ភ្នំពេញ ៖ បុរសម្នាក់ ក្នុងចំណោម៣នាក់ ត្រូវសមត្ថកិច្ចតាមចាប់ខ្លួនបានជាបន្តបន្ទាប់ នៅរសៀលថ្ងៃទី៨ ខែមករា ឆ្នាំ២០១៩ បន្ទាប់ពីពួកគេទាំង៣នាក់ ត្រូវបានគេរកឃើញតាមរយៈកាមេរ៉ាសុវត្ថិភាព នាំគ្នាធ្វើសកម្មភាពឆ្កឹះសោម៉ូតូគេ យកទៅដាក់បញ្ចាំ។
ប៉ូលិសនិយាយថា កាលពីអំឡុងម៉ោង១០យប់ ថ្ងៃទី៧ ខែមករា ឆ្នាំ២០១៩ មានករណីឃាត់ខ្លួនបុរស២នាក់ ក្នុងចំណោម៣នាក់ ដែលជនទាំង២នាក់ ជាបក្ខពួកចោរលួចម៉ូតូនៅក្នុងបរិវេណផ្សារអ៊ីអន២ ខណ្ឌសែនសុខ។ ពួកគេម្នាក់ជាអ្នករត់ឡានតាក់ស៊ី ឈ្មោះ សំ រិទ្ឋី អាយុ៣៥ឆ្នាំ និងម្នាក់ទៀតជាជាងជួសជុលសោ ឈ្មោះ ង្វៀង យ៉ាំងវ៉ាង ហៅ វ៉ាង ហៅ ហេង សំណាង អាយុ២៥ឆ្នាំ ជនជាតិយួន មានទីលំនៅផ្ទះលេខ៤ សង្កាត់បឹងកក់ ខណ្ឌទួលគោក ពួកគេជិះរថយន្ត១គ្រឿងម៉ាកកាមរីបាឡែន ពាក់ស្លាកលេខភ្នំពេញ 1AD .9910ដែលមានដាក់ស្លាកសញ្ញា តាក់ស៊ី (Taxi) នៅលើដំបូលរថយន្តនោះ។
ប៉ូលិសបានបញ្ជាក់ថា ក្រោយពេលសួរនាំ ជនសង្ស័យទាំង២នាក់បានប្រាប់ថា ពួកគេបានចាញ់បោកជនសង្ស័យម្នាក់ ដែលបានលួចម៉ូតូ គេចរួចខ្លួនបាត់នោះ ដែលមានដំណើររឿងបញ្ជាក់ដោយឈ្មោះ សំ រិទ្ឋី ជាអ្នករត់តាក់ស៊ី ថា មុនដំបូងជននោះ បានហៅតាក់ស៊ីគាត់ជិះចេញពីមុខកាស៊ីណូហ្គាណាវើល លុះមកដល់ម្តុំផ្សារ៧មករា ជននោះបានទូរស័ព្ទហៅបក្ខពួកគេម្នាក់ ឈ្មោះ ហេង សំណាង ឬហៅ ង្វៀង យ៉ាំងវ៉ាង ជាជាងធ្វើសោ ដោយប្រាប់ថា ខ្លួនបានជ្រុះបាត់សោម៉ូតូនៅផ្សារអ៊ីអន២ ដោយឲ្យតម្លៃឈ្នួលរហូតទៅដល់១០ដុល្លារ ជាងសោក៏ឯកភាពគ្នា បន្ទាប់មកក៏នាំគ្នាមកដល់គោលដៅផ្សារអ៊ីអន២នោះ។
នៅពេលទៅដល់ទីនោះ ជនម្នាក់នោះបានទៅប្រាប់ខាងសន្តិសុខថា ខ្លួនបាត់សោម៉ូតូម៉ាកនិក សុំឲ្យជាងសោមកឆ្កឹះ ឯសន្តិសុខក៏ឯកភាព ហើយជាងសោ និងអ្នករត់តាក់ស៊ីក៏កក់ក្តៅដែរ។
នៅពេលធ្វើសោរួចរាល់បញ្ឆេះម៉ូតូបានហើយ ជននោះបានហៅជាងសោ និងអ្នកបើកតាក់ស៊ីចូលក្នុងឡានយកលុយ ប៉ុន្តែមិនទាន់បានឲ្យលុយផងជននោះក៏ជិះម៉ូតូចេញទៅបាត់ ដោយខាងសន្តិសុខយាមហៅឆែកឆេរក៏មិនឈប់។
ខាងសន្តិសុខមានការសង្ស័យក៏ឆែកកាមេរ៉ាសុវត្ថិភាពឃើញពួកគេកំពុងតែធ្វើសកម្មភាពឆ្កឹះសោម៉ូតូនៅកន្លែងចំណតម៉ូតូ មានគ្នា២នាក់ផ្សេងទៀត ទើបឃាត់ខ្លួនប្រគល់ឲ្យប៉ូលិសមូលដ្ឋាន ដោយមានម្ចាស់ម៉ូតូឈ្មោះ ស៊ាម ហុងសាត មុខរបរបុគ្គលិកបម្រើការនៅផ្សារអ៊ីអន២ បានដាក់ពាក្យប្តឹងចោទ។
លុះពេលថ្ងៃបន្ទាប់(ស្អែកឡើង) ប៉ូលិសបានស្រាវជ្រាវដឹងអត្តសញ្ញាណជនសង្ស័យម្នាក់នោះ ឈ្មោះ ឯម សុដាចាន់ ហៅលី អាយុ២២ឆ្នាំ ជាអតីតបុគ្គលិកផ្សារអ៊ីអន ដែលត្រូវបានគេបញ្ឈប់ការងារដោយសារសកម្មភាពមិនល្អ។ បន្ទាប់មកប៉ូលិសបានស្រាវជ្រាវរកជននោះតាមប្រព័ន្ធGPSទូរស័ព្ទដែលគេប្រើរកឃើញនៅម្តុំមុខផ្សារ ផ្លាហ្សារ សង្កាត់ទឹកថ្លា ចាប់វាយខ្នោះដៃតែម្តង។
តាមចម្លើយរបស់ជនសង្ស័យ ឈ្មោះ ឯម សុដាចាន់ នេះបានសារភាពថា មូលហេតុដែលខ្លួនបានលួចម៉ូតូគេនេះ ដោយសារតែលេងល្បែងចាញ់អស់លុយច្រើនរាប់ពាន់ដុល្លារនៅក្នុងកាស៊ីណូ ណាហ្គា។
ជននេះក៏បានបញ្ជាក់ថា ម៉ូតូដែលខ្លួនលួចបាននោះយកទៅដាក់បញ្ចាំនៅកុងស៊ីក្នុងកាស៊ីណូ ណាហ្គា នោះដែរ បានចំនួន៣០០ដុល្លារ ហើយក៏បានលេងល្បែងនៅទីនោះចាញ់អស់បន្តទៀត។
ចំណែកឯអ្នករត់តាក់ស៊ី និងជាងសោនោះ មិនមានការពាក់ព័ន្ធលួចទេ៕
Source: Kampuchea Thmey Daily
0 Comments