តាកែវ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃកម្ពុជាបានលើកឡើងថា ទិវាជ័យជម្នះ ៧ មករា មិនមែនជាកម្មសិទ្ធិផ្ដាច់មុខរបស់គណបក្សប្រជាជនកម្ពុជា ឬរបស់បុគ្គលណាម្នាក់នោះទេ ពោលជារបស់ប្រជាជនកម្ពុជាទាំងអស់ដែលចង់រស់រានមានជីវិតចេញពីរបបប្រល័យពូជសាសន៍ប៉ុលពត។
ការលើកឡើងរបស់សម្តេចតេជោ ហ៊ុន សែន ជាប្រតិកម្មតបតមួយទៅនឹងសំដីរបស់ប្រធានគណបក្សនយោបាយមួយដែលបានលើកឡើងថា ៧ មករា គេដឹងគុណហើយ តើគេសងគុណដល់ពេលណា។ ប្រតិកម្មតបតនេះធ្វើឡើងក្នុងពិធីជួបសំណេះសំណាលជាមួយកម្មករកម្មការិនីជិត២ម៉ឺននាក់នៅខេត្តតាកែវនាព្រឹកថ្ងៃទី ៩ មករានេះ ។ សម្តេចមានប្រសាសន៍ថា « មានប្រធានគណបក្សនយោបាយមួយ ដោយខ្ញុំមិនចាំបាច់បញ្ចេញឈ្មោះទេ តែគាត់កំពុងតាមដានស្តាប់ហើយ។ ខ្ញុំចង់បញ្ជាក់ថា ៧មករា មិនមែនរបស់គណបក្សប្រជាជនទេ ! ៧មករាគឺជារបស់ប្រជាជនទាំងអស់ដែលចង់រស់ជាមនុស្ស ។ ដូច្នេះ អត់ត្រូវមានអ្នកណាសង អ្នកណាទេ គឺ ៧មករា ជារបស់ជីដូនជីតាជារបស់ឪពុកម្តាយក្មួយហើយជាទ្រព្យសម្បត្តិរបស់ក្មួយៗ។ ៧មករា មិនត្រូវការអ្នកសងទេ តែបញ្ហាសំខាន់នោះ គឺ៧មករា របស់អ្នកទាំងអស់គ្នា»។
បើទោះបីសម្តេចមិនបានបញ្ចេញឈ្មោះប្រធានគណបក្សនយោបាយមួយនោះ ក៏គេដឹកដែរថា ប្រធានគណបក្សដែលនិយាយចេញបែបនេះគឺ លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ។
សម្តេចតេជោនាយករដ្ឋមន្ត្រីបានបន្តថា « ខ្ញុំក៏មិនដែលចាត់ទុក ៧មករា ជារបស់ខ្ញុំ ហើយគណបក្សប្រជាជនក៏មិនដែលចាត់ទុក ៧មករា ជារបស់ខ្លួនទេ តែ ៧មករា ជារបស់រួមរបស់មនុស្សដែលចង់រស់ជាមនុស្ស។ ដើម្បីរក្សាទុកស្មារតី ៧ មករា ទើបគេបោះឆ្នោតរក្សាទុក ប៉ុន្តែមានតែអ្នកចង់ងាប់ទេដែលមិនដឹង។ បើមិនរំដោះទាន់ពេលទេឪម៉ែវាក៏ងាប់ដែរ។ អីញ្ចឹងចង់បញ្ជាក់ថា ៧មករា របស់រួម»។
បន្ថែមពីនេះ សម្ដេចប្រមុខនៃរាជរដ្ឋាភិបាលកម្ពុជាក៏បានកត់សម្គាល់ឃើញថា សមិទ្ធផលរយៈពេល៤០ឆ្នាំ ក្រោយថ្ងៃរំដោះ ជាសមិទ្ធផលដែលនឹកស្មានមិនដល់នោះទេ ពោលនៅពេលបច្ចុប្បន្នប្រទេសកម្ពុជា មានការរីកចម្រើនលើគ្រប់វិស័យទាំងអស់ហើយក៏ស្របពេលដែលប្រទេសកម្ពុជាបន្ដថែរក្សាបាននូវសុខសន្ដិភាព ដែលរកបានដោយលំបាកកាលពីអតីតកាល។
គួររំលឹកជូនថា កាលពីថ្ងៃទី៧ មករា កន្លងទៅនេះ រាជរដ្ឋាភិបាលកម្ពុជាបានប្រារព្ធមហាមិទ្ទីញអបអរខួបអនុស្សាវរីយ៍នៃទិវាជ័យជម្នះ ៧ មករា ដែលជាថ្ងៃកំណើតទី២របស់ប្រជាជនកម្ពុជាដើម្បីរំលឹកនូវការចងចាំមិនឤចបំភ្លេចបាន ចំពោះមហាឧក្រិដ្ឋកម្មដ៏សាហាវព្រៃផ្សៃបំផុតនៃរបបកម្ពុជាប្រជាធិបតេយ្យរបស់ពួក ប៉ុល ពត ដែលបានប្រព្រឹត្តមកលើមាតុភូមិ និងប្រជាជនកម្ពុជា ក្នុងស្មារតីគោរពដឹងគុណយ៉ាងជ្រាលជ្រៅ ចំពោះយុទ្ធជន យុទ្ធនារី និងអ្នកស្នេហាជាតិទាំងឡាយ ដែលបានធ្វើពលិកម្មប្រកបដោយវីរភាព ក្នុងការតស៊ូផ្តួលរំលំរបបប្រល័យពូជសាសន៍ និងការពារមិនឲ្យរបបនេះឤចវិលត្រឡប់មកកម្ពុជាជាថ្មីវិញបាន។ ព្រមជាមួយនេះ យើងទាំងអស់គ្នាសូមលំឱនកាយ វាចាចិត្ត គោរពដល់វិញ្ញាណក្ខន្ធរបស់ជនរួមជាតិរាប់លាននាក់ ដែលត្រូវបានសម្លាប់យ៉ាងអយុត្តិធម៌បំផុត នៅក្នុងរបបដ៏យង់ឃ្នងនាពេលនោះ ហើយឧទ្ទិសបួងសួង សូមឲ្យដួងវិញ្ញាណក្ខន្ធរបស់លោកអ្នកទាំងអស់នោះ បានទៅកាន់សុគតិភពជារៀងដរាប។
រយៈពេល ៤០ ឆ្នាំកន្លងទៅនេះ អ្វីៗបានផ្លាស់ប្តូរស្មានមិនដល់។ កម្ពុជាដែលត្រូវបានបំផ្លាញខ្ទេចខ្ទី អស់ទៅហើយនោះ បានប្រឹងងើបឈរឡើងវិញនិងកំពុងបោះជំហានទៅមុខយ៉ាងស្វាហាប់លើមាគ៌ានៃសុខសន្តិភាព ប្រជាធិបតេយ្យ សហប្រតិបត្តិការ និងអភិវឌ្ឍន៍។ ថ្វីបើយើងបាននិងកំពុងរស់នៅយ៉ាងសុខសាន្ត និងមានមោទនភាពចំពោះសមិទ្ធផលលើគ្រប់វិស័យដែលយើងសម្រេចបានមកទល់ពេលនេះក្តីក៏យើងនៅតែត្រូវចងចាំនូវព្រឹត្តិការណ៍ដ៏ឈឺចាប់ខ្លោចផ្សាពីអតីតកាលដែលធ្វើឲ្យប្រជាជាតិយើងស្ទើរតែត្រូវបានវិនាសសូន្យដើម្បីយល់ជ្រួតជ្រាបឲ្យបានច្បាស់លាស់ត្រឹមត្រូវ អំពីដំណាក់កាលជាប្រវត្តិសាស្ត្រ ដែលយើងបានឆ្លងកាត់ ,បណ្តាមេរៀនដ៏មានតម្លៃរបស់ជាតិ, និងទិសដៅភារកិច្ចសម្រាប់ការកសាង និងការពារប្រទេស តទៅមុខទៀត។
ក្នុងរយៈពេល ៤០ ឆ្នាំ ផ្តើមពីជ័យជម្នះ ៧ មករា ១៩៧៩ កម្ពុជាសម្រេចបាននូវការកែប្រែមុខមាត់ ដែលគ្មានអ្នកណាឤចនឹកស្មានដល់។ កម្ពុជាដែលពីមុនត្រូវបានញាំញី និងបំផ្លិចបំផ្លាញ ដោយសង្គ្រាមរ៉ាំរ៉ៃ ការបែកបាក់ជាតិ និងបែងចែកទឹកដី អសន្តិសុខគ្រប់ទីកន្លែង ឥឡូវបានក្លាយជាប្រទេសដែលមានសន្តិភាពពេញលេញ មានការបង្រួបបង្រួមជាតិ និងឯកភាពទឹកដីទាំងស្រុង មានសន្តិសុខរឹងមាំ និងក្លាយជាតំបន់ទេសចរណ៍ប្រកបដោយភាពទាក់ទាញមួយនៅក្នុងតំបន់ និងពិភពលោក ហើយមានប្រជាជនរស់នៅក្នុងសុខសន្តិភាព យ៉ាងសុខដុមរមនា ទាំងក្នុងគ្រួសារ ទាំងក្នុងសហគមន៍ និងទាំងក្នុងសង្គមជាតិទាំងមូល។ កម្ពុជា ដែលពីមុន ជាវាលពិឃាដ គ្របដណ្តប់ដោយអំណាចផ្តាច់ការ និងឧក្រិដ្ឋកម្មគួរឲ្យរន្ធត់បំផុត នៃរបបប្រល័យពូជសាសន៍ ឥឡូវបានក្លាយជាទឹកដីនៃសេរីភាព ដែលមានការគោរពយ៉ាងខ្ជាប់ខ្ជួននូវគោលការណ៍នៃលទ្ធិប្រជាធិបតេយ្យសេរីពហុបក្ស តាមរយៈការរៀបចំការបោះឆ្នោតយ៉ាងទៀងទាត់ ដោយសេរី ត្រឹមត្រូវ និងយុត្តិធម៌ និងជារដ្ឋដែលគោរពគោលការណ៍ច្បាប់ដោយឥតងាករេ ហើយប្រជាជនគ្រប់រូបមានសិទ្ធិស្មើភាពគ្នានៅចំពោះមុខច្បាប់។ កម្ពុជាដែលពីមុន ត្រូវបានគេប្រមាថមើលងាយ ត្រូវបានគេហ៊ុមព័ទ្ធ និងឯកោ ទាំងខាងនយោបាយ និងសេដ្ឋកិច្ច ឥឡូវ គឺជារដ្ឋឯករាជ្យមួយ ដែលមានអធិបតេយ្យ និងបូរណភាពទឹកដីពេញលេញ ហើយកំពុងពង្រីកការធ្វើសមាហរណកម្មខ្លួនយ៉ាងសកម្ម ទៅក្នុងរចនាសម្ព័ន្ធ និងនិម្មាបនកម្ម នៃតំបន់ និងពិភពលោក ព្រមទាំងកំពុងបំពេញតួនាទីយ៉ាងសកម្មដោយស្មើភាព និងស្មើសិទ្ធិ ក្នុងរាល់កិច្ចការតំបន់ និងអន្តរជាតិ។ កម្ពុជា ដែលពីមុន ជាប្រទេសធ្លាប់ទទួលនូវកងកម្លាំងរក្សាសន្តិភាពរបស់អង្គការសហប្រជាជាតិ ឥឡូវ បានក្លាយជាប្រទេសបញ្ជូនកងកម្លាំងរបស់ខ្លួន ទៅចូលរួមក្នុងបេសកកម្មថែរក្សាសន្តិភាពរបស់អង្គការសហប្រជាជាតិ នៅប្រទេសជាច្រើនលើពិភពលោក។ កម្ពុជាដែលពីមុន ជាប្រទេសអន់ថយបំផុតខាងផ្នែកសេដ្ឋកិច្ច គ្របដណ្តប់ដោយភាពក្រីក្រ និងមានកង្វះខាតស្បៀងអាហារយ៉ាងធ្ងន់ធ្ងរ ឥឡូវ បានក្លាយជាប្រទេសមួយនាំស្រូវ-អង្ករចេញ ធានាបានយ៉ាងគត់មត់នូវសន្តិសុខស្បៀង ហើយស្ថិតនៅក្នុងចំណោមប្រទេសដែលមានកំណើនសេដ្ឋកិច្ចខ្ពស់ និងលឿនជាងគេលើពិភពលោក សម្រេចបានវឌ្ឍនភាពដ៏ល្អប្រសើរ ក្នុងការកាត់បន្ថយភាពក្រីក្រ និងការកែលម្អសូចនាករផ្នែកសង្គមកិច្ច និងលើសពីនេះទៀត បាន ឆ្លងកាត់ដោយជោគជ័យ ពីប្រទេសមានចំណូលទាប ក្លាយជាប្រទេសមានចំណូលមធ្យមកម្រិតទាប ព្រមទាំងកំពុងប្រឹងប្រែងដើម្បីក្លាយជាប្រទេសមានចំណូលមធ្យមកម្រិតខ្ពស់ នៅឆ្នាំ ២០៣០ និងជាប្រទេសមានចំណូលខ្ពស់នៅឆ្នាំ ២០៥០៕
Source: Kampuchea Thmey Daily
0 Comments