កំពង់ឆ្នាំង ៖ ក្រោយពីទទួលបរាជ័យចំនួនពីរលើក ក្នុងមុខរបរចិញ្ចឹមមាន់កន្លងមកនេះ លោក គៀន វាសនា អាយុ៣៦ឆ្នាំ រស់នៅភូមិខ្លែងពណ៌ ឃុំត្រងិល ស្រុកកំពង់លែង បានក្រោកឡើងតស៊ូចិញ្ចឹមមាន់ម្តងទៀត ដោយសង្ឃឹមថា លោកនឹងទទួលបានជោគជ័យ ព្រោះលោកបានព្យាយាមរៀនសូត្រពីកសិដ្ឋានចិញ្ចឹមមាន់នានា និងមានបទពិសោធន៍គ្រប់គ្រាន់ក្នុងការចិញ្ចឹមមាន់ ដោយសង្ឃឹមថានឹងទទួលបាននូវភាពជោគជ័យ ព្រោះការបរាជ័យ គឺជាបទពិសោធន៍ ដើម្បីឈានទៅរកភាពជោគជ័យ ។
លោក គៀន វាសនា នៅព្រឹកថ្ងៃទី០៧ ខែមករា ឆ្នាំ២០១៩ នេះបានបញ្ជាក់ឲ្យដឹងថា កាលពីពីរ បីឆ្នាំមុន លោកធ្លាប់បានចិញ្ចឹមមាន់រាប់ពាន់ក្បាលផងដែរ ប៉ុន្តែដោយការខ្វះបច្ចេកទេស និងបទពិសោធន៍ ក្នុងការថែរក្សា និងបំប៉នមាន់ បានធ្វើឲ្យលោកទទួលបរាជ័យដោយបានខាតបង់ប្រាក់ជាង៣.០០០ដុល្លារ។ ប៉ុន្តែពេលនេះ មិនដូចមុនទេ លោកបានដើររៀនសូត្រនូវបច្ចេកទេសចិញ្ចឹមមាន់ពីកសិដ្ឋាននានា នៅក្នុងស្រុក និងនៅតាមខេត្តមួយចំនួន ក្រោមការចង្អុលបង្ហាញពីលោកប្រធានការិយាល័យកសិកម្មស្រុកកំពង់លែង ដែលមកដល់ពេលនេះលោកបានធ្វើទ្រុងមាន់ធំៗ៣ទ្រុង ដោយបានទិញកូនមាន់ស្រែពូជនៅក្នុងស្រុកចំនួនមួយពាន់ក្បាលមកចិញ្ចឹម។
ដោយឡែក លោក ក៏បាន ទិញពូជមាន់មុងហ្គោលីឆ្អឹងខ្មៅសាច់ខ្មៅ ចំនួន១៤ក្បាលមកចិញ្ចឹមសាកល្បងផងដែរ ដែលមាន់ក្រមុំ១ក្បាល លោកទិញពីគេមកក្នុងតម្លៃ៣០ដុល្លារ និងបារ មួយក្បាល៤០ដុល្លារ។
មាន់ម៉ុងហ្គោលីនេះ ចិញ្ចឹមគឺឆាប់ធំធាត់ ហើយតម្លៃវាក៏លក់បានថ្លៃផងដែរក្នុង១គីឡូ អាចលក់បានថ្លៃ៣ម៉ឺនរៀល។ ចំណែកកូនវាភ្ញាស់មកក្នុងរយៈពេលមួយខែ ក៏អាចលក់បានក្នុងកូនមួយក្បាលៗ ៤ម៉ឺនរៀលផងដែរ។
ទាក់ទងនឹងការចិញ្ចឹមមាន់ពេលនេះ លោកបានកែច្នៃធ្វើម៉ាស៊ីនកិនចំណីមាន់ដោយខ្លួនឯង ដោយរកបន្លែធម្មជាតិនៅក្នុងស្រុក មានដូចជា ត្រកួនកំប៉ោង ពោត កន្ទក់ និងចុងអង្ករជាដើម យកមកកិនបញ្ចូលគ្នាធ្វើជាចំណីមាន់ ហើយលោកក៏មានជាម៉ាស៊ីនសូនចំណីមាន់ជាគ្រាប់ៗផងដែរ សម្រាប់ទុកឲ្យមាន់ស៊ីនៅរដូវដែលខ្សត់បន្លែ។
លោកបានបញ្ជាក់ថា ក្នុងការចិញ្ចឹមមាន់ពេលនេះ លោកក៏បានទិញជន្លេនក្រហម ដែលជាចំណីពិសេស និងក៏ជាថ្នាំពិសេសសម្រាប់ឲ្យមាន់ស៊ី ដើម្បីមានសុខភាពល្អគ្មានជំងឺរាតត្បាត និងក៏ឆាប់ធំធាត់ល្អផងដែរ ដោយលោកសង្ឃឹមថា នៅក្នុងរដូវចូលឆ្នាំខ្មែរខាងមុខនេះ លោកនឹងមានមាន់សាច់ជាង១ពាន់ក្បាល សម្រាប់លក់ចេញ ដែលអាចរកប្រាក់ចំណូលបានពី៤ទៅ៥ពាន់ដុល្លារ សម្រាប់ផ្គត់ផ្គង់គ្រួសារ និងសម្រាប់ពង្រីកមុខរបរចិញ្ចឹមជាបន្តបន្ទាប់ទៀត។
លោក សុខ រិន ប្រធានការិយាល័យកសិកម្មកំពង់លែងបានឲ្យដឹងថា មកដល់ពេលនេះ ក្នុងស្រុកកំពង់លែង ដែលមានឃុំចំណុះចំនួន៥ឃុំ មានកសិករចិញ្ចឹមមាន់ជាង១០កន្លែងហើយ ក្នុងនោះពួកគាត់ចិញ្ចឹមមាន់ជាលក្ខណៈគ្រួសារ និងជាកសិដ្ឋានខ្នាតតូច ដោយពួកគាត់បានទំនាក់ទំនង និងសហការជាមួយគ្នាដើម្បីផ្លាស់ប្ដូរបទពិសោធន៍ ពីគ្នាទៅវិញទៅមកក្នុងការចិញ្ចឹមមាន់ស្រែខាងលើនេះ ឲ្យទទួលបានភាពជោគជ័យ សម្រាប់កាត់បន្ថយជីវភាពរស់នៅក្នុងគ្រួសារ។
លោកប្រធានការិយាល័យកសិកម្មកំពង់លែង ក៏បានអំពាវនាវផងដែរ ដល់ប្រជាកសិករយើងដែលប្រកបមុខរបរចិញ្ចឹមមាន់ ប្រសិនបើមានបញ្ហាអ្វីជួបការលំបាកនៅក្នុងមុខរបរចិញ្ចឹមមាន់ ត្រូវតែរាយការណ៍មកជាបន្ទាន់ ដើម្បីឲ្យមន្ត្រីកសិកម្មស្រុក និងខេត្តជួយដោះស្រាយឲ្យបានទាន់ពេលវេលា៕
Source: Kampuchea Thmey Daily
0 Comments