ស្ទឹងត្រែង ៖ ប្រភេទត្រីមានរសជាតិឆ្ងាញ់ដូចបង្កង នៅក្នុងទន្លេស្ទឹងត្រែង មានត្រីប៉ាសេអ៊ី និងត្រីប៉ាវ៉ា មុខពីរ ដែលល្បីល្បាញថា ជាត្រីមានតម្លៃថ្លៃ និងឆ្ងាញ់។
ម្ចាស់ដេប៉ូលក់ត្រីទន្លេស្ទឹងត្រែងបានរៀបរាប់តាមរយៈទូរស័ព្ទថា ត្រីទន្លេខេត្តស្ទឹងត្រែងមានត្រីប៉ាសេអ៊ី ដែលមានតម្លៃថ្លៃ ហើយបច្ចុប្បន្ននេះក៏មានត្រីប៉ាវ៉ាមុខពីរ ក៏មានតម្លៃក្រោមត្រីប៉ាសេអ៊ី បន្តិចបន្តួចប៉ុណ្ណោះ។
ម្ចាស់ដេប៉ូលក់ត្រីទន្លេស្ទឹងត្រែងបន្តថា រដូវកាល នៃត្រីទាំងពីរនេះដែលសម្បូរ គឺនៅក្នុងខែវិច្ឆិកា ដល់ខែកុម្ភៈ។ តម្លៃត្រីប៉ាសេអ៊ី ដែលមានទំហំតូចថ្លៃជាង១០ម៉ឺនរៀល ក្នុងមួយគីឡូ និងប្រភេទត្រីធំថ្លៃក្នុងមួយគីឡូ ជាង៤០ម៉ឺនរៀល។
ដោយឡែក ចំពោះត្រីប៉ាវ៉ាមុខពីរ មានតម្លៃក្នុង១គីឡូ ជាង១០ម៉ឺនរៀល។ ចំពោះត្រីប៉ាសេអ៊ី មានទំហំ និងទម្ងន់មិនលើសពី២គីឡូនោះទេ តែបើត្រីប៉ាវ៉ាមុខពីរអាចធំមានទម្ងន់រហូតដល់៦គីឡូក្រាមឯណោះ។
ម្ចាស់ដេប៉ូបន្តថា ក្នុង១ថ្ងៃ អាចលក់បានតែ២ ឬ ៣ត្រីប៉ុណ្ណោះ ព្រោះជាត្រីប្រភេទដែលមានតម្លៃខ្ពស់មានអ្នកទទួលទានតិច ដែលមានលទ្ធភាពទិញត្រីនេះបាន៕
Source: Kampuchea Thmey Daily
0 Comments