ឧត្តរមានជ័យ៖ មានករណីហិង្សាមួយកើតឡើង នៅចំណុចភូមិអូរគគីលើ ឃុំលំទង ស្រុកអន្លង់វែង ខេត្តឧត្តរមានជ័យ កាលពីវេលាម៉ោង១៨និង៥០នាទីយប់ ថ្ងៃទី០៧ ខែមករា ឆ្នាំ២០១៩ បង្កឡើងដោយជនសង្ស័យចំនួនមួយក្រុម មានគ្នាចំនួន០៤នាក់ បានជិះម៉ូតូម៉ាកវេវ ពណ៌ទឹកប្រាក់លាយខ្មៅ មិនចាំស្លាកលេខចំនួន០១គ្រឿង និង០១គ្រឿងទៀត មិនស្គាល់ម៉ាក ដេញកាប់ជនរងគ្រោះដែលកំពុងជិះម៉ូតូតាមផ្លូវ បណ្តាលឲ្យរងរបួសយ៉ាងធ្ងន់ធ្ងរចំនួន២នាក់។
មន្ត្រីអាវុធហត្ថស្រុកអន្លង់វែងបានឲ្យដឹងថា ជនរងគ្រោះដែលត្រូវជនសង្ស័យកាប់បណ្ដាលឲ្យរងរបួសនោះ មានឈ្មោះដូចខាងក្រោម ៖
១.ឈ្មោះ វិន វ៉ាត ភេទប្រុស អាយុ១៩ឆ្នាំ មុខរបរធ្វើស្រែ នៅភូមិថ្នល់ថ្មី ឃុំអន្លង់វែង ស្រុកអន្លង់វែងបណ្តាលឲ្យរងរបួសលើដៃស្តាំ និងស្លាបប្រជៀវខាងស្តាំ ប្រវែង០៤ស.ម។
២.ឈ្មោះ នុន សុធា ភេទប្រុស អាយុ២២ឆ្នាំ មុខរបរធ្វើស្រែ នៅភូមិថ្នល់ថ្មី ឃុំអន្លង់វែង ស្រុកអន្លង់វែង បណ្តាលឲ្យរងរបួសលើកែងដៃខាងឆ្វេង ប្រវែង០៦ស.ម។ ក្រោយពេលកើតហេតុជនបង្កបានជិះម៉ូតូរត់គេចខ្លួនបាត់ ចំណែកជនរងគ្រោះទាំងពីរ សមត្ថកិច្ចអាវុធហត្ថស្រុកអន្លង់វែង បានបញ្ជូនទៅព្យាបាលនៅមន្ទីរពេទ្យបង្អែកស្រុកអន្លង់វែង។ បច្ចុប្បន្ន អាវុធហត្ថស្រុក កំពុងស្រាវជ្រាវរកជនបង្កយកមកដោះស្រាយគ្នាតាមផ្លូវច្បាប់៕
Source: Kampuchea Thmey Daily
0 Comments