ប្រធានាធិបតីកោះ Nauru បានទាមទារឲ្យប្រទេសចិនធ្វើការសុំទោសចំពោះអាកប្បកិរិយារបស់អ្នកការទូតកំពូលម្នាក់នៅវេទិកាកោះប៉ាស៊ីហ្វិកហើយបានរិះគន់ចំពោះវត្តមាន “ក្រអឺតក្រទម” របស់ក្រុងប៉េកាំងនៅក្នុងតំបន់នេះ។
លោកប្រធានាធិបតី Baron Waqa បានប្រាប់អ្នកយកព័ត៌មានថា “ពួកគេមិនមែនជាមិត្តរបស់យើងទេ។ ពួកគេគ្រាន់តែត្រូវការយើងសម្រាប់គោលបំណងផ្ទាល់ខ្លួនរបស់ពួកគេប៉ុណ្ណោះ”។
សន្និសីទតំបន់ប៉ាស៊ីហ្វិកប្រចាំឆ្នាំក្នុងឆ្នាំនេះដែលបានបញ្ចប់នៅកោះ Nauru កាលពីថ្ងៃព្រហស្បតិ៍គឺជាបញ្ហាមួយក្នុងចំណោមបញ្ហាដ៏តឹងតែងបំផុតនៅក្នុងប្រវត្តិសាស្ត្ររយៈពេល៤៩ឆ្នាំនៃព្រឹត្តិការណ៍នេះ។
កិច្ចពិភាក្សាជាទូទៅស្តីពីការប្រែប្រួលអាកាសធាតុត្រូវបានរំខានដោយជម្លោះរបស់ម្ចាស់ផ្ទះជាមួយប្រទេសចិននិងទង្វើរបស់ខ្លួនចំពោះអ្នកស្វែងរកសិទ្ធិជ្រកកោនដែលឃុំឃាំងនៅលើកោះនេះក្រោមកិច្ចព្រមព្រៀងមួយជាមួយអូស្ត្រាលី។
ជម្លោះការទូតបានធ្វើឲ្យកោះ Nauru ដែលមានប្រជាជន១១,០០០នាក់និងផ្ទៃដីត្រឹមតែ២១គីឡូម៉ែត្រការ៉េប៉ុណ្ណោះត្រូវប្រឆាំងជាមួយនឹងមហាអំណាចអាស៊ី។
វាបានផ្ទុះឡើងកាលពីថ្ងៃអង្គារនៅពេលដែលប្រមុខគណៈប្រតិភូចិនលោក Du Qiwen បានប៉ុនប៉ងថ្លែងនៅក្នុងកិច្ចប្រជុំមួយប៉ុន្តែលោក Waqa បានបដិសេធឲ្យគាត់និយាយរហូតដល់មេដឹកនាំកោះបានបញ្ចប់។
បន្ទាប់មកគណៈប្រតិភូចិនបានងើបចេញពីកៅអីដោយលោក Du បានដើរជុំវិញបន្ទប់ដើម្បីបញ្ជាក់ពីភាពមិនសប្បាយចិត្តរបស់គាត់មុនពេលចាកចេញ។
លោក Waqa បាននិយាយក្នុងសន្និសីទកាសែតមួយកាលពីល្ងាចថ្ងៃពុធថា “តើគាត់នឹងមានឥរិយាបទដូចនេះទេនៅចំពោះមុខប្រធានាធិបតីផ្ទាល់របស់គាត់? ប្រហែលហើយមើលទៅ”។
លោកបន្តថា “គាត់មិនគោរពវេទិកាប៉ាស៊ីហ្វិកដែលអ្នកដឹកនាំនិងរដ្ឋមន្ត្រីផ្សេងទៀតបានមកចូលរួមជាមួយយើងនៅក្នុងទឹកដីរបស់យើង។ តើអ្នកកំពុងលេងសើចឬ!។ គាត់មិនមែនសូម្បីតែជារដ្ឋមន្ត្រីម្នាក់ហើយគាត់ទាមទារឲ្យមានការទទួលស្គាល់និងនិយាយនៅចំពោះមុខនាយករដ្ឋមន្ត្រី Tuvalu។ តើគាត់ឆ្កួតមែនទេ? ”។
គួរបញ្ជាក់ថា លោក Waqa ដែលប្រទេសរបស់គាត់បានគាំទ្រកោះតៃវ៉ាន់គឺបានបង្កការខឹងសម្បាដល់ទីក្រុងប៉េកាំងរួចទៅហើយមុនពេលកិច្ចប្រជុំកំពូលនេះចាប់ផ្តើមជុំវិញជម្លោះទិដ្ឋាការ៕ AFP
Source: Kampuchea Thmey Daily
0 Comments