅកម្ពុជា ជាង៤ ឆ្នាំហើយគេក៏ជាផ្នែកមួយជួយឱ្យភ្នំពេញក្រោន ឈ្នះចំណាត់ថ្នាក់លេខ៣ នៃពានរង្វាន់ Toyota Mekong Club Championship 2014 ផងដែរ៕
Source: Kampuchea Thmey Daily
0 Comments