ភ្នំពេញ ៖ បុរសជនជាតិទួរគីម្នាក់ ត្រូវបានកម្លាំងនគរបាលខណ្ឌដូនពេញចាប់ឃាត់ខ្លួន ខណៈដែលបុរសជនបរទេសរូបនោះបានមកអុកឡុកនៅខាងមុខស្ថានទូតរបស់ខ្លួន(ទូតទួរគី) នៅរសៀលថ្ងៃទី០៩ ខែមករា ឆ្នាំ២០១៩ ចំណុចផ្ទះលេខ១+៣ ផ្លូវ២៥៤ ភូមិ៤ សង្កាត់ចតុមុខ ខណ្ឌដូនពេញ រាជធានីភ្នំពេញ។
ប្រភពព័ត៌មានពីកន្លែងកើតហេតុបានឲ្យដឹងថា នៅវេលាកើតហេតុគេឃើញជនបរទេសស្បែកសរូបនោះមិនដឹងថាគាត់មានបញ្ហាអ្វីនោះទេ បានមកស្រែកអុកឡុកនៅខាងមុខស្ថានទូត(ទួរគី)នៅចំណុចកើតហេតុ។ កម្លាំងកម្លាំងប៉ុស្តិ៍នគរបាលរដ្ឋបាលចតុមុខបន្ទាប់ពីទទួលបានព័ត៌មានដូច្នេះហើយ ក៏បានចុះសហការជាមួយការិយាល័យស៊ើបអង្កេត និងអនុវត្តនីតិវិធី នៃស្នងការដ្ឋាននគរបាលរាជធានីភ្នំពេញ នៅចំណុចស្ថានទូតទួរគី ផ្ទះលេខ១+៣ ផ្លូវ២៥៤ ភូមិ៤ សង្កាត់ចតុមុខ ខណ្ឌដូនពេញ រាជធានីភ្នំពេញ ក៏បានឃាត់ខ្លួនជនជាតិទួរគីរូបនោះតែម្តង។
សមត្ថកិច្ចបានបញ្ជាក់ថា ជនបរទេសរូបនោះ ឈ្មោះ MAGDEN EKIMYUSUF ភេទប្រុស អាយុ៤០ឆ្នាំ មុខរបរទេសចរណ៍ កាន់លិខិតឆ្លងដែនលេខU21067826 បានធ្វើការអុកឡុកនៅមុខស្ថានទូតទួរគី និងប្រើទិដ្ឋាការស្នាក់នៅហួសកំណត់។
បច្ចុប្បន្ន ជនជាតិទួរគីខាងលើ បានបញ្ជូនទៅការិយាល័យស៊ើបអង្កេត និងអនុវត្តនីតិវិធី នៃស្នងការដ្ឋាននគរបាលរាជធានីភ្នំពេញដើម្បីចាត់ការបន្ត៕
Source: Kampuchea Thmey Daily
0 Comments