ការប្រកួតជម្រុះដណ្ដើមខ្សែក្រវាត់ជើងឯកWurkz ទម្ងន់៦៧គីឡូក្រាម នៅសង្វៀនទូរទស្សន៍SEA TV នារសៀលថ្ងៃអាទិត្យទី៣០ ខែកញ្ញា ឆ្នាំ២០១៨នេះ ជាការប្រកួតសប្ដាហ៍ទី២ ជុំទី១ រវាងអ្នកប្រដាល់កម្ពុជា រឿង សារ័ត្ន ក្លិបកងពលតូចទ័ពឆត្រយោង៩១១ និងអ្នកប្រដាល់ថៃ Kao Ah ហើយអ្នកប្រដាល់កម្ពុជាជឹម ចិត្រា ក្លិបខ្លារខិនមានរិទ្ធ និង អ្នកប្រដាល់ថៃ Pheach Aroun។
សម្រាប់ជំនួបក្នុងជុំទី១នេះ រវាងរឿង សារ័ត្ន និងKao Ah នេះ ពួកគេទាំងពីរនាក់នេះ មិនធ្លាប់ជួបគ្នាទេកន្លងមក ព្រោះ Kao Ah គេទើបតែមកប្រកួតនៅស្រុកខ្មែរ ក្នុងការប្រកួតដណ្តើមខ្សែក្រវាត់នេះប៉ុណ្ណោះ។
រឿង សារ័ត្ន និង Kao Ah នេះ គេមានសមត្ថភាពប្រហាក់ប្រហែលគ្នាទេ ហើយមាឌ ក៏ប្រហែលគ្នាដែរ ប៉ុន្តែគេចាញ់កម្ពស់ថៃ ដោយគេមានកម្ពស់១,៦៥ម៉ែត្រ ខណៈ Kao Ah គេ១,៧០ ម៉ែត្រ។
Kao Ah គេមានកំណត់ត្រាប្រកួតចំនួន៦២លើក ឈ្នះ៥៣លើក និង ចាញ់០៩ លើកមិនដែលស្មើ ។ចំណែក រឿង សារ័ត្ន គេមានកំណត់ត្រាប្រកួត៧៩លើក ឈ្នះ៥៩លើក ចាញ់១៦ លើក និងស្មើ០៤លើក។
ទោះជាយ៉ាងណាក្តី សម្រាប់ការជួបគ្នានេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះ ក៏មិនអាចអ្នកណាមើលស្រាលអ្នកណាបានដែរ។ ចំពោះការជួបគ្នារវាង ជឹម ចិត្រា និង Pheach Aroun វិញ ប្រហែលជាមិនពិបាកទស្សន៍ទាយនោះទេ។ ត្បិតថា អ្នកប្រដាល់ Pheach Aroun ល្អនិងខ្លាំងជាងជឹម ចិត្រា បើតាមការកត់សម្គាល់ការប្រកួតរបស់ពួកគេកាលពីពេលកន្លងមកនោះ។
ជឹម ចិត្រា ជាជើងឯករងខ្សែក្រវាត់ខារ៉ាបាវទម្ងន់៦៥គីឡូក្រាម ។ទោះបីគេជាជើងខ្លាំងស្រករក្រោយក្តី តែចិត្រាគេមានស្នៀតប្រដាល់ល្អ របៀបវាយរបស់គេក៏ល្អដែរ ហើយថែមទាំងវាយមានភាពរហ័សរហួនទៀតផង តែកម្លាំងទឹកចិត្តរបស់គេរាងតូចបន្តិច ។
ប៉ុន្តែយ៉ាងណា ជឹម ចិត្រា ជួប Pheach Aroun នៅក្នុងព្រឹត្តិការណ៍ខ្សែក្រវាត់ជុំទី១នេះ គេប្រហែលជាពុំមានសំណាងល្អនោះទេ ព្រោះ Pheach Aroun ជាអ្នកប្រដាល់ថៃជើងចាស់និងធ្លាប់វាយឈ្នះអ្នកប្រដាល់កម្ពុជាច្រើននាក់ហើយ។
Pheach Aroun គេមានប្រវត្តិប្រកួតចំនួនចំនួន៩០លើក ឈ្នះ៨០ លើក ចាញ់១០លើក មិនដែលស្មើ។ អ្នកប្រដាល់ថៃរូបនេះ មានរបៀបវាយល្អ គឺវាយដោយមិនបង្ខំ គេវាយចេញមួយៗតែច្បាស់ហើយវាយចេញភាគច្រើនចំគោលដៅបានល្អ ។ ដូច្នេះ ចាំមើល ការប្រកួតក្នុងជុំទី១នេះ តើជឹម ចិត្រា អាចយកឈ្នះ Pheach Aroun បានឬអត់នោះ ?។
ចំពោះ ការប្រកួតក្រៅពីគូខ្សែក្រវាត់នេះ ម៉ន ព្រហ្មម៉ាញ អ្នកប្រដាល់ក្លិបការិយាល័យទី៥កងទ័ពជើងគោក នឹងឡើងជម្រះបញ្ជីជាមួយចាន់ សំអាត អ្នកប្រដាល់ក្លិបអប់រំកាយកីឡាស្រុកអន្លង់វែង។សម្រាប់ការជួបគ្នារវាងអ្នកប្រដាល់ទាំងពីរនាក់នេះ គេមិនហ៊ានទស្សន៍ទាយមុនថា នរណាឈ្នះ នរណាចាញ់នោះឡើយ ព្រោះថាជួបគ្នាលើកមុន ពួកគេទាំងពីរប្រកួតស្មើពិន្ទុគា្ន។
ម៉ន ព្រហ្មម៉ាញ គេប្រកួតលើកចុងក្រោយនេះ វាយស្មើពិន្ទុជាមួយស៊ូ វណ្ណះ អ្នកប្រដាល់ក្លិបនាគរាជមានជ័យ ។ ឯ ការប្រកួតចុងក្រោយរបស់ចាន់ សំអាតវិញ គេប្រកួតចាញ់អ្នកប្រដាល់ថៃPhat Nam Noeung ដោយពិន្ទុ។
យឹប ឌុក អ្នកប្រដាល់ក្លិបរស្មីភូមិគាបខេត្តបន្ទាយមានជ័យ នឹងជួបប្រកួតជាមួយមិត្ត ស៊ីណាត អ្នកប្រដាល់ជើងថ្មី ក្លិបរុក្ខគិរីខេត្តបាត់ដំបង ដោយប្រកួតក្នុងទម្ងន់៥៤គីឡូក្រាម។ពួកគេពីរនាក់នេះ មិនដែលជួបគ្នាទេកន្លងមក។ ចាំមើល រវាងយឹប ឌុក និង មិត្ត ស៊ីណាត នេះ តើនរណាឈ្នះ ?៕
Source: Kampuchea Thmey Daily
0 Comments