កណ្ដាល ៖ ក្មេងប្រុស២នាក់ បានលង់ទឹកស្រះស្លាប់ ខណៈពេលសពក្មេងប្រុសទាំង២នាក់នេះ ហើមអណ្ដែត ហើយក្រុមគ្រួសារប្រទះឃើញនៅវេលាម៉ោង១០និង៣០នាទី ថ្ងៃទី០៨ ខែមករា ឆ្នាំ២០១៩ ស្ថិតនៅក្នុងភូមិស្តៅកន្លែង៤ ឃុំដីឥដ្ឋ ស្រុកកៀនស្វាយ ខេត្តកណ្តាល។
ជនរងគ្រោះ ទី១-ឈ្មោះ ម៉ុល រក្សា ភេទប្រុស អាយុ០៧ឆ្នាំ ជនជាតិខ្មែរ មុខរបរនៅផ្ទះ(ស្លាប់)។ ឪពុកឈ្មោះ នង ស្រស់ អាយុ២៩ឆ្នាំ មុខរបរកម្មករឡឥដ្ឋ។ ម្ដាយឈ្មោះ ខុម សៀម អាយុ២៨ឆ្នាំមុខរបរកម្មករឡឥដ្ឋ មានទីលំនៅភូមិឃុំកើតហេតុខាងលើ និងជនរងគ្រោះទី២-ឈ្មោះ មិ ធារ៉ា ភេទប្រុស អាយុ០៧ឆ្នាំ ជនជាតិខ្មែរ មុខរបរនៅផ្ទះ (ស្លាប់)។ ឪពុកឈ្មោះ មាស ធារិទ្ធ អាយុ៣៣ឆ្នាំ
មុខរបរកម្មករឡឥដ្ឋ។ ម្តាយឈ្មោះ រ៉ន ធី អាយុ៣២ឆ្នាំ មុខរបរកម្មករឡឥដ្ឋ។ មានទីលំនៅភូមិ/ឃុំកើតហេតុខាងលើ។
ក្រុមគ្រួសារសពបានយំរៀបរាប់ថា នៅថ្ងៃទី៧ ខែមករា ឆ្នាំ២០១៩ វេលាម៉ោង៧ព្រឹក ឪពុកម្ដាយជនរងគ្រោះបានចេញពីធ្វើការ លុះពេលត្រឡប់មកផ្ទះវិញ មិនឃើញកូន ក៏នាំគ្នាដើររកកូនគ្រប់ច្រកល្ហក តែរកមិនឃើញ រួចបានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលដីឥដ្ឋ។ លុះដល់ថ្ងៃទី០៨ ខែមករា ឆ្នាំ២០១៩ វេលាម៉ោង១០និង៣០នាទី ឪពុកម្ដាយជនរងគ្រោះ បានប្រទះឃើញសពកូនទាំងពីរនៅក្នុងទឹកស្រះ ក៏នាំគ្នាស្រង់យកមកផ្ទះ និងបានរាយការណ៍ជូនសមត្ថកិច្ចប៉ុស្តិ៍នគរបាល
រដ្ឋបាលដីឥដ្ឋ។
បន្ទាប់ពីទទួលបានព័ត៌មាននេះ កម្លាំងជំនាញ សហការជាមួយកម្លាំងប៉ុស្តិ៍អាជ្ញាធរមូលដ្ឋាន គ្រូពេទ្យប្រចាំឃុំ និងក្រុមគ្រួសារជនរងគ្រោះ ចុះពិនិត្យសាកសព និងបានបញ្ជាក់ថា ៖ សាកសពពុំមានស្លាកស្នាមអ្វីគួរឲ្យកត់សំគាល់ទេ។ តាមការសន្និដ្ឋានរបស់លោកគ្រូពេទ្យ និងប៉ូលិសជំនាញជនរង
គ្រោះស្លាប់ដោយសារលង់ទឹក៕
Source: Kampuchea Thmey Daily
0 Comments