តាកែវ ៖ ស្ត្រីម្នាក់ដែលគេស្គាល់ថាជាមនុស្សមានជំងឺសរសៃប្រសាទ បានលង់ទឹកព្រែកស្លាប់បាត់បង់ជីវិត បង្កការភ្ញាក់ផ្អើលដល់អ្នកភូមិទាំងព្រឹក ខណៈមានអ្នកទៅដងទឹក បានប្រទះឃើញ។
ហេតុការណ៍ប្រទះឃើញសពស្ត្រីលង់ទឹកស្លាប់នេះបានកើតឡើងនៅព្រឹកថ្ងៃទី០៦ ខែមករា ឆ្នាំ២០១៩ វេលាម៉ោង០៩និង១៥នាទី នៅចំណុចព្រែកត្រពាំងបី ស្ថិតក្នុងភូមិរកា ឃុំស្នោ ស្រុកព្រៃកប្បាស ខេត្តតាកែវ។
តាមការឲ្យដឹងពីសមត្ថកិច្ចស្ត្រីរងគ្រោះមាន ឈ្មោះ ស៊ឹម វ៉ាត អាយុ៤៧ឆ្នាំ រស់នៅភូមិរកា ឃុំស្នោ ស្រុកព្រៃកប្បាស ខេត្តតាកែវ។
សមត្ថកិច្ចបន្តថា ក្រោយមានមនុស្សឃើញសពស្ត្រីរងគ្រោះខាងលើលង់ទឹកភ្លាម និងបានរាយការណ៍មកកម្លាំងជំនាញ ក៏បានសហការជាមួយគ្រូពេទ្យចុះទៅពិនិត្យធ្វើកោសល្យវិច័យឃើញថា ស្ត្រីរងគ្រោះពិតជាស្លាប់ដោយលង់ទឹកពិតប្រាកដមែន។
បច្ចុប្បន្ន សពស្ត្រីរងគ្រោះត្រូវបានសមត្ថកិច្ចប្រគល់ឲ្យសាច់ញាតិយកទៅធ្វើបុណ្យតាមប្រពៃណីក្រោយពីពិនិត្យ និងធ្វើកំណត់ហេតុរួចរាល់៕
Source: Kampuchea Thmey Daily
0 Comments