កណ្តាល ៖ នគរបាលស្រុកស្អាង បានធ្វើការចាប់ឃាត់ខ្លួនបុរសម្នាក់ ដែលបានប្រើអំពើហិង្សាយកកាំភ្លើងភ្ជង់ក្បាលប្រពន្ធអូសរុញបញ្ចូលឡាន ព្រោះតែរឿងប្លង់ដីក្នុងរឿងក្តីលែងលះគ្នា។
អំពើហិង្សានេះ កើតឡើងនៅថ្ងៃ អង្គារ ០៣កើត ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ០៨ ខែមករា ឆ្នាំ២០១៩ វេលាម៉ោង១៥និង៣៥នាទី នៅចំណុច ភូមិព្រែកខ្សេវ ឃុំរកាខ្ពស់ ស្រុកស្អាង ខេត្តកណ្តាល។
លោកវរសេនីយ៍ឯក សេង សុជាតិ អធិការនគរបាលស្រុកស្អាងបានឲ្យដឹងថា ជនរងគ្រោះ ឈ្មោះ នួន ដានី ភេទស្រី អាយុ២៨ឆ្នាំ ជនជាតិខ្មែរ មុខរបរមេផ្ទះ ទីលំនៅភូមិ ព្រែកខ្សេវ ឃុំរកាខ្ពស់ ស្រុកស្អាង ខេត្តកណ្តាល។
ជនសង្ស័យ ឈ្មោះ ឆាយ សាលាភ ភេទប្រុស អាយុ៣៣ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅភូមិ ព្រែកខ្សេវ ឃុំរកាខ្ពស់ ស្រុកស្អាង ខេត្តកណ្តាល។ រីឯ វត្ថុតាងចាប់យក ១,កាំភ្លើងខ្លី ចំនួន ០១ដើម មិនស្គាល់ម៉ាក គ្មានលេខ បង់ចំនួន០១ មានគ្រាប់ចំនួន០៤គ្រាប់។ ២,រថយន្ត ចំនួន០១គ្រឿង ម៉ាក តូយូតា ព្រីស ពណ៌ទឹកប្រាក់ ពាក់ស្លាកលេខ ភ្នំពេញ 2AX - 4029 និងកូនសោរថយន្តចំនួន០១។
បើតាមលោកអធិការបានឲ្យដឹងថា កាលពីថ្ងៃទី០៣ ខែធ្នូ ឆ្នាំ២០១៨ ឈ្មោះ ឆាយ សាលាភ (ប្តី) និងឈ្មោះ នួន ដានី (ប្រពន្ធ) បានព្រមព្រៀងធ្វើកិច្ចសន្យាលែងលះគ្នា នៅសាលាឃុំរកាខ្ពស់។
លុះនៅថ្ងៃទី០៨ ខែមករា ឆ្នាំ២០១៩ វេលាម៉ោង១៥និង៣៥នាទី ឈ្មោះ ឆាយ សាលាភ បានជិះរថយន្តមួយគ្រឿង ម៉ាកតូយូតាព្រីស ពណ៌ទឹកប្រាក់ពីភ្នំពេញ មកផ្ទះឈ្មោះ នួន ដានី ស្ថិតក្នុងភូមិ ព្រែកខ្សេវ ឃុំរកាខ្ពស់ ស្រុកស្អាង ខេត្តកណ្តាល។ ពេលមកដល់ ឈ្មោះ ឆាយ សាលាភ បានសួរ ឈ្មោះ នួន ដានី រកប្លង់ផ្ទះ ដែលស្ថិតនៅបូរីចំការដូង ដើម្បីដាក់លក់ផ្ទះ នៅការិយាល័យបូរីចំការដូង ពេលជាមួយគ្នានោះ ឈ្មោះ នួន ដានី មិនទៅតាម ទើបឈ្មោះ ឆាយ សាលាភ កាន់កាំភ្លើងខ្លីអាមេបញ្ចូលគ្រាប់ភ្ជង់ ឈ្មោះ នួន ដានី រួចចាប់គ្រៀក ដើម្បីឲ្យចូលរថយន្តរបស់ខ្លួន ទន្ទឹមនឹងនោះមានប្រជាពលរដ្ឋជាច្រើននាក់បានឃាត់រថយន្ត ហើយដណ្តើមបានអាវុធពី ឈ្មោះ ឆាយ សាលាភ និងជួយឈ្មោះ នួន ដានី ចេញពីរថយន្តមកវិញ។ ចំណែកឈ្មោះ ឆាយ សាលាភ បានរត់គេចខ្លួន។
លោកបញ្ជាក់ថា ពេលទទួលបានព័ត៌មានខាងលើ សមត្ថកិច្ចនគរបាលប៉ុស្តិ៍រកាខ្ពស់ សហការជាមួយកម្លាំងអន្តរាគមន៍ស្រុកស្អាង បានឃាត់ខ្លួន ឈ្មោះ ឆាយ សាលាភ បញ្ជូនមកអធិការដ្ឋាននគរបាលស្រុកស្អាង ដើម្បីសាកសួរ។
នៅចំពោះមុខ សមត្ថកិច្ចនគរបាល ឈ្មោះ ឆាយ សាលាភ សារភាពថា ខ្លួនបានទិញអាវុធខ្លីនេះ ពីឈ្មោះ រាក់ ភេទប្រុស អាយុ១៤ឆ្នាំ តម្លៃ៣០ដុល្លារ នៅចំណុចវាលខ្សាច់ ចាក់អង្រែលើ កាលពីឆ្នាំ២០១៦ ដើម្បីទុកនៅផ្ទះភូមិព្រែកខ្សេវ ឃុំរកាខ្ពស់ និងបានជិះរថយន្ត យកអាវុធខ្លីខាងលើភ្ជង់គំរាមឈ្មោះ នួន ដានី ពិតប្រាកដមែន។
ឈ្មោះ ឆាយ សាលាភ សារភាពបន្ថែមទៀតថា ខ្លួនពិតជាបានជក់គ្រឿងញៀនប្រភេទម៉ាទឹកកករយៈពេល០៦ខែកន្លងមកហើយ៕
Source: Kampuchea Thmey Daily
0 Comments