មេដឹកនាំកូរ៉េខាងជើងលោកគីមជុងអ៊ុនបានទៅដល់ទីក្រុងប៉េកាំងកាលពីថ្ងៃអង្គារសម្រាប់ដំណើរទស្សនកិច្ចមិនបានប្រកាសជាសាធារណៈមួយដើម្បីពិភាក្សាជាមួយលោកប្រធានាធិបតីស៊ីជីនពីងខណៈមានការរៀបចំកាន់តែញាប់ដៃញាប់ជើងសម្រាប់កិច្ចប្រជុំកំពូលលើកទីពីរជាមួយលោកដូណាល់ត្រាំ។
ប្រទេសចិនគឺជាសម្ព័ន្ធមិត្តការទូតដ៏សំខាន់របស់កូរ៉េខាងជើងនិងជាប្រភពចម្បងនៃវិស័យពាណិជ្ជកម្មនិងជំនួយហើយដំណើរទស្សនកិច្ចនេះទំនងជាបង្កើនការរំពឹងទុកអំពីកិច្ចប្រជុំដែលមានសក្តានុពលជាមួយប្រធានាធិបតីអាមេរិកខណៈពេលដែលលោកគីមអាចសម្របសម្រួលយុទ្ធសាស្ត្ររបស់គាត់ជាមួយលោកស៊ី។
ក្រុមអ្នកកាសែត AFP បាននិយាយថា ក្បួនម៉ូតូមួយត្រូវបានគេឃើញចាកចេញពីស្ថានីយរថភ្លើងក្រុងប៉េកាំងដោយប៉ូលិសបានបិទផ្លូវមួយជាមួយរបាំងដែកប៉ុន្មានម៉ោងបន្ទាប់ពីរថភ្លើងរបស់លោកគីមឆ្លងកាត់ព្រំដែនចូលទៅភាគខាងជើងប្រទេសចិន។
ទីភ្នាក់ងារព័ត៌មានYonhapរបស់កូរ៉េខាងត្បូងបាននិយាយថា រថភ្លើងពណ៌បៃតងចាស់ជាមួយឆ្នូតពណ៌លឿងបានចូលក្នុងស្ថានីយនេះនៅម៉ោង១០និង៥៥នាទីព្រឹក។
ចំណែកកាសែត KCNA បានរាយការណ៍ថា មេដឹកនាំកូរ៉េខាងជើងដែលអមដំណើរដោយភរិយារបស់គាត់ឈ្មោះRi Sol Juនិងមន្ត្រីជាន់ខ្ពស់មួយចំនួនទៀតបានចាកចេញពីទីក្រុងព្យុងយ៉ាងតាមរថភ្លើងឯកជនរបស់គាត់កាលពីថ្ងៃចន្ទ។
យោងតាមទីភ្នាក់ងារសារព័ត៌មាន KCNA និងទីភ្នាក់ងារសារព័ត៌មានចិនXinhua បានឲ្យដឹងថា ដំណើរនេះគឺធ្វើឡើងតាមការអញ្ជើញរបស់លោកស៊ីហើយគ្រោងនឹងដំណើរការរហូតដល់ថ្ងៃព្រហស្បតិ៍។
ដំណើរទស្សនកិច្ចនេះបានធ្វើឡើងមួយសប្តាហ៍បន្ទាប់ពីលោកគីមបានព្រមាននៅក្នុងសុន្ទរកថាឆ្នាំថ្មីថា ទីក្រុងព្យុងយ៉ាងអាចផ្លាស់ប្តូរវិធីសាស្ត្ររបស់ខ្លួនចំពោះកិច្ចចរចានុយក្លេអ៊ែរប្រសិនបើទីក្រុងវ៉ាស៊ីនតោននៅតែបន្តដាក់ទណ្ឌកម្ម។
គួរបញ្ជាក់ថា លោកគីមបានទៅធ្វើទស្សនកិច្ចប្រទេសចិនចំនួន៣ដងកាលពីឆ្នាំមុនដើម្បីពិភាក្សាជាមួយលោកស៊ី។
រហូតដល់ដំណើរទស្សនកិច្ចជាលើកដំបូងរបស់គាត់កាលពីខែមីនា លោកគីមមិនបានជួបលោកស៊ីអស់រយៈពេល៦ឆ្នាំបន្ទាប់ពីទទួលមរតកពីឪពុករបស់គាត់ខណៈដែលទំនាក់ទំនងរវាងប្រទេសជិតខាងទាំងពីរកាន់តែយ៉ាប់យ៉ឺនដោយសារការធ្វើតេស្តនុយក្លេអ៊ែររបស់កូរ៉េខាងជើងនិងការគាំទ្រទណ្ឌកម្មពីសំណាក់ប្រទេសចិន។
ក្នុងកិច្ចប្រជុំកំពូលនៅប្រទេសសិង្ហបុរី លោក គីមនិងលោកត្រាំបានចុះហត្ថលេខាលើកិច្ចសន្យាមិនច្បាស់លាស់មួយស្តីពីការរំសាយអាវុធនុយក្លេអ៊ែរចេញពីឧបទ្វីបកូរ៉េប៉ុន្តែការរីកចម្រើនបានផ្អាកដោយសារតែការមិនយល់ស្របគ្នាអំពីអត្ថន័យ។
លោក ត្រាំបានថ្លែងកាលពីថ្ងៃអាទិត្យថា ការចរចាកំពុងដំណើរការទៅលើទីតាំងនៃកិច្ចប្រជុំបន្ទាប់របស់អ្នកទាំងពីរ៕AFP
Source: Kampuchea Thmey Daily
0 Comments