ព្រះសីហនុ ៖ ស្របពេលដែល ការដាក់កុងត្រូលរបស់កម្លាំងប្រដាប់អាវុធយោធា និង ប៉ូលិស ជាច្រើននាក់ក្នុងតំបន់ដីព្រៃក្បាលឆាយ ជាប់ព្រំប្រទល់តំបន់តាលៈ ឃុំរាម ស្រុកព្រៃនប់ នៅតែបន្តកើតមាន ក្នុងគោលដៅ ការពារក្រុមអ្នកមានលុយមានអំណាច ធ្វើការសកម្មភាពឈូសឆាយ រំលោភបំពានយកដីព្រៃឈើរបស់រដ្ឋ ដោយខុសច្បាប់នោះ លោក ឆាយ គុន្ធ ដា អភិបាល នៃគណៈអភិបាលស្រុកស្ទឹងហាវ នៅតែធ្វើការបដិសេធថា មិនមានកុងត្រូលដូចការចោទប្រកាន់នោះទេ។
មន្ត្រីរដ្ឋបាលព្រៃឈើ កាលពីព្រឹកថ្ងៃទី០៦ ខែមករា ឆ្នាំ២០១៩ បានធ្វើការបញ្ជាក់ថា កុងត្រូលនៅតំបន់ខាងលើ ពិតជាមានមែន ហើយកុងត្រូលនោះ មិនមានមន្ត្រីរដ្ឋបាលព្រៃឈើនោះទេ គឺមានតែសមត្ថកិច្ច យោធា និង ប៉ូលិសប៉ុណ្ណោះ ដោយកម្លាំងសមត្ថកិច្ចខាងលើនេះ ជារបស់រដ្ឋបាលស្រុកស្ទឹងហាវ គឺដាក់ការពារគ្រឿងចក្រឈូសឆាយដី ឲ្យ លោកជំទាវដ៏មានឥទ្ធិពលម្នាក់នៅក្រុងភ្នំពេញ ទំហំប្រមាណ២០០ហិកតា។
ពាក់ពន្ធ័ករណីខាងលើនេះ មន្ត្រីរដ្ឋព្រៃឈើដដែលបានបន្តទៀតថា លោកជំទាវនោះ មានឥទ្ធិពលណាស់ សូម្បីតែនៅក្បែរគ្រឿងចក្រ ក៏មានក្រុមទាហានប្រដាប់ដាយអាវុធ៤ ទៅ៥នាក់ ឈរចាំការពារដែរ ដូចនេះសម្រាប់មន្ត្រីរដ្ឋបាលព្រៃឈើ មិនហ៊ានចូលទៅហាមឃាត់នោះទេ បើទោះជាដឹងថា ដីតំបន់នោះជាដីតំបន់ហាមឃាត់ ជាដីព្រៃឈើរបស់រដ្ឋក៏ដោយ ព្រោះខ្លាចធ្លាក់បុណ្យស័ក្ដិ គឺមានតែបណ្ដែតបណ្ដោយឲ្យធ្វើអ្វីតាមតែអំពើចិត្តចុះ ដើម្បីខ្លួនបានសុខ។
ជួបជាមួយក្រុមអ្នកដាក់កុងត្រូលខាងលើ ពួកគេបាននិយាយថា ការដាក់នេះគឺធ្វើតាមតែបញ្ជាលោក ឆាយ សុគុន្ធដា អភិបាលស្រុកស្ទឹងហាវតែប៉ុណ្ណោះ ដូចនេះមានបញ្ហាអ្វី ឬ ចង់ដឹងច្បាស់ សូមទៅសួរនាំលោកចៅហ្វាយស្រុកចុះ។
លោក ឆាយ សុគន្ធដា អភិបាល នៃគណៈអភិបាលស្រុកស្ទឹងហាវជុំវិញបញ្ហាខាងលើនេះ លោកបានធ្វើការបដិសេធទាំងស្រុងថា រូបលោកមិនអនុញ្ញាតឲ្យដាក់កម្លាំងនៅតំបន់ទីនោះទេ ពីព្រោះដីនោះ ជាដីព្រៃឈើរបស់រដ្ឋ ហើយសម្រាប់កងកម្លាំងប្រដាប់អាវុធ ក៏លោកមិនបញ្ជាឲ្យទៅយាមការពារនៅទីនោះដែរ។ ប៉ុន្តែកន្លងមក មានក្រុមកងកម្លាំងប្រដាប់អាវុធប៉ូលិស កងរាជអាវុធហត្ថ និងយោធាសឹករងស្រុកទៅទីនោះ ក្នុងពេលចុះដោះស្រាយទំនាស់ដីធ្លីប៉ុណ្ណោះ ក្រៅពីនេះ គឺមិនមានទេ។
គួរបញ្ជាក់ផងដែរថា ដីតំបន់ខាងលើនេះ ដើមឡើយ ជាតំបន់អនាធិបតេយ្យយ៉ាងស្រួចស្រាល់ ប៉ុន្តែក្រោយមក ត្រូវបានរដ្ឋបាលខេត្តព្រះសីហនុ មកចុះបោសសម្អាត និងធ្វើការរុះរើគ្មានសល់ ហើយបច្ចុប្បន្នដីតំបន់នោះ ដែលមានទំហំប្រមាណ៣.០០០ពាន់ហិកតា ត្រូវបានរដ្ឋបាលខេត្តប្រគល់ឲ្យរដ្ឋបាលព្រៃឈើ ធ្វើការដាំដុះដើមឈើឡើងវិញ តាមការស្នើសុំរបស់ក្រសួងកសិកម្ម ដូច្នេះមិនមានបុគ្គលណាយកដីនៅតំបន់នោះធ្វើជាកម្មសិទ្ធិឯកជនបានទេ៕
Source: Kampuchea Thmey Daily
0 Comments