លោកអភិបាលរងស្រុកបរិបូណ៌ និងលោកមេឃុំឆ្នុកទ្រូ ប្រឈមដាក់គ្នា ក្នុងរឿងចែកដីឲ្យពលរដ្ឋ២៧២គ្រួសារ

កំពង់ឆ្នាំង ៖ លោក ថាន់ សារុំ អភិបាលរងស្រុកបរិបូណ៌ និងលោក សាំង គឹមស៊ន មេឃុំឆ្នុកទ្រូកាលពីថ្ងៃទី០៥ ខែមករា ឆ្នាំ២០១៩ បានប្រឈមដាក់គ្នាទៅវិញទៅមកក្នុងរឿង ចែកដី និងឈូសឆាយដីលំនៅដ្ឋាន ជូនប្រជាពលរដ្ឋចំនួន២៧២គ្រួសារ នៅចំណុចយុគន្ធរភូមិឆ្នុកទ្រូ ដែលបានបម្លាស់ទីផ្ទះទឹកឡើងមករស់នៅលើគោក គឺជារឿងត្រីងៀតឆ្លៀតពង និងកន្ទេលធំបន្លំដេក។

ទាក់ទងនឹងរឿងនេះ លោក ថាន់ សារ៉ុម អភិបាលរងស្រុកបរិបូណ៌នៅព្រឹកថ្ងៃទី០៩មករានេះ បាននិយាយប្រាប់ក្រុមអ្នកព័ត៌មានយើងដឹងថា កាលពីថ្ងៃទី០៥ ខែមករា លោក និងមន្ត្រីសាលាស្រុកម្នាក់ បានចុះទៅចំណុចចែកដីឲ្យប្រជាពលរដ្ឋនៅក្នុងចំយុគន្ធរភូមិឆ្នុកទ្រូ ព្រោះតែបានដឹងថា លោក សាំង គឹមស៊ន មេឃុំឆ្នុកទ្រូកំពុងធ្វើបាបប្រជាពលរដ្ឋ។

ក្នុងព្រឹកនោះដែរ លោកក៏បានហៅអាត្រាក់១គ្រឿង ចុះទៅជួយឈូសដីលំនៅដ្ឋានជូនប្រជាពលរដ្ឋ ដោយក្នុង១ម៉ោង គេយកថ្លៃឈូសដីតែ៩ម៉ឺនរៀលទេ វាខុសពីលោកមេឃុំឆ្នុកទ្រូ បង្ខំឲ្យប្រជាជនជួលអាត្រាក់បក្សពួកខ្លួន ឈូសដី១ម៉ោង១៣ម៉ឺនរៀលទៅវិញ។ ស្រាប់តែពេលអាត្រាក់យកតម្លៃថោកចូលទៅឈូសដីឲ្យប្រជាពលរដ្ឋ ក៏លេចមុខ លោក សាំង គឹម ស៊ន មេឃុំឆ្នុកទ្រូ និងលោក សេង ឌី មេប៉ុស្តិ៍នគរបាលឆ្នុកទ្រូ ចេញមកឃាត់អាត្រាក់តម្លៃថោកមិនអោយឈូសដី ពេលនោះដែរលោកគ្រូចៅអធិការវត្តយុគន្ធរចេញមកជួយអន្តរាគមន៍ និងបានលើកឡើងថា សូមអាត្រាក់យកថ្លៃថោកឈូសដីឲ្យប្រជាជនទៅ បើអ្នកណាចាប់ ចាំអាត្មាទៅដេកក្នុងគុកជំនួស។

លោកអភិបាលរងស្រុកបានបញ្ជាក់ទៀតថា ចំពោះការឈូសដីចែកប្រជាជនទៀតសោត គឺលោកឃុំឆ្នុកទ្រូ បានធ្វើខុសគោលការណ៍អាជ្ញាធរស្រុក ដែលកំណត់ថា កន្លែងណាមានផ្ទះ ទើបអនុញ្ញាតឲ្យឈូសដី គឺក្នុង១គ្រួសារទទួលដីបានក្បាល១០ម៉ែត្រ បណ្តោយ៧៥ម៉ែត្រ។ ប៉ុន្តែក្នុងពេលលោកចុះទៅពិនិត្យឃើញកន្លែងខ្លះ អត់មានផ្ទះប្រជាជនផង ក៏លោកមេឃុំឲ្យគេឈូសដីព្រៃអស់ដែរ ដែលគេសង្ស័យថា ការឈូសដីរាប់ហិកតានេះ គឺទុកលក់របស់បក្សពួកលោកមេឃុំ។

ទាក់ទងនឹងការប្រឈមគ្នាខាងលើនេះ នៅព្រឹកថ្ងៃទី០៩មករានេះដែរ លោក សាំង គឹមស៊ន មេឃុំឆ្នុកទ្រូ បានបញ្ជាក់ឲ្យដឹងនៅក្នុងសាលាឃុំថា ការពិតលោកមិនបានហាមឃាត់ត្រាក់ទ័រថ្លៃ ឬថោកដែលចូលមកឈូសដីនៅចំណុចយុគន្ធរក្នុងភូមិឆ្នុកទ្រូជូនប្រជាពលរដ្ឋនោះឡើយ។ ប៉ុន្តែពេលអ្នកនាំអាត្រាក់នោះចូលមកសូមទាក់ទងឲ្យអាជ្ញាធរឃុំដឹងផង ហើយរឿងចង់យកអាត្រាក់ឈូសដីតម្លៃថ្លៃ ឬថោក គឺជាសិទ្ធិប្រជាពលរដ្ឋ។

រឿងលោកអភិបាលរងស្រុកនាំអាត្រាក់មក លោកពិតជាបាននិយាយមែនថា គាត់ចង់ធ្វើជាមេឃុំផង ធ្វើអភិបាលស្រុកផងឬ បានជាចុះមកមិនឲ្យអាជ្ញាធរឃុំដឹង។

ដោយឡែក ទាក់ទងនឹងការឈូសដីដែលអត់ទាន់មានផ្ទះប្រជាពលរដ្ឋនោះ គឺលោកមេឃុំ ពិតជាបានឈូសដីទុកចែកជូនប្រជាពលរដ្ឋចំនួន៨៥គ្រួសារ កំពុងរស់នៅជិតវត្តយុគន្ធរ ដែលពួកគាត់មានផ្ទះចាស់ៗទ្រុឌទ្រោមមិនអាចរើរុះភ្លាមមកនៅលើដីដែលបានចែកឲ្យបាន។ ដោយពួកគាត់សំណូមពរនៅពេលទឹកឡើង ទើបគាត់អូសផ្ទះពួកគាត់ឡើងមករស់នៅលើដីឃុំ ស្រុក ដែលបានចែកឲ្យ។

ទាក់ទងនឹងការប្រឈម និងជះទឹកដាក់គ្នាខាងលើនេះ សូមលោក ឃួន សៅរុំ អភិបាលស្រុកបរិបូណ៌ជាអ្នកទទួលខុស និងទទួលត្រូវ រួមទាំងអស់នោះ មេត្តាជួយពិនិត្យដោះស្រាយ និងផ្សះផ្សាផង កុំឲ្យអាជ្ញាធរស្រុក និងអាជ្ញាធរឃុំបែកបាក់សាមគ្គីគ្នា គួរតែធ្វើការរួមគ្នា ជួយដោះស្រាយទុក្ខកង្វល់របស់ប្រជាពលរដ្ឋដែលកំពុងលំបាក ទើបសមស្របជាថ្នាក់ដឹកនាំបម្រើប្រជាពលរដ្ឋ៕