កាលពីថ្ងៃពុធលោក Donald Trump បានអំពាវនាវឲ្យបង្ហាញមុខមន្ត្រីជាន់ខ្ពស់មិនបញ្ចេញឈ្មោះម្នាក់ដែលបានសរសេរនៅក្នុងកាសែត New York Times ថា សមាជិកកំពូលៗនៃរដ្ឋបាលរបស់លោកបានធ្វើឲ្យអន្តរាយដល់ប្រធានាធិបតីដើម្បីទប់ស្កាត់ “ការដឹកនាំមិនត្រឹមត្រូវ” របស់លោក។
លោក Trump បានចោទសួរថា តើអត្ថបទវិចារណកថាមិនមានចុះហត្ថលេខានោះអាចត្រូវបានគេចាត់ទុកថាជាការក្បត់ដែរឬក៏អត់ហើយសួរថាតើមន្ត្រីជាន់ខ្ពស់រូបនោះបានសន្មតថាវាពិតជាមានមែនឬទេ។
លោក Trump បានបង្ហោះពាក្យថា “ក្បត់?” ក្នុងការឆ្លើយតបទៅនឹងអត្ថបទដែលមានចំណងជើងថា “ខ្ញុំជាផ្នែកមួយនៃការតស៊ូនៅខាងក្នុងរដ្ឋបាលរបស់លោក Trump” ដែលបានអះអាងថា បុគ្គលិកផ្ទាល់របស់លោកប្រធានាធិបតីបានចាត់ទុកគាត់ថាជាគ្រោះថ្នាក់ដល់ប្រទេសជាតិ។
លោក Trump បានបង្ហោះ Twitter ថា “តើអ្នកដែលគេហៅថា ‘មន្ត្រីរដ្ឋបាលជាន់ខ្ពស់’ ពិតជាមានមែនទេឬវាគ្រាន់តែជាការបរាជ័យក្នុងកាសែត New York Times ជាមួយនឹងប្រភពក្លែងក្លាយមួយផ្សេងទៀតប៉ុណ្ណោះ? ។ ប្រសិនបើជនអនាមិកដ៏កំសាកនោះពិតជាមានមែននោះ កាសែត Times ត្រូវតែប្រគល់គាត់ទៅឲ្យរដ្ឋាភិបាលភ្លាមៗសម្រាប់គោលបំណងសន្តិសុខជាតិ!”។
នៅក្នុងអត្ថបទនោះ មន្ត្រីរូបនេះបានសង្កត់ធ្ងន់ថា ពួកគេបានប្តេជ្ញាចិត្តចំពោះរបៀបវារៈនៃគណបក្សសាធារណរដ្ឋហើយមិនបានចូលរួមជាមួយគណបក្សប្រជាធិបតេយ្យទេ។
ប៉ុន្តែមន្ត្រីរូបនេះបានសរសេរថា “យើងជឿជាក់ថាកាតព្វកិច្ចចម្បងរបស់យើងគឺដើម្បីប្រទេសនេះហើយលោកប្រធានាធិបតីនៅតែបន្តធ្វើសកម្មភាពក្នុងលក្ខណៈដែលប៉ះពាល់ដល់សុខភាពនៃសាធារណរដ្ឋរបស់យើង”។
អត្ថបទវិចារណកថានេះត្រូវបានបោះពុម្ពផ្សាយមួយថ្ងៃបន្ទាប់ពីមានសម្រង់ពីសៀវភៅមួយដែលក៏បានអះអាងផងដែរថា បុគ្គលិកសេតវិមានកំពុងប្រយុទ្ធតស៊ូដើម្បីទប់ទល់នឹងការជិះជាន់ដ៏អាក្រក់បំផុតរបស់ប្រធានាធិបតី។
កាសែត Times បានទទួលស្គាល់ថា វាជា “ជំហានដ៏កម្រ” នៃការបោះពុម្ភផ្សាយវិចារណកថាអនាមិកប៉ុន្តែបាននិយាយថា ការងាររបស់មន្ត្រីរូបនោះនឹងត្រូវបានគំរាមកំហែងប្រសិនបើពួកគេបញ្ចេញអត្តសញ្ញាណគាត់ហើយថា កាសែតដឹងថា នរណាជាសរសេរអត្ថបទនេះ៕ AFP
Source: Kampuchea Thmey Daily
0 Comments