ភ្នំពេញ ៖ នៅម៉ោង៣រសៀល ថ្ងៃទី២៧វិច្ឆិកានេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា អញ្ជើញបិទមហាសន្និបាតតំណាងទូទាំងប្រទេសលើកទី៤ របស់ ស.ស.យ.ក នៅសណ្ឋាគារសុខាភ្នំពេញ។
ពិធីបើកមហាសន្និបាតតំណាងទូទាំងប្រទេសលើកទី៤ របស់ ស.ស.យ.ក ត្រូវបានធ្វើឡើងនៅព្រឹកថ្ងៃទី២៦ ខែវិច្ឆិកា ឆ្នាំ២០១៨ ក្រោម អធិបតីភាពសម្ដេចវិបុលសេនាភក្តី សាយ ឈុំ ប្រធានព្រឹទ្ធសភាដោយមានការចូលរួមពីថ្នាក់ដឹកនាំ សមាជិក សមាជិកា មកពីទូទាំង២៥ រាជធានី-ខេត្តប្រមាណ ១.៣០០នាក់។
ក្នុងទិសដៅការងារបន្ដដែលបានដាក់ចេញ ស.ស.យ.ក ប្ដេជ្ញាបន្ដអនុវត្ត «ចលនាយុវជនក្នុងបុព្វហេតុជាតិមាតុភូមិ» ដែលភ្ជាប់ក្នុងឧបសម្ពន្ធ នៃសេចក្ដីសម្រេចចិត្តរបស់មហាសន្និបាតសមាគមយុវជនកម្ពុជា ឆ្នាំ២០១២ និងដែលត្រូវធ្វើបច្ចុប្បន្នភាពជាផែនការយុទ្ធសាស្ត្រ ឆ្នាំ២០១២-២០២៣។
ផែនការយុទ្ធសាស្ត្រ «ចលនាយុវជនក្នុងបុព្វហេតុមាតុភូមិ» នេះ ត្រូវធ្វើបច្ចុប្បន្នភាពជាប្រចាំ ស្របតាមវិវត្តន៍ជាក់ស្ដែង នៃសង្គមជាតិដោយគណៈកម្មាធិការកណ្ដាល ស.ស.យ.ក។
តាមរយៈមហាសន្និបាតតំណាងទូទាំងប្រទេស លើកទី ៤ ស.ស.យ.ក បានសម្រេចបញ្ចូលសមាជិកគណៈអចិន្ត្រៃយ៍គណៈកម្មាធិការកណ្ដាលចំនួន១៥រូបបន្ថែមទៀត ដើម្បីពង្រឹងប្រសិទ្ធភាពការងារដឹកនាំនៅក្នុងអង្គការចាត់តាំងដែលមានអាយុកាល៤០ឆ្នាំមកនេះ។
សមាជិកថ្មីទាំង១៥រូបរួមមាន ៖ ១.លោកស្រី ចម និម្មល, ២.លោក ជាម ច័ន្ធសោភ័ណ្ឌ, ៣.លោកស្រី មិថុនា ភូថង, ៤.លោក ថង សាវុន, ៥.លោក ទៀ សីហា, ៦.លោកស្រី បាន ស្រីមុំ, ៧.លោក ម៉ុម សារឿន, ៨.លោក វ៉ា ថន, ៩.លោក សុខ ពុទ្ធិវុធ, ១០.លោក សុខ សប្បាយណា, ១១.លោក សំហេង បុរស, ១២.លោក ហេង សុខគង់, ១៣.លោក ហេង សួរ, ១៤.លោក ហ៊ុយ វណ្ណៈ, ១៥.លោក អ៊ុន ចាន់ដា។
បច្ចុប្បន្ន សហភាពសហព័ន្ធយុវជនកម្ពុជា មានសមាជិកគណៈកម្មាធិការកណ្ដាលសរុប១៤២រូបដែលទើបនឹងបោះឆ្នោតបន្ថែម៤៣រូប។ សមាជិកគណៈអចិន្ត្រៃយ៍គណៈកម្មាធិការកណ្ដាលបូកបញ្ចូលសមាជិកថ្មី១៥រូបទៀត ដូច្នេះសមាជិកគណៈអចិន្ត្រៃយ៍គណៈកម្មាធិការកណ្ដាលកើនដល់៣៥រូប។
ស.ស.យ.ក នឹងជំរុញបន្តពង្រីករចនាសម្ព័ន្ធ និងក្រុមការងារ ស.ស.យ.ក ឲ្យបានសម្រេចតាមលក្ខន្តិកៈរបស់ខ្លួន ដើម្បីជាមូលដ្ឋានក្នុងការ ពង្រីកសកម្មភាព និងជំរុញបេសកកម្មបុព្វហេតុរបស់ ស.ស.យ.ក ឲ្យកាន់តែបានទូលំទូលាយ និងជ្រាបដល់បេះដូងរបស់យុវជននៅតាមបណ្ដាមូលដ្ឋាននានាក្នុងប្រទេស។
បន្ដសកម្មភាពលើកស្ទួយនូវឧត្ដមភាព កិត្តិនាមជាតិ និង ផ្សព្វផ្សាយឲ្យបានទូលំទូលាយអំពីប្រវត្តិ សាស្ដ្រ វប្បធម៌ ប្រពៃណី សិល្បៈ ជំនឿ សាសនា ដែលជាអត្តសញ្ញាណជាតិ និងបន្តលើកកម្ពស់សមត្ថភាពជំនាញ ផលិតភាព ចំណេះដឹង និងបំណិនជីវិតរបស់យុវជន។
បន្ថែមពីនេះ បន្ដជំរុញយុវជនឲ្យចូលរួមកម្មវិធីស្ម័គ្រចិត្តកម្មវិធីសិក្សាកម្មវិធីមនុស្សធម៌ ឬការងារស្ម័គ្រចិត្តនៅតាមសហគមន៍ដើម្បីយុវជនបានសាកល្បងចំណេះដឹងទេពកោសល្យ ការច្នៃប្រឌិត និងទទួលបានបទពិសោធន៍ដើម្បីជាឧត្ដមប្រយោជន៍របស់ជាតិ៕
Source: Kampuchea Thmey Daily
0 Comments