ព្រៃវែង ៖ មណ្ឌលសុខភាពក្រាំងស្វាយ ឃុំក្រាំងស្វាយ ស្រុកព្រះស្ដេច ខេត្តព្រៃវែង ទើបតែកកើតថ្មីរយៈពេលជាង២ឆ្នាំ បានបម្រើ និងផ្តល់ សេវា សុខភាព ពិនិត្យព្យាបាល សម្រាក សម្រាលកូន ចាក់ថ្នាំបង្ការ និងសេវាមូលដ្ឋានជូនដល់បងប្អូនប្រជាពលរដ្ឋដែលនៅឆ្ងាយដាច់ស្រយាលបានយ៉ាងល្អប្រសើរ ហើយជាពិសេសបានបង្ខិតសេវាឲ្យនៅជិតប្រជាពលរដ្ឋ ដែលពួកគាត់ចង់បាន។
ឯកឧត្ដម បណ្ឌិត សេង បញ្ញាឬទ្ធិ ប្រធានមន្ទីរសុខាភិបាលខេត្តព្រៃវែង បានមានប្រសាសន៍ថា ទោះបីអ្នកគ្រូពេទ្យ បម្រើការនៅទីនោះ មានគ្នាបីនាក់ក៏ដោយពួកគាត់ មិនដែលហ៊ានឈប់សម្រាកទេ ប្រឹងប្រែងបម្រើសេវាសុខភាពសាធារណៈជូនប្រជាពលរដ្ឋបានល្អ។
អ្នកគ្រូពេទ្យបម្រើការមណ្ឌលសុខភាពនិយាយថា ទោះបីមិនទាន់មានពេទ្យគ្រប់គ្រាន់ក៏ដោយ ក៏ពួកគាត់ខិតខំប្រឹងប្រែងឲ្យអស់លទ្ធភាពផងដែរ ទម្រាំមានពេទ្យមកបន្ថែមទៀត។ អ្នកគ្រូពេទ្យទាំងអស់សម្តែងនូវការសប្បាយរីករាយផងដែរ នៅពេលមានប្រជាពលរដ្ឋមកទទួលសេវានៅទីនេះ មិនទៅរកសេវាឯកជន នេះបង្ហាញឲ្យឃើញថា សេវារបស់រដ្ឋមានភាពល្អប្រសើរជាងឯកជន រីឯចំពោះអ្នកក្រីក្រ មកទទួលសេវានៅមណ្ឌលសុខភាព ដោយមិនគិតថ្លៃទៀតផង។
អ្នកគ្រូពេទ្យបន្តថា ដីសាងសង់នេះជាដីកេរ្តិ៍អាកររបស់ឃុំ ហើយអាជ្ញាធរបានសម្រេចផ្តល់ឲ្យការិយាល័យសុខាភិបាលស្រុកប្រតិបត្តិព្រះស្ដេចសាងសង់មណ្ឌលសុខភាព ក្នុងការបម្រើ និងផ្តល់សេវាសុខភាពជូនប្រជាពលរដ្ឋ ជាពិសេសបានកាត់បន្ថយការចំណាយរបស់បងប្អូនប្រជាពលរដ្ឋដែលនៅឆ្ងាយមិនមានផ្លូវសម្រាប់ធ្វើដំណើរទៅដល់ទីប្រជុំជន ឬទៅដល់ពេទ្យបង្អែកស្រុកព្រះស្ដេចបានមួយកម្រិតផងដែរ។ ប្រជាពលរដ្ឋនិយាយថា សេវាកម្មល្អនៅមណ្ឌលនេះ។
ឯកឧត្ដមបណ្ឌិត សេង បញ្ញាឬទ្ធិ បានលើកឡើងថា នៅតាមមណ្ឌលសុខភាព ប៉ុស្តិ៍សុខភាព និងតាមមន្ទីរពេទ្យទូទាំងខេត្ត ត្រូវបានយកចិត្តទុកដាក់និងលើកកម្ពស់ក្នុងការផ្តល់សេវាសុខភាពភាព អនាម័យ សោភណភាពទាំងស្រុង ជាពិសេសគ្រូពេទ្យ ត្រូវបានគោរពក្រមសីលធម៌វិជ្ជាជីវៈជាគ្រូពេទ្យ មានសមត្ថភាពគ្រប់គ្រាន់ផងដែរ ជាក់ស្ដែងគ្រប់មណ្ឌលសុខភាព ប៉ុស្តិ៍សុខភាព និងតាមមន្ទីរពេទ្យទូទាំងខេត្ត ត្រូវបានប្រជាពលរដ្ឋមកទទួលសេវាគ្រប់ៗគ្នាយ៉ាងច្រើនកុះករផងដែរ៕
Source: Kampuchea Thmey Daily
0 Comments