Ad Code

អគ្គិភ័យ​ ​ឆក់យក​ផ្ទះ​លើទឹក​១​ខ្នង ​រួម​នឹង​ទ្រព្យសម្បត្តិ​អស់ទាំង​ស្រុង​ នៅ​បឹង​ទន្លេសាប​​



បាត់ដំបង ៖ ពិតជា​សំណាងល្អ​ ដែលមាន​ក្មេង​តូចៗ​២​នាក់​ និង​មនុស្ស​ចាស់​ម្នាក់ទៀត ​ដែលជា​ម្តាយ​មីង​មើលថែ​ក្មេង ​ត្រូវបាន​រួច​ផុតពី​គ្រោះ​អគ្គិភ័យ​ ដោយសារ​តែ​អ្នក​ដែល​បានឃើញ​ហេតុការណ៍​នាំគ្នា​សម្រុកចូល​រំដោះ​ចេញ​ដោយ​សុវត្ថិភាព ​ខណៈ​ផ្ទះ​បណ្តែត​លើទឹក​ចំនួន​១​ខ្នង​ នៅ​បឹង​ទន្លេសាប​ត្រូវ​ភ្លើង​ឆាបឆេះ​អស់ទាំង​ស្រុង​។

​អាជ្ញាធរ​បាន​និយាយ​ថា​ អគ្គិភ័យ​បណ្ដាល​ឲ្យ​ឆេះ​ផ្ទះ​នេះ ​បាន​កើតឡើង​នៅ​វេលា​ម៉ោង​១០និង​០០​នាទី​ព្រឹក​ ថ្ងៃ​ទី​១៥​ ខែ​មករា ​ឆ្នាំ​២០១៩​ ស្ថិត​ត្រង់​ចំណុច​ផ្ទះ​លេខ​៤៥៦ ​ក្នុង​ក្រុម​ទី​៦ ​ភូមិ​អន្លង់​តា​អួរ​ ឃុំ​កោះ​ជី​វាំង​ ស្រុក​ឯក​ភ្នំ​ ខេត្ត​បាត់ដំបង។

ម្ដាយមីង​របស់​ម្ចាស់ផ្ទះ​រងគ្រោះ​បាន​រៀបរាប់​ឲ្យ​ដឹង​ដែរ​ថា​ មូលហេតុ​ នៃ​ការ​ឆាបឆេះ​នេះ​ គឺ​ផ្តើម​ចេញពី​ក្នុង​ផ្ទះ​ឆ្លង​ចរន្ត​អគ្គិសនី​(​ភ្លើង​ឯកជន​)​ បាន​ទុស្សេ​បែក​ផ្កាភ្លើង​មួយសន្ទុះ​ ក៏បង្ក​ជា​អណ្តាតភ្លើង​ឆាបឆេះ​យ៉ាង​សន្ធោសន្ធៅ​ពេញបន្ទុក​មួយ​រំពេច​តែម្ដង ​ស្ទើរតែ​នាំ​ចៅ​តូចៗ​ចំនួន​២​នាក់​ចេញ​សឹងតែ​មិនទាន់​ សំណាង​បាន​អ្នក​នៅ​ជិត​មកជួយ​ ដើម្បី​រំដោះ​ចេញ​ទាំង​រូបគាត់ ​រួម​នឹង​ចៅ​តូចៗ​២​នាក់​ទៀត​​រួច​ផុតពី​គ្រោះថ្នាក់​នេះ​។

​ម្ចាស់ផ្ទះ​រងគ្រោះ​ ឈ្មោះ​ សែន​ សុខ​ភិន​ អាយុ​៣៨​ឆ្នាំ ​ក្នុងពេល​កើតហេតុ​ រវល់​ទៅ​យាម​សត្វ​នៅ​តំបន់​អភិរក្ស​ រីឯ​ប្រពន្ធ​មាន ឈ្មោះ ​សែម​ ឡាក់​គី​ អាយុ​៣២​ឆ្នាំ​ រវល់​ទៅ​លក់​បង្អែម​នៅ​ខាងក្រៅ​ផ្ទះ​ដែលជា​មុខរបរ​ប្រចាំថ្ងៃ​ ហើយ​ជា​រៀងរាល់ថ្ងៃ​តែង​ចេញពី​ផ្ទះ​ដើម្បី​ដើរ​លក់​តាម​ផ្ទះ​ប្រជា​នេសាទ​ដូច​គ្នា​ បាន​ផ្ញើរ​កូន​តូច​អាយុ​៥​ឆ្នាំ​ម្នាក់​ និង​អាយុ​១១​ឆ្នាំ​ម្នាក់ ឲ្យ​ម្តាយ​មីង​ជួយ​មើល​ការខុសត្រូវ​នៅ​ក្នុង​ផ្ទះ​រៀងរាល់ថ្ងៃ​ផងដែរ​។​

នៅក្នុង​ហេតុការណ៍​ខាងលើនេះ​ ត្រូវបាន​បំផ្លាញ​ផ្ទះ​ និង​ទ្រព្យសម្បត្តិ​ជាច្រើន​នៅក្នុង​ភ្នក់ភ្លើង​ រួម​ទាំង​ប្រាក់​មួយ​ចំនួន​ទៀត​ដែល​ក្រុម​គ្រួសារ​រងគ្រោះ​ ខិតខំ​សន្សំ​ដោយ​កម្លាំង​ញើស​ឈាម​ជា​យូរ​ខែ​ឆ្នាំ​កន្លងទៅ ​ដែល​ប្រហាក់ប្រហែល​៦០​លាន​រៀល​ផង​ដែរ​៕




Source: Kampuchea Thmey Daily

Post a Comment

0 Comments

Close Menu