ភ្នំពេញ ៖ លោក ត្រឹន កឹមទូ (Tran Kam Tu) លេខាធិការមជ្ឈិមបក្ស និងជា ប្រធានគណៈកម្មាធិការត្រួតពិនិត្យមជ្ឈិមបក្សកុម្មុយនិស្តវៀតណាម បានអបអរសាទរ ចំពោះកម្ពុជា ដែលថ្មីៗនេះបានធ្វើពិធីអបអរសាទរខួបលើកទី៤០ នៃទិវាជ័យជម្នះ ៧មករា ដែលជាទិវាជាប្រវត្តិសាស្ត្រមួយនាំឱ្យកម្ពុជាមានការអភិវឌ្ឍរីកចម្រើនដូចសព្វថ្ងៃនេះ។
នៅក្នុងជំនួបសម្តែងការគួរសម និងសវនាការជាមួយសម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា នាព្រឹកថ្ងៃទី១០ ខែមករានេះ នៅវិមានរដ្ឋសភា ក្នុងឱកាសដែលលោកអញ្ជើញមកបំពេញទស្សនកិច្ចនៅកម្ពុជា លោក ត្រឹន កឹមទូ ក៏បានសម្តែងនូវការពេញចិត្តចំពោះវឌ្ឍនភាពនៃទំនាក់ទំនងកិច្ចសហប្រតិបត្តិការយ៉ាងជិតស្និទ្ធរវាងកម្ពុជា និងវៀតណាមពីមួយថ្ងៃ ទៅមួយ ថ្ងៃ ដែលកាន់តែមានការរីកចម្រើនជាលំដាប់។
សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា បានសម្តែងមោទនភាពចំពោះវឌ្ឍនភាព នៃទំនាក់ទំនង កិច្ចសហប្រតិបត្តិការរវាងកម្ពុជា និងវៀតណាម ព្រមទាំងបានចាត់ទុកវត្តមានរបស់លោក ត្រឹន កឹមទូ និងគណៈប្រតិភូគណៈកម្មាធិការត្រួតពិនិត្យមឮជ្ឈិមបក្សកុម្មុយនិស្តវៀតណាមនាពេលនេះ បានរួម ចំណែកបន្ថែមទៀត ក្នុងការបន្តពូនជ្រុំលើកកម្ពស់ទំនាក់ ទំនងមិត្តភាព សាមគ្គីភាព ជាប្រពៃណី និងកិច្ចសហប្រតិបត្តិការលើគ្រប់វិស័យ រវាងបក្ស រដ្ឋ រដ្ឋាភិបាល និងប្រជាជននៃប្រទេសទាំងពីរឱ្យកាន់តែរឹងមាំខ្លាំងក្លាថែមមួយកម្រិតទៀត។ សម្តេចប្រធានរដ្ឋសភាកម្ពុជា ក៏បានជម្រាបជូនគណៈប្រតិភូអំពីការរៀបចំទិវា៧មករា ខួបទី៤០កន្លងទៅ ដោយសម្តេចបានភ្ជាប់ជាមួយការដឹងគុណចំពោះបក្សកម្មុយនិស្តប្រជាជន និងកងទ័ពស្ម័គ្រចិត្តវៀតណាម ដែលបានរួមចំណែកដ៏ធំធេង ក្នុងការជួយរំដោះប្រជាជន កម្ពុជា រួចផុតពីរបបប្រល័យពូជសាសន៍ ប៉ុល ពត កាលពី ៤០ឆ្នាំមុន គឺ ៧ មករា ១៩៧៩ ដោយក្នុងរយៈពេល ៤០ឆ្នាំមកនេះ កម្ពុជាបានខិតខំយ៉ាងលំបាក ក្នុងការស្តារកសាង និង អភិវឌ្ឍន៍ប្រទេសជាតិឱ្យមានការរីកចម្រើនដូចពេលបច្ចុប្បន្ន។
ជាមួយគ្នានេះ សម្តេចប្រធានរដ្ឋសភាបានអបអរ សាទរ និងវាយតម្លៃខ្ពស់ចំពោះសមិទ្ធផលដ៏ធំធេង ដែលបក្ស រដ្ឋ រដ្ឋាភិបាល និងប្រជាជនវៀតណាមសម្រេចបាន ក្នុងការកសាង និងអភិវឌ្ឍសេដ្ឋកិច្ច សង្គម ឆ្ពោះទៅរកវឌ្ឍនភាពរុងរឿងយ៉ាងឆាប់រហ័ស។ សម្តេចមានជំនឿថា ក្រោមការដឹកនាំដ៏ភ្លឺស្វាងរបស់បក្សកម្មុយនិស្ត វៀតណាមនឹងបន្តទទួលបានជោគជ័យថ្មីៗថែមទៀតក្នុងការអភិវឌ្ឍប្រទេសជាតិកាន់ តែរុងរឿងថែមទៀត៕
Source: Kampuchea Thmey Daily
0 Comments