វិមានក្រឹមឡាំងបាននិយាយកាលពីថ្ងៃអង្គារថា ប្រធានាធិបតីរុស្ស៊ីលោក Vladimir Putin បានសម្តែងការព្រួយបារម្ភយ៉ាងខ្លាំងចំពោះសេចក្តីសម្រេចរបស់ប្រទេសអ៊ុយក្រែនក្នុងការដាក់ច្បាប់អាជ្ញាសឹកបន្ទាប់ពីមានការប្រឈមមុខដាក់គ្នានៅសមុទ្ររវាងប្រទេសទាំងពីរ។
នៅក្នុងការសន្ទនាតាមទូរស័ព្ទជាមួយអធិការបតីលោកស្រី Angela Merkel, លោក Putin បាននិយាយថា លោកសង្ឃឹមថា មេដឹកនាំអាល្លឺម៉ង់អាចធ្វើអន្តរាគមន៍ដើម្បីទប់ស្កាត់ទីក្រុងគៀវ។
វិមានក្រឹមឡាំងបាននិយាយនៅក្នុងសេចក្តីថ្លែងការណ៍មួយបន្ទាប់ពីការសន្ទនានេះថា លោក Putin បានសម្តែងការព្រួយបារម្ភយ៉ាងខ្លាំងចំពោះការសម្រេចចិត្តរបស់ក្រុងគៀវក្នុងការជូនដំណឹងកងកម្លាំងប្រដាប់អាវុធរបស់ខ្លួនឲ្យមានការប្រុងប្រយ័ត្ននិងណែនាំច្បាប់អាជ្ញាសឹក។
វិមានក្រឹមឡាំងបន្ថែមថា លោកក៏បាននិយាយផងដែរថា លោកសង្ឃឹមថាទីក្រុងប៊ែរឡាំងអាចមានឥទ្ធិពលលើអាជ្ញាធរអ៊ុយក្រែនដើម្បីរារាំងពួកគេពីទង្វើមិនប្រុងប្រយ័ត្នបន្ថែមទៀត។
វិបត្តិថ្មីមួយបានកើតឡើងកាលពីថ្ងៃអាទិត្យនៅពេលដែលកងកម្លាំងរុស្ស៊ីបានឡើងនិងចាប់យកនាវាអ៊ុយក្រែនចំនួន៣គ្រឿងដែលក្រុងមូស្គូបានចោទប្រកាន់ថា នាវាទាំងនេះបានចូលដែនទឹករុស្ស៊ីដោយខុសច្បាប់នៅជិតឆ្នេរសមុទ្រនៃតំបន់ Crimea ក្នុងសមុទ្រ Azov ។
ការកើនឡើងនៃភាពតានតឹងនេះបានជំរុញឲ្យសភាអ៊ុយក្រែនបោះឆ្នោតនៅថ្ងៃចន្ទដើម្បីគាំទ្រច្បាប់អាជ្ញាសឹកនៅតាមតំបន់ព្រំដែនសម្រាប់រយៈពេល៣០ថ្ងៃ។
ច្បាប់អាជ្ញាសឹកនឹងផ្តល់ឲ្យអាជ្ញាធរអ៊ុយក្រែននូវអំណាចដើម្បីចល័តប្រជាពលរដ្ឋដែលមានបទពិសោធន៍ខាងយោធា គ្រប់គ្រងប្រព័ន្ធផ្សព្វផ្សាយនិងរឹតបន្តឹងការប្រមូលផ្តុំគ្នាជាសាធារណៈ។
អ៊ុយក្រែននិងសម្ព័ន្ធមិត្តលោកខាងលិចរបស់ខ្លួនបាននិយាយថា ប្រទេសរុស្ស៊ីបានរារាំងច្រកសមុទ្រដោយខុសច្បាប់ហើយបានធ្វើសកម្មភាពប្រឆាំងនឹងច្បាប់អន្តរជាតិដោយចាប់យកទូកនិងនាវិក៕ AFP
Source: Kampuchea Thmey Daily
0 Comments