កណ្តាល ៖ គួរឲ្យក្ដុកក្ដួលក្នុងចិត្ត ខណៈក្មេងប្រុសពីរនាក់ បានលង់ទឹកស្រះតែមួយ ពេលដែលឪពុក ម្តាយទៅធ្វើការអស់។
ហេតុការណ៍នេះ បានកើតឡើងនៅថ្ងៃទី០៧ ខែមករា ឆ្នាំ២០១៩ វេលាម៉ោងប្រហែល១១និង០០នាទី ចំណុចស្រះទឹក ស្ថិតនៅក្នុងភូមិស្តៅកន្លែង៤ ឃុំដីឥដ្ឋ ស្រុកកៀនស្វាយ ខេត្តកណ្តាល។
ជនរងគ្រោះ០២នាក់ ទី០១.ឈ្មោះ ម៉ុល រក្សា ភេទប្រុស អាយុ០៧ឆ្នាំ ជនជាតិខ្មែរ មុខរបរនៅផ្ទះ មានទីលំនៅភូមិ-ឃុំកើតហេតុខាងលើ (ស្លាប់) ឪពុកឈ្មោះ នង ស្រស់ អាយុ២៩ឆ្នាំ មុខរបរកម្មករឡឥដ្ឋ មានទីលំនៅភូមិ-ឃុំកើតហេតុខាងលើ ម្តាយឈ្មោះ ខុម សៀម អាយុ២៨ឆ្នាំ មុខរបរកម្មករឡឥដ្ឋ មានទីលំនៅភូមិ-ឃុំកើតហេតុខាងលើ និងទី០២.ឈ្មោះ មិ ធារ៉ា ភេទប្រុស អាយុ០៧ឆ្នាំជនជាតិខ្មែរ មុខរបរនៅផ្ទះ មានទីលំនៅភូមិ-ឃុំកើតហេតុខាងលើ(ស្លាប់)។ ឪពុកឈ្មោះ មាស ធារិទ្ធ អាយុ៣៣ឆ្នាំ មុខរបរកម្មករឡឥដ្ឋ មានទីលំនៅភូមិឃុំ-កើតហេតុខាងលើ។ ម្តាយឈ្មោះ រ៉ន ធី អាយុ៣២ឆ្នាំ មុខរបរកម្មករឡឥដ្ឋ មានទីលំនៅភូមិឃុំ-កើតហេតុខាងលើ។
នគរបាលស្រុកកៀនស្វាយបានឲ្យដឹងថា នៅថ្ងៃខែឆ្នាំ និងវេលាកើតហេតុខាងលើ ឪពុកម្ដាយ ជនរងគ្រោះបានចេញពីធ្វើការមកផ្ទះមិនឃើញកូន ក៏នាំគ្នាដើររកតែរកមិនឃើញបានមកដាក់ពាក្យបណ្ដឹងនៅប៉ុស្តិ៍នគរបាល រដ្ឋបាលដីឥដ្ឋ។
លុះដល់ថ្ងៃទី០៨ ខែមករា ឆ្នាំ២០១៩ វេលាម៉ោង១០និង៣០នាទី ឪពុកម្ដាយជនរងគ្រោះបានប្រទះឃើញសពកូនទាំងពីរនៅក្នុងទឹកស្រះ ក៏នាំគ្នាស្រង់យកមកផ្ទះ និងបានរាយការណ៍ជូនសមត្ថកិច្ចប៉ុស្តិ៍នគរបាលរដ្ឋបាលដីឥដ្ឋ។ បន្ទាប់ពីទទួលបានព័ត៌មានកម្លាំងជំនាញសហការ ជាមួយកម្លាំងប៉ុស្តិ៍អាជ្ញាធរមូលដ្ឋាន គ្រូពេទ្យប្រចាំឃុំ និងក្រុមគ្រួសារជនរងគ្រោះចុះពិនិត្យសាកសព រួចបានបញ្ជាក់ថា ៖ សាកសពពុំមានស្លាកស្នាមអ្វីគួរឲ្យកត់សំគាល់ទេ។
ការសន្និដ្ឋានរបស់លោកគ្រូពេទ្យ និងជំនាញជនរងគ្រោះស្លាប់ដោយសារលង់ទឹក។ សព ត្រូវបានប្រគល់ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments