ពលរដ្ឋឃុំឆ្នុកទ្រូ រិះគន់លោកមេឃុំ ផ្ដល់ដីព្រៃលិចទឹករបស់រដ្ឋឲ្យក្រុមហ៊ុនឯកជន បុកអណ្តូងយកទឹកលក់ឲ្យ ដើម្បីផលប្រយោជន៍បក្សពួកខ្លួន

កំពង់ឆ្នាំង ៖ នៅក្នុងសប្ដាហ៍នេះ ប្រជាពលរដ្ឋរស់នៅក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ បានធ្វើការរិះគន់ថា លោកមេឃុំឆ្នុកទ្រូ ស្រុកបរិបូណ៌ បានផ្ដល់ដីព្រៃលិចទឹករបស់រដ្ឋទៅឲ្យក្រុមហ៊ុនឯកជនមួយដែលជាបក្សពួករបស់ខ្លួន បុកអណ្ដូងផលិតទឹកស្អាតលក់ឲ្យប្រជាពលរដ្ឋ ដើម្បីតែផលប្រយោជន៍ក្រុមគ្រួសារពួកខ្លួនតែប៉ុណ្ណោះ ស្នើសុំអាជ្ញាធរស្រុក និងខេត្តជួយពិនិត្យទប់ស្កាត់ផង។

ប្រជាពលរដ្ឋបានលើកឡើងថា ដីព្រៃលិចទឹករបស់ប្រមាណ៥០ម៉ែត្រ បួនជ្រុង ត្រូវបាន លោក សាំង គឹមស៊ន មេឃុំឆ្នុកទ្រូ អនុញ្ញាតឲ្យក្រុមហ៊ុនឯកជនមួយ បុកខួងធ្វើអណ្ដូង យកមកលក់ឲ្យប្រជាពលរដ្ឋដើម្បីតែផលប្រយោជន៍បក្សពួកក្រុមគ្រួសាររបស់គាត់ ដែលប្រជាពលរដ្ឋមិនសង្ឃឹមថា ការបុកអណ្ដូងទឹកនេះ អាចបម្រើផលប្រយោជន៍របស់ប្រជាពលរដ្ឋ ច្រើនជាងផលប្រយោជន៍បុគ្គលនោះឡើយ។

ប្រជាពលរដ្ឋ សំណូមពរ អាជ្ញាធរស្រុកខេត្ត និងអង្គភាពជំនាញពាក់ព័ន្ធចុះមកពិនិត្យ ដោះស្រាយធ្វើកុងត្រាឲ្យបានច្បាស់លាស់ ផ្សព្វផ្សាយជាសាធារណៈឲ្យប្រជាពលរដ្ឋបានដឹងឮផង កុំធ្វើស្ងាត់ៗបែបនេះ ប្រជាពលរដ្ឋមិនគាំទ្រឡើយ។

ពាក់ព័ន្ធនឹងការរិះគន់ខាងលើនេះ លោក សាំង គឹមស៊ន មេឃុំឆ្នុកទ្រូនៅព្រឹកថ្ងៃទី០៩មករានេះនៅក្នុងសាលាឃុំឆ្នុកទ្រូ បានបញ្ជាក់ឲ្យក្រុមអ្នកយកព័ត៌មានយើងឲ្យដឹងថា តាមគោលការណ៍ឯកភាពរបស់អាជ្ញាធរស្រុក គឺឲ្យក្រុមហ៊ុនឯកជនមួយនេះមកអភិវឌ្ឍន៍ ធ្វើអាជីវកម្មបុកអណ្ដូងផលិតទឹកស្អាតដើម្បីលក់ក្នុងតម្លៃថោកៗ ចែកជូនប្រជាពលរដ្ឋនៅក្នុងឃុំឆ្នុកទ្រូបានប្រើប្រាស់តាមតម្រូវការ ព្រោះតែនៅក្នុងតំបន់ឃុំឆ្នុកទ្រូនេះមិនទាន់មានទឹកស្អាតសម្រាប់ឲ្យប្រើប្រាស់នៅឡើយ ប្រើប្រាស់តែទឹកទន្លេ ដែលធ្វើឲ្យប្រជាពលរដ្ឋជួបលំបាកក្នុងជីវភាពរស់នៅ។

លោកមេឃុំបានបញ្ជាក់ឲ្យដឹងទៀតថា តាមគោលការណ៍អាជ្ញាធរស្រុក គឺបានឯកភាពឲ្យឈូសឆាយដីព្រៃ តែ២០ម៉ែត្របួនជ្រុង តែប៉ុណ្ណោះ ដើម្បីធ្វើទីតាំងផលិតទឹកស្អាតខាងលើនេះ។ ប៉ុន្តែជាក់ស្ដែងពេលខួងបុកអណ្ដូងនៅចំណុចទាល់តែមានអណ្ដូងចំនួន៣កន្លែង ទើបធានាទឹកអាចប្រើប្រាស់បាន។

ដូច្នេះទីតាំងនេះ ត្រូវតែរីកធំបន្តិចទៀត ដើម្បីឲ្យកន្លែងខួងអណ្ដូងមានគម្លាតឆ្ងាយពីគ្នាទើបអនុវត្តន៍គម្រោងការនេះបាន ហើយពេលនេះទីតាំងដែលត្រូវធ្វើកន្លែងផលិតទឹកស្អាតនោះមានទំហំតែ៤០ ម៉ែត្របួនជ្រុងប៉ុណ្ណោះ។

ដោយឡែក តាមគោលការណ៍របស់ឃុំ និងស្រុក នៅពេលក្រុមហ៊ុនផលិតទឹកស្អាតនេះដំណើរការ គឺកំណត់ឲ្យលក់ទឹកស្អាតជូនប្រជាពលរដ្ឋ តែក្នុងមួយធុងចំណុះ២២០លីត្រ ថ្លៃ២.០០០រៀល ទៅ២.៥០០រៀលតែប៉ុណ្ណោះ ខណៈដែលទឹកដែលប្រជាពលរដ្ឋកំពុងទិញប្រើប្រាស់សព្វថ្ងៃនេះមានតម្លៃក្នុងធុងរហូតដល់៦.០០០រៀល។

ទោះបីមានការបកស្រាយរបស់លោកឃុំឆ្នុកទ្រូ យ៉ាងនេះក៏ដោយ ប្រជាពលរដ្ឋសំណូមពរដល់ អាជ្ញាធរ ស្រុក ខេត្ត និងអង្គភាពជំនាញពាក់ព័ន្ធ មេត្តាចុះមកពិនិត្យ ដោះស្រាយ ធ្វើកិច្ចសន្យាឲ្យបានច្បាស់លាស់ ជាមួយក្រុមហ៊ុន ដើម្បីផ្សព្វផ្សាយជាសាធារណៈឲ្យប្រជាពលរដ្ឋបានដឹងឮផង ដើម្បីកុំឲ្យក្រុមហ៊ុនពេលផលិតទឹកស្អាតបានហើយ ចេះតែលក់តំឡើងថ្លៃតាមទំនើងចិត្ត៕