ភ្នំពេញ ៖ តារាចម្រៀងប្រុសលំដាប់ប្រទេស ដែលទទួលបានការគាំទ្រពីទស្សនិកជន លោក ខេមរៈ សិរីមន្ត អស់រយៈពេលជិត១០ឆ្នាំមកហើយ ក្រោយពេលចូលប្រឡូកក្នុងវិស័យសិល្បៈ និងមានកេរ្តិ៍ឈ្មោះល្បីល្បាញនៅលើវិថីមួយនេះ លោកតែងបានព្យាយាមលាក់បាំងចំណងស្នេហ៍ជាមួយភរិយាស្របច្បាប់របស់ខ្លួន។
ចំពោះការបិទបាំងសម្ពន្ធភាពស្នេហាប្ដី-ប្រពន្ធពីសំណាក់តារាចម្រៀង លោក ខេមរៈ សិរីមន្ត ដែលមានរយៈពេលជាច្រើនឆ្នាំ ពីក្រសែភ្នែករបស់មហាជនអ្នកគាំទ្រកន្លងមកនោះ ក៏បានធ្វើឲ្យប្រភពជិតស្និទ្ធមួយចំនួនធ្លាប់ចេញមុខទម្លាយជាបន្តបន្ទាប់។ ប៉ុន្តែជារឿងៗ តារាប្រុសរូបនេះហាក់ធ្វើពុំដឹងអ្វីទាំងអស់ និងថែមទាំងច្រានចោលព័ត៌មានទាំងនោះទៀតផង។
យ៉ាងណាមិញ ខុសពីពាក្យចាស់ធ្លាប់ដំណាលប្រាប់កូនចៅជំនាន់ក្រោយៗនោះឡើយ ពោលគឺ ដំរីងាប់មិនអាចយកចង្អេរបាំងជិតឡើយ ឬមួយឃ្លាទៀតគឺក្រដាសមិនអាចយកមកខ្ចប់ភ្លើងបានទេ។
ជាក់ស្ដែងមិនខុសអ្វីនឹងរឿងរ៉ាវរបស់ លោក ខេមរៈ សិរីមន្ត នោះឡើយ ការពិតក៏ត្រូវបានបែកធ្លាយនិងលាតត្រដាងរហូតសាមីខ្លួន លោក ខេមរៈ សិរីមន្ត ដាច់ចិត្តចេញមុខទទួលស្គាល់ការពិតកាលពីអំឡុងដើមឆ្នាំ២០១៨ លើករណីមានប្រពន្ធកូនផងនោះ។
ជាមួយគ្នា នៃការចេញមុខទទួលស្គាល់របស់ លោក ខេមរៈ សិរីមន្ត នេះដែរ កាលនោះលោកក៏បានបញ្ជាក់ថា ក្រៅតែពីខ្លួនបានរៀបការស្របច្បាប់ជាមួយប្រពន្ធដែលមានដើមកំណើតនៅខេត្តកំពង់ឆ្នាំងហើយនោះ គឺលោកថែមទាំងមានកូនចំនួន២នាក់ ជាចំណងដៃផងដែរ។ ខណៈដែលពេលនេះក៏ស្រាប់តែមានដំណឹង នៃការទទួលបានកាដូរចំណងដៃកូនស្រីទី៣ម្នាក់ទៀតផងនោះ។
ផ្អែកតាមប្រភពស្និទ្ធស្នាលស្ថិតក្នុងរង្វង់សិល្បៈដូចគ្នាបាននិយាយឲ្យដឹងថា កាលពីល្ងាចថ្ងៃទី២៦ ខែវិច្ឆិកា ឆ្នាំ២០១៨កន្លងនេះ ភរិយារបស់ លោក ខេមរៈ សិរីមន្ត ក្រោយពេលពពោះជាច្រើនខែមកហើយនោះ ពេលនេះបានធ្វើការវះកាត់សម្រាលកូនស្រីទី៣របស់ខ្លួនដ៏គួរឲ្យស្រឡាញ់ នៅឯមន្ទីរពេទ្យរ៉ូយ៉ាល់ភ្នំពេញ។
ប្រភពដដែលបានបញ្ជាក់បន្ថែមទៀតថា គិតរហូតមកទល់ពេលនេះ តារាចម្រៀងប្រុស លោក ខេមរៈ សិរីមន្ត គឺមានកូនចំនួន៣នាក់ហើយ ដោយក្នុងនោះ ៖ កូនប្រុសទី១,ឈ្មោះ ខេមរៈ មន្តស្នេ ហ៍ អាយុ៥ឆ្នាំ,កូនស្រីទី២,ឈ្មោះ ខេមរៈ ស្ដ្រី មានវ័យជាង២ឆ្នាំ និងកូនស្រីពៅទី៣ដែលទើបត្រូវបានសម្រាលនេះមិនទាន់ដឹងថាមានឈ្មោះអ្វីនោះទេ៕
Source: Kampuchea Thmey Daily
0 Comments